ހައިކޯޓުގެ ވަކިވަކި ގޮފިތައް އުވާލުމާ ގުޅޭ ބިލު މަޖިލީހަށް ފޮނުވަނީ
މިދައުރަށް 32 ބިލެއް ހުށަހަޅާނެކަމަށް އޭޖީ އޮފީހުން ވަނީ ބުނެފައި
ހައި ކޯޓު- ކޯޓުތަކުގެ ޤާނޫނަށް ގެންނަ އިސްލާޙުގައި ހައިކޯޓުގެ ވަކިވަކި ގޮފިތައް އުވާލުމާ ގުޅޭ ބިލު ހިމެނޭ
ސަރުކާރުގެ ފަރާތުން ރައްޔިތުންގެ މަޖިލީހަށް ފޮނުވުމަށް 4 ބިލެއް ރައީސް އޮފީހަށް ފޮނުވާފައިވާކަމަށް އެޓަރނީ ޖެނެރަލް (އޭޖީ) އޮފީހުން ބުނެފައިވާއިރު، އޭގެ ތެރޭގައި ދިވެހިރާއްޖޭގެ ހައިކޯޓުގެ ވަކިވަކި ގޮފިތައް އުވާލުމާ ގުޅޭ ބިލު ވެސް ހިމެނޭކަމަށް އޭޖީ އޮފީހުން މިއަދު ބުނެފިއެވެ.
ސަރުކާރުން މަޖިލީހަށް ހުށަހެޅުމަށް ފޮނުވަން ތައްޔާރުވަމުންދާ ބިލުތަކަކީ ކޯޓުތަކުގެ ގާނޫނަށް އިިސްލާހު ގެނައުމުގެ ބިލާއި، ނެތިދިޔުމުގެ ބިރުހީވެފައިވާ ދިރޭތަކެތީގެ ބައިނަލްއަޤްވާމީ ވިޔަފާރިކުރުމުގެ ބިލާއި، ފެނާއި ނަރުދަމާގެ ގާނޫނަށް އިިސްލާހު ގެނައުމުގެ ބިލާއި އަދި ފަނޑިޔާރުންގެ ގާނޫނަށް އިިސްލާހު ގެނައުމުގެ ބިލެވެ.
އެކަމުގެ ތަފްސީލު ހިއްސާކުރަމުން އޭޖީ އޮފީހުން ބުނީ، ކޯޓުތަކަށް އިސްލާޙު ގެނައުމުގެ ބިލަކީ ދިވެހިރާއްޖޭގައި ޤާއިމުވެފައިވާ ޢަދުލުއިންޞާފުގެ ނިޒާމުގައި ހިމެނޭ ޝަރުޢީ ކޯޓުތަކާއި އެ ކޯޓުތަކުން ހިންގާ ޝަރީޢަތްތައް ހިނގަމުންދަނީ އެ ނިޒާމުގައި ކަންކަން ތަރުތީބު ކުރެވިފައިވާ ހަމަތަކާ އެއްގޮތްވާ ގޮތުގެމަތިން، އަދި އެ ކޯޓުތަކަށް ކަނޑައެޅިފައިވާ އިޚްތިޞާޞާއި ބާރުގެ ދާއިރާގެ ތެރޭގައިކަން ކަށަވަރު ކުރުމަށްޓަކައި، ޤާނޫނު ނަންބަރު 2010/22 (ދިވެހިރާއްޖޭގެ ކޯޓުތަކުގެ ޤާނޫނު) އަށް ގެންނަންޖެހޭ އިޞްލާޙުތައް ގެނައުމާ ގުޅޭ ބިލެކެވެ.
އޭގެ އިތުރުން، މިއީ ކޯޓުތަކުން ނިންމާ ނިންމުންތައް އިސްތިއުނާފުކުރުމަށް މައްސަލައާ ގުޅުންހުރި ފަރާތްތަކަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 56 ވަނަ މާއްދާއިން ކަށަވަރު ކޮށްދީފައިވާ އަސާސީ ޙައްޤު އޭގެ އެންމެ ފުރިހަމަ ގޮތުގައި ލިބިދިނުމަށްޓަކައި، ކަމާގުޅޭ އުސޫލުތައް ކުރިއެކޭ ވެސް އެއްފަދައިން ޤާނޫނުގައި ކަނޑައެޅުމަށްޓަކައި އެ ޤާނޫނަށް ގެންނަންޖެހޭ އިޞްލާޙުތައް ގެނައުމަށާއި، ދިވެހިރާއްޖޭގެ އުތުރާއި ދެކުނުގައި ޤާއިމުކޮށްފައިވާ ދިވެހިރާއްޖޭގެ ހައިކޯޓުގެ ވަކިވަކި ގޮފިތައް އުވާލުމަށާއި، ކޯޓުތަކުގެ ހިންގުން ހަރުދަނާ ކުރުމަށްޓަކައި އެ ޤާނޫނަށް ގެންނަންޖެހޭ އެނޫން ވެސް އިޞްލާޙުތައް ގެނައުމަށް ހުށައަޅާ ބިލެއްކަން ވެސް އޭޖީ އޮފީހުން ފާހަގަކުރެއެވެ.
