ޑޭ ކެއަރ ސެންޓަރަކާއެކު އުރީދޫގެ މައި އޮފީސް އިމާރާތުގެ ފައުންޑޭޝަން އަޅައިފި
އުރީދޫގެ މައި އޮފީސް ހަދަން ހަމަޖެހިފައި ވަނީ ބިއްލޫރިއާއި އެކަތަ ބޭނުންކޮށްގެން
އުރީދޫގެ މައި އޮފީސް އިމާރާތުގެ ފައުންޑޭޝަން އެޅުމުގެ ރަސްމިއްޔާތު
ހުޅުމާލޭގައި އިމާރާތްކުރާ އުރީދޫ މޯލްޑިވްސްގެ މައި އޮފީސް އިމާރާތުގެ ފައުންޑޭޝަން އަޅައިފިއެވެ.
އެ ސައިޓުގައި ކުރިއަށްދިޔަ ރަސްމިއްޔާތުގައި މި މަސައްކަތް ފައްޓަވައިދެއްވީ އުރީދޫ މޯލްޑިވްސްގެ ސީއީއޯ ނަޖީބު ޚާނާއި، ބޯޑު މެމްބަރުންނެވެ. ހުޅުމާލެ ފުރަތަމަ ފިޔަވަހީގައި މި އިމާރާތުގެ ބިންގާ އަޅާފައިވަނީ 2017ވަަނަ އަހަރުގެ އޮކްޓޫބަރު މަހުއެވެ.
އެ ރަސްމިއްޔާތުގައި ވާހަކަފުޅު ދައްކަވަމުން އުރީދޫގެ ސީއީއޯ ނަޖީބު ޚާން ވިދާޅުވީ ހުޅުމާލޭގައި އަލަށް އަޅާ އުރީދޫގެ އިމާރާތަކީ، އެ ކުންފުނީގެ ކާމިޔާބަށް އިތުރުކުރެވޭ ބޮޅެއް ކަމަށެވެ. މިއީ ހަމައެކަނި އޮފީހެއް ނޫން ކަމަށާއި، އެތަން ވެގެންދާނީ އުރީދޫގެ މުވައްޒަފުން އެތަނަށް ގޮސް ރާއްޖޭގެ އިގްތިސާދު ކުރިއެރުވުމަށް މަސައްކަތްތަކެއް ކުރާނޭ ތަނަކަށް ކަމުގައި ސީއީއޯ ވިދާޅުވިއެވެ. މިތަނަކީ ތިމާވެއްޓާއި ރައްޓެހި ގޮތަކަށް މުވައްޒަފުންނަށް ފަސޭހަވާނެގޮތަށް ފަރުމާ ކުރެވިގެން އިމާރާތްކުރާ އޮފީހެއް ކަމަށް ނަޖީބު ވިދާޅުވިއެވެ.
އަލަށް ހަދާ އިމާރާތުގައި އުރީދޫގެ މުވައްޒަފުންނަށް ރެކްރިއޭޝަނަށް ޚާއްސަ ތަނަކާއި މުވައްޒަފުންގެ ދަރިން ބަލާނޭ ޑޭ ކެއަރ ސެންޓަރެއްވެސް ހުންނާނެއެވެ. މިއީ މިގޮތަށް އިމާރާތްކުރާ ފުރަތަމަ އޮފީހެވެ.
އުރީދޫގެ މައި އޮފީސް ހަދަން ހަމަޖެހިފައި ވަނީ ބިއްލޫރިޔާއި އެކަތަ ބޭނުންކޮށްގެން 10 ބުރިއާއި 12 ބުރިއާ ދެމެދުގެ އުސްމިނަށެވެ.
