ދައުލަތަށް ޙިދުމަތްކުރުމުގެ އިނާމަށް އެދި ހުށަހެޅުމުގެ ފުރުސަތު ހުޅުވާލައިފި
4 ޖުލައި 2022 | ހޯމަ 11:04މި ފުރުސަތު ހުޅުވާލައިފައިވަނީ 4 އޮގަސްޓް 2022 އާ ހަމައަށް
ދައުލަތަށް 50 އަހަރަށްވުރެ ދިގު މުއްދަތަށް ޚިދުމަތްކުރެއްވި ބޭފުޅެއް
ދިވެހި ދައުލަތަށް ދިގު މުއްދަތަކަށް ޚިދުމަތް ކޮށްފައިވާ ފަރާތްތަކަށް ދޭ އިނާމަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.
ރައީސުލްޖުމްހޫރިއްޔާގެ އޮފީހުން ހުޅުވާލި މި ފުރުސަތުގެ ދަށުން 4 އޮގަސްޓް 2022 ވަނަ ދުވަހުގެ މެންދުރު 3:00 އާ ހަމައަށް ފޯމު ހުށަހެޅޭނެއެވެ.
ދައުލަތަށް ޙިދުމަތް ކުރުމުގެ އިނާމަކީ ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ޚިދުމަތް ކޮށްފައިވާ މުވައްޒަފުންގެ ތެރެއިން މަގާމުގެ މަސްއޫލިއްޔަތު އަދާކުރުމުގައި ޤާބިލުކަމާއި އިހުލާސްތެރިކަމާއެކު ކޮށްފައިވާ ޚިދުމަތްތަކަށާއި، އެ މުއައްސަސާއެއްގެ ކުރިއެރުމަށް ކޮށްދީފައިވާ ޚިދުމަތްތަކުގެ އަގުވަޒަންކުރުމުގެ ގޮތުން ޤައުމީ ފެންވަރުގައި ރައީސުލްޖުމްހޫރިއްޔާ ދެއްވާ އެންމެ ޝަރަފުވެރި އިނާމެވެ. މި އިނާމް ލިބޭ ފަރާތްތައް ކަނޑައަޅާނީ ރައީސުލްޖުމްހޫރިއްޔާ އައްޔަންކުރައްވާފައިވާ "ޤައުމީ އިނާމާ ބެހޭ ކޮމިޓީ" އިންނެވެ.
ދިވެހި ދައުލަތަށް ޚިދުމަތް ކުރުމުގެ އިނާމު ގެ ގޮތުގައި ރައީސުލްޖުމްހޫރިއްޔާ ދެއްވާނީ، އައްޑަނައަކާއި، ޝަރަފުގެ ބެޖަކާއި، ހަނދާނީ ލިޔުމެކެވެ.
މި އިނާމް ދޭނީ ދައުލަތުގެ މުއައްސަސާއެއްގައި ނުވަތަ ސަރުކާރުގެ ކުންފުންޏެއްގައި ނުވަތަ ސަރުކާރުގެ މެޖޯރިޓީ ހިއްސާ އޮތް ކުންފުންޏެއްގައި ޚިދުމަތްކުރި ނުވަތަ ޚިދުމަތްކުރަމުން އަންނަ މުވައްޒަފެއްގެ ނަން، އެ މުއައްސަސާއަކުން ނުވަތަ އެ ކުންފުންޏަކުން ނުވަތަ އެހެން ފަރާތަކުން ނުވަތަ އެ މުވައްޒަފު އަމިއްލައަށް އިނާމަށް ނަން ހުށަހެޅުމުންނެވެ. މުއައްސަސާއަކުން ނުވަތަ ކުންފުންޏަކުން މި އިނާމަށް ނަން ހުށަހަޅާނަމަ، އެ މީހަކީ އެ މުއައްސަސާއެއްގައި ނުވަތަ އެ ކުންފުންޏެއްގައި ޚިދުމަތްކުރި، ނުވަތަ ޚިދުމަތް ކުރަމުންގެންދާ މީހަކަށް ވާން ޖެހޭނެ ކަމަށް ރައީސް އޮފީހުން މައުލޫމާތު ދީފައިވެއެވެ.
ދައުލަތަށް ޚިދުމަތް ކުރުމުގެ އިނާމް ދިނުމުގައި ކޮމިޓީން ބަލާނީ ނަން ހުށަހަޅާ ފަރާތަކުން މަގާމުގެ މަސްއޫލިއްޔަތު އަދާކުރުމުގައި ޤާބިލުކަމާއި، ފަރުވާތެރިކަމާއި، އިހުލާސްތެރިކަމަށެވެ. އަދި އެމީހަކަށް ލިބިފައިވާ ޤާބިލުކަމުގެ ބޭނުންކޮށްގެން މުޅި މުއައްސަސާގެ ކުރިއެރުމަށް ކޮށްފައިވާ ފާހަގަ ކޮށްލެވޭ ހާއްސަ މަސައްކަތް ތަކަށާއި މުައްސަސާއިން ހިންގާފައިވާ އެކިއެކި ކަންކަމުގައި އަމަލީ ގޮތުން ބައިވެރިވެ، ޚިދުމަތް ކޮށްފައިވާ މިންވަރަށް ވެސް ބަލާނެއެވެ.
މީގެ އިތުރުން ވަޒީފާގެ ދައިރާއިން ހާސިލުކޮށްފައިވާ ކާމިޔާބީ އަށާއި އެ މީހެއްގެ މައްޗަށް މަދަނީ ކުށެއްގެ ތުހުމަތެއް ނުވަތަ ޖިނާއީ ކުށެއްގެ ތުހުމަތެއް ކުރެވިފައިވޭތޯ ވެސް އިނާމް ދިނުމުގައި ބަލާނެއެވެ.
ދިވެހި ދައުލަތަށް ޚިދުމަތް ކުުމުގެ އިނާމް މިދިޔަ އަހަރު 117 ފަރާތަކަށް ވަނީ ދީފައެވެ. މީގެ ތެރޭގައި 32 އަންހެނުންނާއި 85 ފިރިހެނުން ހިމެނެއެވެ. އަދި ދައުލަތަށް 50 އަހަރަށްވުރެ ގިނަ ދުވަހު ޚިދުމަތް ކޮށްދެއްވާފައިވާ 5 ބޭފުޅަކުވެސް މީގެ ތެރޭގައި ހިމެނެއެވެ.
