ރައްޔިތުންގެ މަޖިލީހަށް މިހާރު ހުށަހަޅާފައިވާ އަންނަ އަހަރަށް ލަފާކުރާ ދައުލަތުގެ ބަޖެޓަށް ބަހުސްކުރުން ކުރިޔަށްދާނީ މިހަފުތާގައި ކަމަށް ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲ ވިދާޅުވެއްޖެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓް ފިނޭންސް މިނިސްޓަރ އިބްރާހީމް އަމީރު ރައްޔިތުންގެ މަޖިލީހަށް ހުށަހަޅުއްވާފައިވަނީ އޮކްޓޯބަރ މަހުގެ 31 ވަނަ ދުވަހުއެވެ. އަދި ބަޖެޓަށް ބަހުސްކުރަން ފަށާފައިވަނީ ހޯމަ ދުވަހުއެވެ. ހޯމަ ދުވަހުގެ ޖަލްސާ ފައްޓަވަމުން, ރިޔާސަތުގައި އިންނެވި މަޖިލީހުގެ ނައިބު ރައީސް ވިދާޅުވީ ބަޖެޓަށް ބަހުސްކުރުން ކުރިޔަށްދާނީ މިހަފުތާގެ ހޯމަ، އަންގާރަ އަދި ބުދަ ދުވަހުކަމަށެވެ. އަދި ބަޖެޓަށް ބަހުސްކުރުމަށް މެމްބަރުން އެދިވަޑައިގަންނަވާ މިންވަރަކުން, ރޭގަނޑާއެކު ވެސް, ޖަލްސާތައް ކުރިޔަށް ގެންދަވާނެކަމަށް އީވާ ވިދާޅުވިއެވެ.

އަދި ބަޖެޓަށް ބަހުސްކުރައްވަން ބޭނުންފުޅުވާ މެމްބަރުން, އަންގާރަ ދުވަހުގެ 12 ޖެހުމުގެ ކުރިން ފުރުސަތަށް އެދިވަޑައިގަތުމަށް އީވާ ވިދާޅުވިއެވެ. ބަޖެޓްގެ ބަހުސް މަރުހަލާގައި ކޮންމެ މެމްބަރަކަށްވެސް 15 މިނެޓްގެ ވަގުތުކޮޅެއް, ބަހުސްކުރުމަށް ލިބިވަޑައިގަންނަވާނެއެވެ. އަދި ރައްޔިތުންގެ މަޖިލީހުގެ ގަވާއިދުގެ 213 ވަނަ މާއްދާގެ ށ ގައިވާ ގޮތުގެ މަތިން, ބަޖެޓް ބަހުސްގައި މެމްބަރުން ފާހަގަކުރައްވާ ކަންތައްތަކަށް ޖަވާބުދާރީވުމަށް ފިނޭންސް މިނިސްޓަރަށް 45 މިނެޓް ލިބިވަޑައިގަންނަވާނެއެވެ.

ބަޖެޓް ދިރާސާކުރާ ކޮމިޓީން ބަޖެޓް ދިރާސާކުރުމަށްފަހު ތަޅުމަށް ހުށަހަޅާ ރިޕޯޓަށް ބަހުސްކުރުމަށް މެމްބަރުންނަށް ލިބިވަޑައިގަންނަވާނީ 7 މިނެޓެވެ. ބަޖެޓް ދިރާސާކުރުމަށް ކޮމިޓީއަށް ދީފައިވަނީ ނޮވެމްބަރ މަހުގެ 22 ވަނަ ދުވަހާ ހަމައަށެވެ. އެއަށްފަހު ބަޖެޓްގެ ކޮމިޓީ ރިޕޯޓަށް, ތަޅުމުގައި ބަހުސްކުރެވެމުންދާނެއެވެ. އަދި ނޮވެމްބަރު މަސްތެރޭގައި ބަޖެޓް ފާސްކުރާނެއެވެ.

ބަޖެޓް ދިރާސާކުރާ ކޮމިޓީގެ މުޤައްރިރަކީ ކިނބިދޫ ދާއިރާގެ މެމްބަރު މުޙައްމަދު ނާޝިޒެވެ. ކޮމިޓީގެ ނައިބު މުޤައްރިރަކަށް ކަނޑައަޅާފައިވަނީ އަލިފުށީ ދާއިރާގެ މެމްބަރު މުޙައްމަދު ރަޝީދު ޙުސައިނެވެ.

ބަޖެޓް ކޮމިޓީގެ ބައްދަލުވުމުގައި ވަނީ ރައްޔިތުންގެ މަޖިލީހުގެ ގަވާއިދުގެ 212 ވަނަ މާއްދާގެ (ށ)ގައި ބަޔާންކޮށްފައިވާ ގޮތުގެ މަތިން, ބަޖެޓު ދިރާސާކުރުމުގައި, މޯލްޑިވްސް މަނިޓަރީ އޮތޯރިޓީގެ ގަވަރުނަރާއި އޮޑިޓަރ ޖެނެރަލްގެ ލަފާ ހޯދުމަށް ސިޓީ ފޮނުވުމަށް ކޮމިޓީގެ އިއްތިފާޤުން (17 ވޯޓުން) ނިންމަވާފައެވެ. އަދި، މިނިވަން މުއައްސަސާތަކަށް 2022 ވަނަ އަހަރަށް ކަނޑައަޅާފައިވާ ބަޖެޓާ ގުޅޭގޮތުން, އެ މުއައްސަސާތަކުގެ ޚިޔާލު ހޯއްދެވުމަށް 5 ދުވަހުގެ މުހުލަތެއް ދެއްވައި, 8 ނޮވެމްބަރު ވާ ހޯމަ ދުވަހުގެ 12:00ގެ ކުރިން ލިޔުމުން ޖަވާބުދެއްވުމަށް ސިޓީ ފޮނުވުމަށް ނިންމެވިއެވެ. އެ މުއައްސަސާތަކުން ފޮނުއްވާ ޚިޔާލުތަކަށް ރިޢާޔަތްކުރުމަށްފަހު މިނިސްޓަރ އޮފް ފިނޭންސް އާ ބައްދަލުކުރެއްވުމަށްވެސް ކޮމިޓީގެ ބައްދަލުވުމުގައި ވަނީ ނިންމަވާފައެވެ.

އަންނަ އަހަރަށް ލަފާކޮށް ދައުލަތުން ހުށަހަޅާފައިވަނީ 36.9 ބިލިއަން ރުފިޔާގެ ބަޖެޓެކެވެ. ޚަރަދުގެ ގޮތުގައި ހިނގާނެކަމަށް ބެލެވެނީ 34.0 ބިލިއަން ރުފިޔާއެވެ. ބަޖެޓާއި ޚަރަދާ ހުރި ތަފާތުގެ ބޮޑު ބައެއް ހިއްސާކުރަނީ، ދައުލަތުގެ ދަރަނި އަދާކުރުމަށް ދައްކާ 2.9 ބިލިއަން ރުފިޔާއަށެވެ. 2022 ވަނަ އަހަރު, ޖުމުލަ އާމްދަނީއާއި ހިލޭ އެހީގެ ގޮތުގައި ދައުލަތަށް ލިބޭނެކަމަށް އަންދާޒާކުރެވެނީ 24.3 ބިލިއަން ރުފިޔާއެވެ. ބަޖެޓަކީ 9.7 ބިލިއަން ރުފިޔާގެ ޑެފިސިޓް ބަޖެޓެކެވެ.