ކޮންމެ ވަޒީފާއަކީވެސް މުފީދާއަށް ޝަރަފުވެރި ވަޒީފާއެއް

"ދައްތަ ވަރަށް އުފާވި. ދުވަހަކުވެސް ހީ ނުކުރަން މިފަދަ ކަމެއް ވެދާނެ ކަމަކަށް." ފ. މަގޫދޫ މުޝްތަރީގެއަށް އުފަން މުފީދާ އިބްރާހިމް ކިޔައިދިނެވެ. އޭނާ ފ. މަގޫދޫ ހެލްތް ސެންޓަރުގައި މަސައްކަތު މީހެއްގެ ގޮތުގައި މަސައްކަތްކުރަމުންދާތާ މިހާރު ވަނީ 42 އަހަރު ވެފައެވެ. އޭނާ ވަނީ މި ރޮނގުން ދިވެހި ދައުލަތަށް ދިގު މުއްދަތަކަށް ޚިދުމަތްކުރުމުގެ އިނާމު ހާސިލްކޮށްފައެވެ. މިފަދަ ދާއިރާއަކަށް ދިގު މުއްދަތަކަށް ޚިދުމަތްކޮށްގެން ޝަރަފުވެރި އިނާމެއް ހާސިލްކުރުން ވެގެންދިޔައީ ގިނަ ބައެއްގެ ސަމާލުކަން ހުއްޓިގެން ދިޔަ ކަމަކަށެވެ.

މަގޫދޫ ހެލްތު ސެންޓަރާ މުފީދާ ގުޅުނީ 3 އޭޕްރީލް 1982 ގައި، އެ ސެންޓަރުގެ މަސައްކަތު މީހެއްގެ ވަޒީފާއަަށެވެ. އޭގެ ކުރިންވެސް ވަގުތީ މަސައްކަތްތެރިއެއްގެ ގޮތުގައި އޭނާ ވަނީ ހެލްތު ސެންޓަރުގައި މަސައްކަތްކޮށްފައެވެ.

މަސައްކަތު މުވައްޒަފެއްގެ ގޮތުގައި ހެލްތު ސެންޓަރަށް ދިގު މުއްދަތަކަށް ޚިދުމަތްކޮށްދީފައިވާއިރު، މުފީދާ ކިޔައިދިން ގޮތުގައި މިފަދަ ދާއިރާއަކުން ޝަރަފުވެރި އިނާމެއް ލިބޭނެ ކަމަށް އޭނާ އެއްވެސް ވަރަކަށް އުންމީދުވެސް ނުކުރެއެވެ. މި އިނާމު ލިބޭކަން އެންގުމަށް އިނާމު ކޮމިޓީން ގުޅި ހިސާބުން ވަރަށް އުފާވި ކަމަށް މުފީދާ ކިޔައިދިނެވެ. އަދި ރައީސުލްޖުމްހޫރިއްޔާގެ އަތްޕުޅުން މިފަދަ ޝަރަފުވެރި އިނާމެއް ލިބުނީތީ ވަރަށް އުފާވާ ކަމަށް މުފީދާ ކިޔައިދިނެވެ.

މުފީދާ ކިޔައިދިން ގޮތުގައި އޭނާ މަސައްކަތު މީހެއްގެ ގޮތުގައި ފ. އަތޮޅު ހެލްތު ސެންޓަރާ ގުޅުނީ އުމުރުން އެންމެ 20 އަހަރުއެވެ. އަދި މި ވަޒީފާގައި ދެމި ހުންނަތާ މިހާރު 42 އަހަރު ވެފައިވާކަމަށް އޭނާ ކިޔައިދިނެވެ. އަދިވެސް މުފީދާ ހުރީ ހެލްތް ސެންޓަރުގެ މަސައްކަތު މީހެއްގެ މަގާމުގައެވެ.

މުފީދާ ކިޔައިދިން ގޮތުގައި އޭނާ ކޮށްއުޅޭ މަސައްކަތަކީ އެއްޗެހި ދޮވެ، އިސްތިރިކުރުމެވެ. އެންމެ ފުރަތަމަ ހެލްތް ސެންޓަރާ ގުޅުނުއިރު، ޒަމާނީ ވަސީލަތްތަކެއް ނުހުންނާނެ ކަމަށް އޭނާ ބުންޏެވެ. އަދި އެއްޗެހި ދޮވެ އިސްތިރިކުރުމުގެ ހުރިހާ މަސައްކަތެއްވެސް ކުރީ އަތުން ކަމަށް މުފީދާ ކިޔައިދިނެވެ. މިހާރު އިތުރު ވަސީލަތްތައް ގާއިމްވެފައި ހުރި ނަމަވެސް މިހާރުވެސް ކުރަނީ ހަމަ މި މަސައްކަތް ކަމަށް މުފީދާ ބުންޏެވެ.

ދައުލަތަށް ޚިދުމަތްކުރުމަށް ގިނަ އަހަރުތަކެއް ހޭދަކޮށްފައިވާ މަސައްކަތްތެރިންގެ އަގު ވަޒަން ކުރުމަކީ ކޮންމެ ސަރުކާރަކުންވެސް ކުރާ ކަމެކެވެ. އެގޮތުން އެކި އެކި ޚާއްސަ ދުވަސްތަކުގައި އެ ފަރާތްތަކުގެ އަގު ވަޒަން ކުރަމުންދާއިރު، އާންމުގޮތެއްގައި އަގުވަޒަންކުރަނީ ޝަރަފުވެރި ދާއިރާތަކާއި، ވަޒީފާތަކުގައި ގިނަ ދުވަހު ޚިދުމަތްކޮށްދީފައިވާ މީހުންގެއެވެ.

މުފީދާ އަދާކުރަމުންދާފަދަ ވަޒީފާއަކުން މީހަކު ކޮށްދީފައިވާ ޚިދުމަތެއްގެ އަގުވަޒަންކުރި ވާހަކަ ވަރަށް ނީވެއެވެ. އެހެންނަމަވެސް މިފަދަ ޚަބަރެއް ލިބުމުން އެކި މީހުން އެކި މާނަ ނަގާނެއެވެ. އެކި މީހުންނަށް އެކި ގޮތްގޮތުން އިތުރަށް ހިތްވަރު ލިބިގެންދާނެއެވެ. ހަމަގައިމުވެސް މިކަމުން ދޭހަވާ އެއްކަމަކީ ކޮންމެ ވަޒިފާއަކީވެސް ޝަރަފުވެރި ވަޒީފާއެއްކަމެވެ. ކޮންމެ ވަޒީފާއަކުންވެސް ކުރިއަށްދެވޭ މިންވަރަކަށް ކުރިއަށްގޮސްގެން މިފަދަ ޝަރަފުވެރި އިނާމެއް ހާސިލްކުރުމުގެ ފުރުސަތު އޮތް ކަމެވެ. މަސައްކަތްކޮށްފިނަމަ މި ދުނިޔޭގައި ހާސިލްނުކުރެވޭނެ އެއްވެސް ކަމެއް ނޯންނާނެ ކަމެވެ.