ކ. މާލެ
|
11 ނޮވެންބަރ 2021 | ބުރާސްފަތި 18:51
ކޮޕް26 ކޮންފަރެންސްގެ ތެރެއިން
ކޮޕް26 ކޮންފަރެންސްގެ ތެރެއިން
ރޮއިޓަރސް
ކޮޕް26 ކޮންފަރެންސް
ކޮޕް26: ފަހުވަގުތު، ދުނިޔެ ސަލާމަތްކުރުމަށް އެމެރިކާއާއި ޗައިނާގެ "ސަޕްރައިޒް" އެއްބަސްވުމެއް
 
މިއީ ކޮޕް26 ކާމިޔާބު ކޮންފަރެންސް އަކަށް ވުމަށް މުހިންމު ނިންމުންތަކެއް
 
އެއްބަސްވި ކަންތައްތަކަކީ؛ މީތޭން ބޭރުކުރުން ހުއްޓުމާއި ބޯޓުދެލި އަންދައިގެން ހަކަތަ އުފެއްދުން ނިމުމަކަށް ގެނައުމާއި ޖަންގަލިތައް ހިމާޔަތްކުރުން

ދުނިޔެ ހޫނުވުމުގައި އެންމެ ބޮޑު ދައުރެއް އަދާކުރާ އެމެރިކާއާއި ޗައިނާއިން، ދުނިޔެ ހޫނުވުން ހުއްޓުވުމަށް ނިންމައި ހަރުދަނާ އަވަސް ފިޔަވަޅުތަކެއް އެޅުމަށް އެއްބަސްވެ "ސަޕްރައިޒް" ކަންތައްތަކެއް ހާމަކޮށްފިއެވެ.

ގްލާސްގޯގައި މިހާރު ކުރިޔަށްދާ ކޮޕް26 ކޮންފަރެންސަކީ، ދުނިޔޭގެ ހޫނުމިން 1.5 ޑިގްރީގައި ބެހެއްޓުމަށް ގައުމުތަކަށް ލިބޭނެ އެންމެ ފަހު ފުރުސަތުގެ ގޮތުގައި ވަނީ ބެލެވިފައެވެ. ނަމަވެސް ދުނިޔެއަށް އެންމެ ގިނައިން ވިހަ ގޭސް ދޫކުރާ ބޮޑެތި ގައުމުތަކުގެ ހަރުދަނާ ނިންމުންތަކެއް މިކޮންފަރެންސްގެ ތެރެއިން އަދި މިހާތަނަށް ފެނިފައެއްނުވެއެވެ. ވަކިން ޚާއްސަކޮށް ޕެރިސް އެގްރިމެންޓްގައި އެއްބަސްވި ގޮތަށް އެލަނޑުދަނޑިތަކަށް ހާސިލުވުމަށް ކުރާނެ ކަންތައްތަކާބެހޭ ހަރުދަނާ ތަފްސީލުތަކެއް ބޮޑެތި ގައުމުތަކުން ހާމަކޮށްފައެއްނުވެއެވެ.

ނޮވެމްބަރ މަހުގެ 12 ވަނަ ދުވަހާ ހަމައަށް ކޮންފަރެންސް ކުރިޔަށްދާއިރު، އެމެރިކާއާއި ޗައިނާއިން އެންމެ ފަހު ވަގުތު އެއްބަސްވި ކަންކަމުގެ ތެރޭގައި; މީތޭން ބޭރުކުރުން ހުއްޓުމާއި ބޯޓުދެލި އަންދައިގެން ހަކަތަ އުފެއްދުން ނިމުމަކަށް ގެނައުމާއި ޖަންގަލިތައް ހިމާޔަތްކުރުން ހިމެނެއެވެ. މިއީ މިފަހަރުގެ ކޮންފަރެންސްގައި މައިގަނޑު ގޮތެއްގައި ނިންމާފައިވާ ނިންމުންތައްވެސްމެއެވެ. ނަމަވެސް މިނިންމުންތަކުގައި އެމެރިކާއާއި ޗައިނާގެ "އާނ ބަސް" ނެތުމަކީ ގިނަ ބައެއްގެ ކަންބޮޑުވުމެކެވެ.

