އެއްގަމު ދަތުރުފަތުރުގެ ޤާނޫނުގެ ދަށުން ކުރެވޭ ޖޫރިމަނާއާ ގުޅިގެން ޝަކުވާ ހުށަހެޅުމާ ބެހޭ ގަވާއިދެއް އެކުލަވާލައިފިއެވެ.

މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ގެޒެޓުކޮށްފައިވާ މި ގަވާއިދަކީ އެއްގަމު ދަތުރުފަތުރުގެ ޤާނޫނުގެ ދަށުން ކުރެވޭ ޖޫރިމަނާއާ ގުޅިގެން މިނިސްޓްރީއަށް ޝަކުވާ ހުށަހެޅުމާއި އެ ޝަކުވާއާމެދު ގޮތް ނިންމުމުގެ އުސޫލުތައް ބަޔާންކުރާ ގަވާއިދެވެ. މި ގަވާއިދަކީ، އެއްގަމު ދަތުރުފަތުރުގެ ޤާނޫނުގެ 9 ވަނަ މާއްދާގެ (ހ) ގެ ދަށުން ބާރު ލިބިގެން، އެ މާއްދާގެ (ރ) ގެ ދަށުން އެކުލަވައިލައިފައިވާ ގަވާއިދެކެވެ.

މި ގަވާއިދުގެ މަޤްޞަދަކީ، އެއްގަމުގެ ދަތުރުފަތުރުގެ ޤާނޫނުގެ ދަށުން ކުރެވޭ ޖޫރިމަނާއާ ގުޅިގެން ޝަކުވާ ހުށަހެޅުމާއި، އެ ޝަކުވާތައް ބެލޭނެ ނިޒާމެއް ޤާއިމުކުރުމުގެ ގޮތުން، އެފަދަ ޝަކުވާ މިނިސްޓްރީއަށް ހުށަހެޅުމުގެ އުސޫލުތަކާއި، ހުށަހެޅޭ ޝަކުވާތައް ބެލުމުގެ އިޖުރާއަތުތަކާއި، ޖޫރިމަނާކުރި ކުރުން މުރާޖަޢާކުރެވޭނެ ހާލަތްތަކާއި، ހަމަހަމަކަމާއެކު އެކަން ކުރެވޭނެ އުސޫލުތައް ބަޔާންކުރުމެވެ.

މި ގަވާއިދުގައި ބުނެފައިވަނީ ކުރެވޭ ޖޫރިމަނާއާ ގުޅިގެން މިނިސްޓްރީއަށް ޝަކުވާ ހުށަހެޅުމުގެ ޙައްޤު، ޖޫރިމަނާ ކުރެވިފައިވާ ކޮންމެ ފަރާތަކަށް ވެސް ލިބިގެންވާ ކަމަށެވެ.

މި ގަވާއިދުގެ ދަށުން ޤާނޫނުގެ ދަށުން ކުރެވޭ ޖޫރިމަނާއާ ގުޅިގެން މިނިސްޓްރީއަށް ޝަކުވާ ހުށަހަޅަން ބޭނުންވާ ފަރާތްތަކުން، ޖޫރިމަނާކުރެވުނު ތާރީޚުން ފެށިގެން ގިނަވެގެން 30 ދުވަހުގެ ތެރޭގައި ޝަކުވާ ހުށަހަޅަންވާނެކަމަށް ބުނެފައިވެއެވެ. އަދި މި މުއްދަތު ފަހަނައަޅައިދާފަހުން ހުށަހަޅާ ޝަކުވާތައް ބަލައި ނުގަންނާނެކަމަށް ބުނެފައިވެއެވެ.

މި ގަވާއިދުގައި ބުނެފައިވަނީ އެއްގަމު ދަތުރުފަތުރުގެ ޤާނޫނުގެ ދަށުން ކުރެވޭ ޖޫރިމަނާއާ ގުޅިގެން މިނިސްޓްރީއަށް ޝަކުވާ ހުށަހެޅޭނީ، އެ ޝަކުވާ ބިނާކޮށްފައިވާ އަސާސަކީ 4 ސަބަބުތަކުން ކުރެ ސަބަބެއް ކަމުގައި ވާނަމައެވެ.

އޭގެ ތެރޭގައި ހިމެނެނީ ޖޫރިމަނާއެއް ކުރެވިދާނެކަމުގައި ބަޔާންކޮށްފައިނުވާ ހާލަތެއްގައި ކަމަށް ވުމާއި، ޖޫރިމަނާ ކުރަންޖެހޭ ހާލަތު ނުވަތަ ސަބަބު ޙަޤީޤަތުގައި މެދުވެރިވެފައި ނެތުމާއި، ޖޫރިމަނާ ކުރަންޖެހޭ ފަރާތް ނޫން އެހެން ފަރާތެއް ކަމުގައި ވުމެވެ. އަދި ޖޫރިމަނާގެ އަދަދަކީ ޖޫރިމަނާ ކުރެވުނު ފަރާތް އެއްގަމު ދަތުރުފަތުރުގެ ޤާނޫނާއި ޚިލާފަށް ކުރި ޢަމަލާ ގުޅިގެން އެ ޤާނޫނުގެ ދަށުން ޖޫރިމަނާ ކުރަންޖެހޭ ޞައްޙަ އަދަދު ކަމަށް ނުވުމެވެ.

މި ގަވާއިދުގެ ދަށުން މައްސަލަ ބެލުމަށް މުރާޖަޢާ ކޮމިޓީއެއް އެކުލަވާލަން މި ގަވާއިދުގައި ބުނެފައިވެއެވެ. އަދި ކަށަވަރުކުރަންޖެހޭ އެންމެހައި ކަންކަން ފުރިހަމަވެފައިވާ ކަމުގައި ކަނޑައަޅައިފައިވާ ޝަކުވާތަކާ ގުޅޭ ހާދިސާ ރިޕޯޓު ޖޫރިމަނާކުރި ދައުލަތުގެ އިދާރާގެ ފަރާތުން މިނިސްޓްރީއަށް ލިބުމާއެކު ގިނަވެގެން 3 ދުވަހުގެ ތެރޭގައި، ޝަކުވާ ފޯމާއި، ހާދިސާ ރިޕޯޓާއި، އެ ދެ ލިޔުމާއެކު ލިބިފައިވާ އެންމެހައި ލިޔެކިޔުމާއި ތަކެތި، ޝަކުވާއާމެދު ގޮތެއް ކަނޑައެޅުމަށް ޓަކައި މުރާޖަޢާ ކޮމިޓީއަށް ފޮނުވަންވާނެއެވެ.

އަދި މުރާޖަޢާ ކޮމިޓީއަށް ޝަކުވާއެއް ފޮނުވާތާ ގިނަވެގެން 10 ދުވަހުގެ ތެރޭގައި އެ ޝަކުވާއާމެދު އެ ކޮމިޓީން ގޮތެއް ނިންމައި، އެ ނިންމުން ޝަކުވާ ހުށަހެޅި ފަރާތާއި، ޖޫރިމަނާ ކުރި ދައުލަތުގެ އިދާރާ އަދި މީރާއަށް އަންގަންވާނެކަމަށް ބުނެފައިވެއެވެ.