މިނިމަމް ވޭޖުގެ ސަބަބުން 60 އިންސައްތައަށްވުރެ ގިނަ ރިސޯޓު މުވައްޒަފުންގެ މުސާރަ ޑަބަލް ވެގެންދާނެ ކަމަށް އިކޮނޮމިކް މިނިސްޓަރ ފައްޔާޒް އިސްމާޢީލް ވިދާޅުވެއްޖެއެވެ.

މިނިސްޓަރ މިފަދައިން ވިދާޅުވީ, ހޯމަ ދުވަހު މިނިމަމް ވޭޖް ކަނޑައަޅައި އިއުލާނުކުރެއްވުމަށްފަހު ދެއްކެވި ވާހަކަފުޅުގައެވެ. މިނިސްޓަރ ވިދާޅުވީ މިނިމަމް ވޭޖްގެ ހެޔޮ އަސަރު ފަތުރުވެރިކަމުގެ ދާއިރާގައި މަސައްކަތްކުރާ ގާތްގަނޑަކަށް 16،000 މުވައްޒަފުންގެ ތެރެއިން 13،000 މުވައްޒަފުންނަށް ކޮށްފައިވާކަމަށެވެ.

މިނިސްޓަރ ވިދާޅުވީ އެކި ރިސޯޓުތަކުގައި ހުރި ތަފާތުތައް ދެނެގަތުމަށް މިކަމަށް އިތުރަށް ބަލައިލުމުން, އެއް ރިސޯޓު އަނެއް ރިސޯޓާ ވަރަށް ތަފާތުކަން އެނގިގެންދިޔަކަމަށެވެ. އެގޮތުން ރިސޯޓު މުވައްޒަފުންގެ ތެރޭގައި މަހަކު 2 ލައްކަ ނޫނީ 1 ލައްކަަ ރުފިޔާ މުސާރައިގެ ގޮތުގައި ގެއަށް ގެންދާ މީހުން އެބަތިބި ކަމަށެވެ. އެވްރެޖްކޮށް, މި ސިނާއަތުގައި މަސައްކަތްކުރާ މީހުންނަށް މުސާރައިގެ ގޮތުގައި ލިބެނީ 7،000 ރުފިޔާ ނުވަތަ 8،000 ރުފިޔާ ކަމަށް މިނިސްޓަރ ވިދާޅުވިއެވެ. އަދި 4،000 ރުފިޔާއާ 5،000 ރުފިޔާއާ ދެމެދުގެ އަދަދެއް, ނުވަތަ މިއަށްވުރެ ދަށް އަދަދެއް މުސާރައިގެ ގޮތުގައި ލިބޭ މީހުން ވެސް އެބަތިބި ކަމަށް މިނިސްޓަރ ފައްޔާޒް ވިދާޅުވިއެވެ. މިއީ ރަނގަޅު އަދަދެއް ކަމުގައި ނުފެންނަކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ މިނިމަމް ވޭޖާއެކު, ރިސޯޓުތަކުގައި މަސައްކަތްކުރާ 60 އިންސައްތައަށްވުރެ ގިނަ މުވައްޒަފުންގެ މުސާރަ ޑަބަލް ވެގެންދާނެ ކަމަށެވެ. އަދި މިނިމަމް ވޭޖު ކަނޑައެޅުމުން, ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންގެ މުސާރައަށް ވަރަށް ރަނގަޅު ހެޔޮ ބަދަލެއް އަންނާނެކަން މިނިސްޓަރ ފާހަގަކުރެއްވިއެވެ.

ރިސޯޓު މުވައްޒަފުންނަށް ދެވޭ އެންމެ ކުޑަ އުޖޫރައިގެ ގޮތުގައި ކަނޑައަޅާފައިވަނީ 8،000 ރުފިޔާއެވެ. މިއީ ރިސޯޓު މުވައްޒަފުން ކުރާ މަސައްކަތާ އަޅައި ބަލާއިރު އެކަށީގެންވާ އަދަދެއް ނޫންކަމަށްބުނެ ރިސޯޓުތަކުގައި މަސައްކަތްކުރާ ގިނަ އަދަދެއްގެ މުވައްޒަފުން ގެންދަނީ މިކަމުގެ ކަންބޮޑުވުން ފާޅުކުރަމުންނެވެ.