ފުލުހުންގެ ވަޒީފާއަށް އެދުމުގެ މުއްދަތު އިތުރުކޮށްފި
15 ނޮވެމްބަރު 2021 | ހޯމަ 09:59މުއްދަތު އިތުރުކޮށްފައި ވަނީ ނޮވެމްބަރ 30ގެ 16:00އާ ހަމައަށް
ފުލުހުން
ފުލުހުންގެ ވަޒީފާއަށް އެދި ފޯމު ހުށަހެޅުމުގެ މުއްދަތު އިތުރުކޮށްފިއެވެ.
ފުލުހުންގެ ވަޒީފާއަށް ވަނުމަށް ފޯމު ހުށަހެޅުމުގެ ފުރުސަތު ނޮވެމްބަރު 16 ވަނަ ދުވަހާ ހަމައަށް ހުޅުވާލާފައިވީ ނަމަވެސް، މިހާރު މި މުއްދަތު ވަނީ ނޮވެމްބަރު 30 ވަނަ ދުވަހުގެ 16:00އާ ހަމައަށް އިތުރުކޮށްފައެވެ.
ވަޒީފާއަށް މީހުން ހޮވުމުގައި ތައުލީމީ ގޮތުން މަތީ ސަނަދު ހާސިލްކޮށްފައިވާ ފަރާތްތަކަށާއި، ކުރިއަށްގެންދެވޭ އިމްތިޙާނުތަކުން މަތީ ނަތީޖާ ހޯދާ ފަރާތްތަކަށް އިސްކަން ދެވޭނެއެވެ. އަދި ފުލުހުންގެ މަސައްކަތްތައް ކުރުމަށް ކަނޑައަޅާ ދާއިރާތަކަށް، އަދި ދާއިރާތަކަށް ޚާއްސަކުރެވިފައިވާ އަދަދުތަކަށް ކުރިމަތިލާ އަންހެން ކެންޑިޑޭޓުންނާއި، ފުލުހުންގެ ޚިދުމަތް ހަރުދަނާކޮށް ފުޅާކުރުމަށް އިންސާނީ ވަސީލަތް ބޭނުންވާ ސަރަހައްދުތަކަށް ބެލެވޭނެކަމަށް ފުލުހުން މައުލޫމާތުދެއެވެ. މީގެ އިތުރުން ފުލުހުންގެ ޚިދުމަތް އަލަށް ޤާއިމުކުރަން މަސައްކަތްކުރާ ސަރަހައްދުތަކުގައި މަސައްކަތްކުރުމަށް ޝައުގުވެރިވާ ފަރާތްތަކަށް އިސްކަންދޭން ފުލުހުން ވަނީ ނިންމާފައެވެ.
ވަޒީފާއަށް އެދި ހުށަހަޅާ ފަރާތްތަކުން ފޯމް ހުށަހަޅާނީ 2021 ނޮވެމްބަރު 30 ވަނަ ދުވަހުގެ 16:00ގެ ކުރިން، ޝަހީދު ޙުސައިން އާދަމް ބިލްޑިންގގެ ރިޝެޕްޝަނަށް، ނުވަތަ އަތޮޅުތަކުގައި ޤާއިމްކޮށްފައިވާ ޕޮލިސް ސްޓޭޝަނަށެވެ. ފޯމް ބަލައިގަތުމަށް ހަމަޖެހިފައިވަނީ ރަސްމީ ބަންދު ނޫން ކޮންމެ ދުވަހެއްގެ މެންދުރުފަހު 14:00އިން 16:00އަށެވެ.
ފުލުހުންގެ ވަޒީފާއަށް އެދި ހުށަހަޅާ ފޯމް ޝަހީދު ޙުސައިން އާދަމް ބިލްޑިންގގެ ރިސެޕްޝަނުންނާއި، އަތޮޅުތަކުގެ ޕޮލިސް ސްޓޭޝަންތަކުގެ އިތުރުން ލިބިވަޑައިގަންނަވާނެއެވެ. އަދި ފުލުހުންގެ ވެބްސައިޓުން ޑައުންލޯޑް ކުރެވޭނެއެވެ.