ދިވެހިރާއްޖޭގެ ހައިކޯޓުގެ އުތުރު ގޮތްޕާއި، ދެކުނު ގޮފި ޤާއިމްކުރުމަށް ކޯޓުތަކުގެ ޤާނޫނަށް އިސްލާޙު ގެނައީ 2014 ވަނަ އަހަރުއެވެ.
އޭޖީ އޮފީހުން ބުނީ، ދިވެހިރާއްޖޭގެ ފަނޑިޔާރުންގެ ޤާނޫނަށް ގެންނަންޖެހޭ އިޞްލާޙުތައް ގެނައުމަށް ހުށަހަޅާ ބިލަކީ ވިހެއުމާ ގުޅިގެން ނުވަތަ ދަރިއަކު ލިބުމާ ގުޅިގެން ފަނޑިޔާރުންނަށް ލިބިދެވޭ ޗުއްޓީއަކީ އެކަށީގެންވާ މުއްދަތަކަށް ލިބިދެވޭ ޗުއްޓީއެއް ކަމުގައި ކަނޑައެޅުމަށްޓަކައި ހުށަހަޅާ ބިލެއް ކަމަށެވެ.
އޭގެ އިތުރުން، ނެތިދިޔުމުގެ ބިރުހީވެފައިވާ ދިރޭ ތަކެތީގެ ބައިނަލްއަޤްވާމީ ވިޔަފާރި ކުރުމުގެ ބިލަކީ ދިވެހިރާއްޖެއިން ބައިވެރިވެފައިވާ، ނެތިދިޔުމުގެ ބިރު ހީވެފައިވާ ދިރޭ ތަކެތީގެ ވިޔަފާރިއާބެހޭ ބައިނަލްއަޤްވާމީ މުޢާހަދާގައި ބަޔާންކޮށްފައިވާ ކަންކަން ތަންފީޛު ކުރުމަށްޓަކައި، ދެމެހެއްޓެނިވި ގޮތެއްގައި ނޫން ގޮތަކަށް ކުރާ ބައިނަލްއަޤްވާމީ ވިޔަފާރީގެ ސަބަބުން، ނެތި ދިޔުމުގެ ބިރު ހީވެފައިވާ އަދި ނެތި ދިޔުމުގެ ނުރައްކާ ކުރިމަތިވެފައިވާ އަދި އެކްސްޕްލޮއިޓްކުރެވޭ ޖަނަވާރާއި ގަސްގަހާގެއްސާއި، އެ އެއްޗެހީގެ ބައިތަކާއި އުފެއްދުންތައް ޙިމާޔަތްކޮށް ދެމެހެއްޓުމަށްޓަކައި، އެ ތަކެތީގެ ވިޔަފާރިކުރުމާއި، އެތަކެތި އެއް ތަނުން އަނެއް ތަނަށް ގެންދިއުމާގުޅޭ އުސޫލުތައް ކަނޑައެޅުމަށް ހުށަހަޅާ ބިލެކެވެ.
ސަރުކާރުން ހުށައަޅާ 4 ބިލުގެ ތެރޭގައި ، ފެނާއި ނަރުދަމާގެ ޤާނޫނު ތަންފީޛުކުރުމުގައި މިނިސްޓްރީ އޮފް އެންވަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީއާއި، ޔުޓިލިޓީ ރެގިއުލޭޓަރީ އޮތޯރިޓީއަށް ދިމާވާ ބައެއް އިދާރީ ދަތިތައް ހައްލުކުރުމަށާއި، ފެނާއި ނަރުދަމާގެ ޚިދުމަތް ދިނުމުގެ ނިޒާމު އިތުރަށް ހަރުދަނާ ކުރުމަށްޓަކައި، ޤާނޫނު ނަންބަރު 2020/8 (ފެނާއި ނަރުދަމާގެ ޤާނޫނު) އަށް ގެންނަންޖެހޭ އިޞްލާޙުތައް ގެނައުމަށް ހުށަހަޅާ ބިލު ވެސް ހިމެނެއެވެ.
ރައްޔިތުންގެ މަޖިލީހުގެ ހިނގަމުން މިދާ ތިން ވަނަ ދައުރަށް 32 ބިލެއް ހުށަހެޅުމަށް ހަމަޖެހިފައި ވާކަމަށް އޭޖީ އޮފީހުން ވަނީ ކުރިން ބުނެފައެވެ. އޭގެ ތެރޭގައި ގާނޫނީ އަދި ޝަރުއީ ދާއިރާއާއި ގުޅުންހުރި ބިލުތަކާއި ދީނީ އަދި އިޖްތިމާއީ ދާއިރާއާ ގުޅޭ ބިލުތަކާއި އިޤްތިޞާދީ އަދި ތިމާވެށީގެ ދާއިރާއާ ގުޅޭ ބިލުތައް ހިމެނެއެވެ.
އޭގެތެރެއިން މިދައުރަށް ހުށަހަޅާފައިވާ ބިލްތަކުގެ ތެރޭގައި; ހެއްކާބެހޭ ބިލާއި، ކާބޯތަކެތީގެ ރައްކާތެރިކަމުގެ ބިލާއި އިލެކްޓްރޯނިކް މުއާމަލާތް ކުރުމާ ބެހޭ ބިލާއި ގާނޫނުލް އުގޫބާތަށް އިސްލާހު ގެނައުމަށް، ހުށަހަޅާފައިވާ ބިލް ހިމެނެއެވެ.
