ބޮލީވުޑްގެ ތަރި ރާޖުކުމާރު ރާއޯ 11 ވަންދެން ލޯބީގެ ގޮތުން ގުޅިގެން އުޅުނު ލޯބިވެރިޔާ ޕަތްރަލިކާއާ ކައިވެނިކޮށްފިއެވެ.
ހޯމަ ދުވަހު ރާޖުކުމާރު ރާއޯ ކައިވެނިކޮށްފައިވަނީ ޓްރެޑިޝަނަލް ސެރަމަނީއެއްގައި، ހަމައެކަނި އާއިލާއާއި ގާތް ރަހުމަތްތެރިންގެ ހާޒިރުގައެވެ. ކައިވެނީގެ ހަފުލާ ބާއްވާފައިވަނީ ނިއު ޗަންދީގަރުގެ އޮބެރޯއީ ސުކްވިލާސް ސްޕާ ރިސޯޓްގައެވެ.
ކައިވެނިކުރުމަށްފަހު ރާޖުކުމާރު އިންސްޓަރގްރާމަށް ދޫކޮށްލި ފޮޓޯގައި ބުނެފައިވަނީ، 11 އަހަރުވަންދެން ލޯބީގެ ގޮތުން ގުޅިގެން އުޅުނު ލޯބިވެރިޔާއާ ކައިވެނިކުރެވިއްޖެކަމަށެވެ. ޕަތްރަލިކާގެ ފިރިމީހާއަށް ވުމަށްވުރެ ބޮޑު އުފަލެއް ނެތްކަމަށް ރާޖުކުމާރު ވަނީ ބުނެފައެވެ.
ޕަތްރަލިކާވެސް ވަނީ އިންސްޓަރގްރާމަށް ފޮޓޯއެއް ދޫކޮށްލާފައެވެ. ރާޖުކުމާރުގެ އަންހެނުންނަށް ވުމަށްވުރެ ބޮޑު އުފަލެއް ނެތްކަމަށް ޕަތްރަލިކާވެސް ވަނީ ބުނެފައެވެ.
މިދެމީހުން އެންގޭޖްވެފައިވަނީ އޮކްޓޯބަރ މަހުގެ 13 ވަނަ ދުވަހުއެވެ. އެހަފުލާގެ ވީޑިއޯ ވަނީ ސޯޝަލް މީޑިޔާގައި ވައިރަލްވެފައެވެ.
