"އެމްއެންޑީއެފްގެ ޕައިލެޓުން އަސްކަރީ އެއަރކްރާފްޓް ދުއްވަން ފެށުމަކީ ތާރީޚީ، އުފާވެރި ކަމެއް"
މިއީ ސިފައިންނަށް ވެސް ލިބުނު ކުރިއެރުމެއް ކަމަށް ވިދާޅުވި
އަސްކަރީ މަތިންދާބޯޓު ދުއްވުމުގައި، ދިވެހި ސިފައިންގެ ޕައިލެޓުން ހަރަކާތްތެރިވާން ފެށުން
ޑޯނިއަރ އެއަރކްރާފްޓުގެ އެހީގައި ފާއިތުވި ދުވަސްތަކުގައި މުހިއްމު އޮޕަރޭޝަންތަކެއް ކުރިއަށް ގެންދެވިފައިވާކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
އަސްކަރީ މަތިންދާބޯޓު ދުއްވުމުގައި، ދިވެހި ސިފައިންގެ ޕައިލެޓުން ހަރަކާތްތެރިވާން ފެށުމާ ގުޅިގެން ބޭއްވި ރަސްމިއްޔާތުގައި ވާހަކަދައްކަވަމުން ޝަމާލް ވިދާޅުވީ، މިއީ ސިފައިންނަށް ވެސް ލިބުނު ކުރިއެރުމެއް ކަމަށެވެ. އަދި މިއީ ތާރީޚީ ވަގުތެއް ކަމަށާއި، ޕައިލެޓުން ތަމްރީނުކުރުމަށް އެމްއެންޑީއެފުން ގިނަ މަސައްކަތްތަކެއް ކޮށްފައިވާ ކަމަށް ޝަމާލް ވިދާޅުވިއެވެ. ވަކިން ޚާއްސަކޮށް، މިކަމުގައި އިންޑިއާގެ އަސްކަރިއްޔާއިން ވެދިން އެހީތެރިކަން ފާހަގަކުރައްވައި ޝަމާލް ވަނީ އިންޑިއާއަށް ޝުކުރު އަދާ ކުރައްވާފައެވެ.
އޭގެ އިތުރުން، އިންޑިއާއިން ފޯރުކޮށްދީފައިވާ އެއަރކްރާފްޓްތަކުގެ އެހީގައި މުހިއްމު ގިނަ އޮޕަރޭޝަންތަކެއް ކުރިއަށް ގެންދެވިފައިވާކަން ވެސް ޝަމާލް ފާހަގަކުރެއްވިއެވެ. އެގޮތުން ކަނޑުމަތިން މީހުން ހޯދުމުގެ އެކި އޮޕަރޭޝަންތަކާއި، ސިއްޙީ ގޮތުން އެއްތަނުން އަނެއްތަނަށް ގެންދަން ޖެހޭ މީހުން އުފުލުމާއި، ރާއްޖޭގެ ކަނޑުގެ ސަރަޙައްދު ބެލެހެއްޓުން ފަދަ ކަންކަމުގައި އެއަރކްރާފްޓުގެ ބޭނުންތެރިކަން ޝަމާލްގެ ވާހަކައިގައި ފާހަގަކުރެއްވިއެވެ.
ޝަމާލް ވަނީ ޚިދުމަތަށް ގުޅިވަޑައިގެން ދެ ޕައިލެޓުންނަށް ވެސް ކާމިޔާބަށް އެދިވަޑައިގެންފައެވެ. އެ ދެ ޕައިލެޓުންނަކީ އެމްއެންޑީއެފްގެ ފަސްޓް ލެފްޓިނެންޓް އިބްރާހިމް ޝަރީފްއާއި، ލެފްޓިނެންޓް އަހުމަދު އަލީއެވެ.
އެމްއެންޑީއެފުން މައުލޫމާތު ދޭ ގޮތުގައި 2010 ވަނަ އަހަރުން ފެށިގެން 2021 ވަނަ އަހަރުގެ އޮކްޓޯބަރު މަހާ ހަމައަށް 363 ބަލިމީހުން އުފުލުމަށް ޑޯނިއަރ އެއަރކްރާފްޓް ބޭނުންކޮށްފައިވެއެވެ. އަދި ކަނޑުމަތީގައި ހާލުގައި ޖެހުނު މީހުންގެ ފުރާނަޔާއި މުދާ ރައްކާތެރި ކުރުމަށް ޚާއްސަކޮށްގެން 77 އޮޕަރޭޝަނެއް ހިންގާފައިވެއެވެ. އަދި 121 ސަރވައިލެންސް އޮޕަރޭޝަންސް ހިންގައި، ގިނަ އަދަދެެއްގެ މަސްތުވާތަކެތި ވެސް އަތުލައިގެންފައިވެއެވެ.
