ތަހުގީގުކުރާ މައްސަލަތަކުގައި ދައުވާކުރުމުގެ ބާރު އޭސީސީއަށް ދިނުމަށް އެދިއްޖެ
17 ނޮވެމްބަރު 2021 | ބުދަ 09:37ދައުވާ ނުކުރެވޭ ސަބަބު މަޖިލީހުން ބަލަން ޖެހޭ
އޭސީސީގެ މެމްބަރުން ބަޖެޓް ދިރާސާކުރާ ކޮމިޓީގައި
އެންޓި ކޮރަޕްޝަން ކޮމިޝަނުން ތަހުގީގުކޮށް ނިންމާ މައްސަލަތަކުގައި ދަޢުވާ ކުރުމުގެ ބާރު އެ ކޮމިޝަނަށް ލިބިދޭނެ ގޮތަށް އިސްލާހެއް ހުށަހަޅައިދިނުމަށް އެ ކޮމިޝަނުން ރައްޔިތުންގެ މަޖިލީހުގައި އެދިއްޖެއެވެ.
ރައްޔިތުންގެ މަޖިލީހުގެ ބަޖެޓު ކޮމިޓީގައި އަންގާރަ ދުވަހު އޭސީސީގެ މެމްބަރު އިބްރާހިމް ޝަކީލް ވިދާޅުވީ އެންމެ ބޭނުންވާ އިސްލާހަކަށް ވާނީ ޕްރޮސެކިއުޝަންގެ ބާރު އެންޓި ކޮރަޕްޝަން ކޮމިޝަނަށް ލިބިދިނުން ކަމަށެވެ. އެ އިސްލާހު އެގޮތަށް ހުށަހަޅުއްވައިދެއްވުމަށް ޝަކީލް ވިދާޅުވިއެވެ. ޝަކީލް ވިދާޅުވީ، އެއީ ފަސޭހަކަމެއް ނޫންކަން ގަބޫލު ކުރައްވާ ކަމަށާއި، އެހެންނަމަވެސް އުންމީދަކީ ކޮންމެވެސް ދުވަހަކުން ދައުވާ ކުރުމުގެ ބާރު ލިބިގެން ދިޔުމެވެ.
ޝަކީލް ވިދާޅުވީ، އޭސީސީން ތަހުގީގުކޮށް ނިންމައި، ދައުވާ ކުރުމަށް އެދި ޕީޖީއަށް ފޮނުވާ މައްސަލަތަކުގައި އުންސުރު ހަމަނުވާ ކަމަށް ބުނެ ޕީޖީ އޮފީހުން ކަންބޮޑުވުން ފާޅުކޮށްފައިވާ ކަމަށެވެ. އަނބުރާ ފޮނުވާ މައްސަލަތަކާ ގުޅޭ ގޮތުން ޕީޖީގެ ނިންމެވުންތަކާ ގުޅޭ ގޮތުން ވަކި އެއްޗެއް ދަންނަވަން ބޭނުން ނުވާ ކަމަށެވެ. އެހެންނަމަވެސް ދައުވާ ނުކުރެވޭ ސަބަބު މަޖިލީހުން ބަލަން ޖެހޭ ކަމަށް ދެކިވަޑައިގަންނަވާ ކަމަށް ޝަކީލް ވިދާޅުވިއެވެ.
ޕީޖީ ހުސައިން ޝަމީމް އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވަނީ މައްސަލަތަކުގައި މަޝްވަރާ ކޮށްލުމަކީ އޭސީސީގެ މުސްތަގިއްލުކަމަށް އަސަރު ކުރާނެ ކަމެއް ނޫނެވެ.
އޭސީސީގެ މަސައްކަތް ލަސްކަމަށް ބަޖެޓް ދިރާސާ ކޮމިޓީގެ މެމްބަރުން ވިދާޅުވިއެވެ. އޭސީސީގެ މެމްބަރުންގެ ޕާރފޯމެންސް އޮޑިޓެއް ހެދުމަށް ފަހުން މެމްބަރުން ވަކިކުރަން މިނިވަން މުއައްސަސާތަކުގެ ކޮމިޓީންވަނީ ދާދި ފަހުންވަނީ ނިންމާފައެވެ. އަދި ވަކި ވަކި މެންބަރުން ކޮމިޓީއަށް ހާޒިރު ކުރުމަށްވެސް އެ ކޮމިޓީން ވަނީ ނިންމާފައެވެ.