އެމެރިކާގެ ކްލައިމެޓް އެންވޯއީ ޖޯން ކެރީ އަދި ޗައިނާގެ ފަރާތުން ޝީ ޒިންހުއާ ވަނީ މިއެއްބަސްވުންތަކުގެ ފްރޭމް ވޯރކް ހާމަކޮށްފައެވެ. ދެގައުމުން ވެފައިވާ އެއްބަސްވުންތަކާ ގުޅޭގޮތުން ވާހަކަދައްކަވަމުން ކެރީ ވިދާޅުވީ; ދެ ގައުމު ގުޅިގެން ކޮޕް26 ކޮންފަރެންސް ކާމިޔާބު ކޮންފަރެންސަކަށް ހެދުމަށް މުހިންމު ނިންމުންތަކެއް ނިންމާފައިވާކަމަށެވެ. އަދި މީގެތެރޭގައި، ހާސިލުކުރާނެ ލަނޑުދަނޑިތަކެއްވެސް ކަނޑައެޅިފައިވާކަން ކެރީ ފާހަގަކުރެއްވިއެވެ. މިކަންކަން ހާސިލުކުރުމަށް އަދި ގިނަ ދުވަސްތަކެއް އެބައޮތް ކަމަށްވެސް ކެރީ ވިދާޅުވިއެވެ.

ޒީ ވިދާޅުވީ; މިއެއްބަސްވުމުގެ ދަށުން ޗައިނާއިން ޖައްވަށް ދޫކުރާ ވިހަ ގޭސް މަދުކުރުމަށް ކުރަމުންދާ މަސައްކަތްތައް ފެނިގެންދާނެކަމަށެވެ. ދެ ގައުމު ގުޅިގެން ކޮޕް26 ކާމިޔާބު ކޮންފަރެންސަކަށް ހެދުމަށް މަސައްކަތްކުރާނެ ކަމަށް ޒީ ވިދާޅުވިއެވެ.

މިއެއްބަސްވުމުގައިވާ ގޮތުން ޗައިނާއިން، ބޯޓުދެލި އެންދުން 5 އަހަރުގެ ދުވަހުގެ ތެރޭގައި ނިމުމަކަށް ގެނައުމަށް މަސައްކަތްކުރާނެއެވެ. އެގޮތުން 2026ން 2030ށް މިލަނޑުދަނޑި ހާސިލުކުރުމަށް މަސައްކަތްކުރާއިރު މިމުއްދަތުގެ ތެރޭގައި މީތޭން ޖައްވަށް ދޫކުރުން އެއްކޮށް ޗައިނާއިން ހުއްޓާލާނެއެވެ.

ޗައިނާއާއި އެމެރިކާގެ މިއެއްބަސްވުމަކީ އެމެރިކާ އިސްވެ އޮވެ އެކުލަވާލާފައިވާ އެއްބަސްވުމެކެވެ. އަދި މިކަމުން އެމެރިކާގެ ރައީސް ޖޯ ބައިޑަން، މޫސުމަށް އަންނަ ބަދަލުތަކާ ގުޅިގެން ދުނިޔެ ސަލާމަތްކުރުމަށް އެމެރިކާ އިސްވެ އޮވެ ކަންތައްތަކެއް ކުރައްވާކަން ދުނިޔެއަށް ސާބިތުކޮށްދެއްވާފައިވާ ކަމަށް ކަމާބެހޭ މާހިރުން ދެކެއެވެ.

ކޮޕް26 ކޮންފަރެންސްގައި ޗައިނާގެ ރައީސް ޝީ ޖިންޕިން އަދި ރަޝިޔާގެ ރައީސް ވްލަޑްމިއަރ ޕުޓިން ބައިވެރިވެވަޑައެއް ނުގަންނަވައެވެ. އެހެންކަމުން ޖޯ ބައިޑަން ވަނީ އެކަމަށް އިޝާރާތްކުރައްވައި، ދުނިޔޭގެ ވެރިކަން ކުރަން ބޭނުންވާ ގައުމުތަކުން ދުނިޔެ ހޫނުވުމުން ސަލާމަތްކޮށް މޫސުމީ ބަދަލުތަކުން ދުނިޔެ ސަލާމަތްކުރުމުގައި ލީޑަރޝިޕް ނުނަގާތީ އެކަމާގުޅޭގޮތުން އެ 2 ގައުމަށް ފާޑުވިދާޅުވެފައެވެ.

އެމެރިކާއާއި ޗައިނާގެ މިނިންމުމަކީ އުންމީދުގެ ހުޅުކޮޅު އިތުރަށް ދިއްލުނުކަމެއްގެ ގޮތުގައި އީޔޫގެ ކްލައިމެޓް ޗީފް ފްރޭންސް ޓިއްމަމެންސް ވިދާޅުވިއެވެ. އަދި ދެގައުމުގެ މި ނިންމުމާއެކު ކޮޕް26އަކީ ކާމިޔާބު ކޮންފަރެންސް އަކަށްވެގެންދާނެ ކަމުގެ ފުރުސަތު ބޮޑުވެފައިވާކަމަށް މާހިރުން އަންނަނީ ބުނަމުންނެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އައިޝަތު ރިޔާޒް
0%
100%
0%
0%
0%
0%
ކޮމެންޓް