އިންޑިއަން ރުޕީސް އިން ފައިސާ ދައްކާ ގެސްޓު މީހާ އަށް ވެސް 500 ޑޮލަރު މާރު ކުރަން ޖެހޭނެތަ؟
ނޮވެމްބަރު 21 ވަނަ ދުވަހު އިންޑިއާ ގައި އެމްއެމްއޭގެ ގަވަރުނަރު އަޙްމަދު މުނައްވަރު އާއި އާރްބީއައިގެ ގަވަރުނަރު ޝަކްތިކާންތާ ދާސް ސޮއިކުރެއްވި މި އެއްބަސްވުމުގެ މަގްސަދުތަކުގެ ތެރޭގައި އެމެރިކާ ޑޮލަރަށް ބަރޯސާ ނުވެ، ދެ ގައުމުގެ ވިޔަފާރީގެ މުއާމަލާތްތައް ހިންގުން ހިމެނޭކަން ވަނީ ހާމަ ކޮށްފައެވެ.
ރާއްޖޭގެ ރިސޯޓެއްގެ އޯވަރ ވޯޓަރ ޖެޓީއެއްގެ މަތީގައި އިންޑިއާ މީހަކު ބައިސްކަލު ދުއްވަނީ
ދިވެހިރާއްޖެ އާއި އިންޑިއާ ދެމެދު އެ ގައުމެއްގެ ފައިސާ އިން ވިޔަފާރީގެ މުޢާމަލާތްތައް ކުރެވޭނެ އެއްބަސްވުމެއްގައި ސޮއިކުރުމާއެކު، އިންޑިއަން ރުޕީސް އިން ފައިސާ ދައްކައިގެން އަންނަ ފަތުރުވެރިޔާ އަށް ވެސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޭރު ފައިސާގެ ގަވައިދުގެ ދަށުން 500 ޑޮލަރު މާރުކުރަން ޖެހުމަކީ ތާކުންތާކުން ނުޖެހޭ ކަމެއް ކަމަށް ދާއިރާގެ ތަޖުރިބާކާރަކު ބުނެފިއެވެ.
ނަން ހާމަކުރަން ބޭނުން ނުވާ ފަތުރުވެރިކަމުގެ ދާއިރާގެ ތަޖުރިބާކާރަކު، އެމްއެމްއޭ އާއި ރިޒާވް ބޭންކް އޮފް އިންޑިއާ (އާރްބީއައި) އާ ދެމެދު މުންބާއީގައި ސޮއިކުރި މެމޮރެންޑަމް އޮފް އަންޑަސްޓޭންޑިންގ (އެމްއޯޔޫ) އަށް ހަވާލާދީ މި ނޫހާ ވާހަކަ ދައްކަމުން ބުނި ގޮތުގައި އެމްއެމްއޭ އިން ފަތުރުވެރިކަމުގެ ދާއިރާ އަށް އަމާޒުކޮށް އާންމު ކުރި ގަވައިދުގައިވާ ގޮތުން، އެއްވެސް އިސްތިނާ އެއް ނެތް ގޮތައް، ރިސޯޓަށް އަންނަ ކޮންމެ ފަތުރުވެރިއަކަށް 500 ޑޮލަރު މާރު ކުރަން ޖެހޭނެ ކަމަށް ބުނެފައިވާއިރު، މިފަދަ އެއްބަސްވުންތަކަށް ވިސްނާފައިވެސް ނެތް ކަމަށެވެ.
ނޮވެމްބަރު 21 ވަނަ ދުވަހު އިންޑިއާ ގައި އެމްއެމްއޭގެ ގަވަރުނަރު އަޙްމަދު މުނައްވަރު އާއި އާރްބީއައިގެ ގަވަރުނަރު ޝަކްތިކާންތާ ދާސް ސޮއިކުރެއްވި މި އެއްބަސްވުމުގެ މަގްސަދުތަކުގެ ތެރޭގައި އެމެރިކާ ޑޮލަރަށް ބަރޯސާ ނުވެ، ދެ ގައުމުގެ ވިޔަފާރީގެ މުއާމަލާތްތައް ހިންގުން ހިމެނޭކަން ވަނީ ހާމަ ކޮށްފައެވެ.
މި އެއްބަސްވުމާ ބެހޭ ގޮތުން އާރްބީއައި އިން ނެރުނު ބަޔާނުގައި ބުނެފައިވަނީ ކަރަންޓް އެކައުންޓް މުޢާމަލާތްތަކާއި، ހުއްދަ ދެވިފައިވާ ކެޕިޓަލް އެކައުންޓް މުޢާމަލާތްތަކާއި، އަދި ދެ ގައުމުން އެއްބަސްވާ އެހެނިހެން އިޤްތިޞާދީ އަދި މާލީ މުޢާމަލާތްތަކުގައި އިންޑިއަން ރުފިޔާ އަދި ދިވެހި ރުފިޔާ ބޭނުންކުރުމަށް މި އެމްއޯޔޫގެ ސަބަބުން މަގުފަހިވާނެ ކަމުގައެވެ.
އެމްއޯޔޫގެ ދަށުން އެކުލަވާލާފައިވާ އޮނިގަނޑުގެ ސަބަބުން އެކްސްޕޯޓަރުންނާއި އިމްޕޯޓަރުންނަށް އެ މީހުންގެ އަމިއްލަ ގައުމުގެ ފައިސާއިން އިންވޮއިސްކޮށް އަދި ފައިސާ ދެއްކުމަށް މަގުފަހިވެގެންދާނެ ކަމަށްވެސް ބުނެފައިވެއެވެ. މީގެ ސަބަބުން ބޭރު ފައިސާގެ މާރުކޭޓުގައި އިންޑިއަން ރުޕީސް އާއި ދިވެހި ރުފިޔާ ގެ ވިޔަފާރި ތަރައްޤީވުމަށް މަގުފަހިވެގެންދާނެ ކަމަށްވެސް ބުނެފައިވެއެވެ.
މި އެއްބަސްވުމަކީ އިންޑިއާގެ ރިޒާވް ބޭންކާއި މޯލްޑިވްސް މަނިޓަރީ އޮތޯރިޓީގެ ދެމެދުގައި އޮންނަ ގުޅުން ބަދަހިކުރުމުގައި މުހިންމު މަރުޙަލާއެއް ކަމަށާއި ދެ ގައުމުގެ މުޢާމަލާތްތަކުގައި އެ ގައުމުތަކުގެ ފައިސާ ބޭނުން ކުރުމުގެ ސަބަބުން އިންޑިއާ އާއި ދިވެހިރާއްޖެއާ ދެމެދު ހިންގޭ ވިޔަފާރި ކުރިއެރުވުމަށާއި، މާލީ ގުޅުން ބަދަހި ކުރުމަށާއި، އަދި އިންޑިއާ އާއި ދިވެހިރާއްޖެއާ ދެމެދު އޮންނަ އިޤްތިޞާދީ ގުޅުން ވަރުގަދަކުރުމަށް މަގުފަހިވެގެންދާނެ ކަމަށްވެސް ބަޔާނުގައި ބުނެފައިވެއެވެ.
މިއަހަރުގެ ސެޕްޓެމްބަރު މަހުގެ ނިޔަލަށް އިންޑިއާ އިން ރާއްޖެއަށް 90,389 ފަތުރުވެރިން ޒިޔާރަތް ކޮށްފައިވެއެވެ.
