ފުވައްމުލައް ސިޓީގެ ހޯދަނޑު އަވަށުގެ ވަނަވަރު ކިޔާ ގޭގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފް ސަދަން ކޮމާންޑުގެ ފުވައްމުލަކު ފަޔަރ ސްޓޭޝަނުގެ ފަޔަރ ފަައިޓަރުން އެސަރަހައްދުގައި ހަރަކާތްތެރިވެ އަލިފާންގަނޑު މިހާރު ވަނީ ނިއްވާލާފައެވެ.
އަލިފާންގަނޑު ނިއްވާލައިފައިވަނީ ބުރާސްފަތި ދުވަހުގެ ހެނދުނު 10:55 ގައެވެ. އަލިފާނުގެ ހާދިސާ ހިނގައިގެން އެމްއެންޑީއެފްގެ ފަޔަރ އެންޑް ރެސްކިއު ސަރވިސްއަށް ރިޕޯޓްކޮށްފައިވަނީ ވެސް ހެނދުނުގެ ވަގުތެއްގައެވެ.
މިހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވާކަމަށް އެމްއެންޑީއެފުން މައުލޫމާތުދެއެވެ. އަލިފާނުގެ މި ހާދިސާ ހިނގި ކަމަށް ލަފާކުރެވެނީ ފަންކާއެއްގެ ޑިމަރެއްގައި ރޯވެގެންނެވެ. ގެޔަށާއި ތަކެއްޗަށް ލިބުނު ގެއްލުންތައް މިހާރު ދަނީ ބަލަމުންނެވެ.
