އަލީ ވަހީދު ހާޒިރު ނުވުމުން ސުޕްރީމް ކޯޓުގެ އަޑުއެހުން ކެންސަލްކޮށްފި

ކުރީގެ ޓޫރިޒަމް މިނިސްޓަރ ޢަލީ ވަޙީދުގެ ޝަރީއަތް އޮންލައިންކޮށް ކުރިއަށް ގެންދިއުމުގެ މައްސަލައިގައި ދައުލަތުން ސުޕްރީމް ކޯޓުގައި އިސްތިއުނާފު ކޮށްފައިވާ އަޑުއެހުމަށް އޭނާ ހާޒިރު ނުވުމުން އެ އަޑުއެހުން ކެންސަލް ކޮށްފިއެވެ.

މި މައްސަލައިގެ އަޑުއެހުން ސުޕްރީމް ކޯޓުގައި ތާވަލު ކޮށްފައި އޮތީ ހޯމަ ދުވަހުގެ ހެނދުނު 09:00 އަށެވެ. ނަމަވެސް މިި އަޑުއެހުމަށް އަލީ ވަހީދު ހާޒިރުވެފައިނުވާއިރު، ސުޕްރީމް ކޯޓުން ވަނީ މީގެ ކުރިން މި މައްސަލައިގައި އަމުރެއް ވެސް ނެރެފައެވެ. މި މައްސަލަ ބައްލަވާ ބެންޗުގެ ރިޔާސަތުގައި އިންނަވާ ޙުސްނުއްސުޢޫދާއި، ފަނޑިޔާރު ޢަލީ ރަޝީދު އަދި ފަނޑިޔާރު މުޙައްމަދު އިބްރާހީމް ސޮއި ކުރައްވައި ނެރުއްވި އަމުރުގައި ވަނީ, ސުޕްރީމް ކޯޓުން ވަކި ގޮތެއް ކަނޑައަޅަންދެން, އޭނާގެ އެއްވެސް ޝަރީއަތެއް އޮންލައިންކޮށް ކުރިއަށްނުގެންދިއުމަށް އަންގާފައެވެ.

ޢަލީ ވަޙީދުގެ ޝަރީއަތް އޮންލައިންކޮށް ކުރިއަށްގެންދާ މައްސަލަ އިސްތިއުނާފްކުރަން ނިންމީ، ޝަރީއަތް އޮންލައިންކޮށް ކުރިއަށް ގެންދަން ނިންމި ނިންމުމާ ދެކޮޅަށް ޕްރޮސެކިއުޓަރ ޖެނެރަލް އޮފީހުން ހައިކޯޓުގައި އިސްތިއުނާފުކުރި މައްސަލަ އެ ކޯޓުން ބާތިލްކުރުމުންނެވެ. އެ މައްސަލަ ބާތިލުކޮށްފައިވަނީ، ޢަލީ ވަޙީދަށް ރައްދުވާގޮތަށް ހުށަހަޅާފައިވާ މައްސަަލަ، ހުށަހެޅިފައިވާ ގޮތަށް އިސްތިއުނާފީ ދައުވާއެއްގެ ގޮތުގައި ކުރިއަށް ގެންދާނެ ޝަރުއީ އަދި ގާނޫނީ ހަމައެއް ނެތްކަމަށް ބުނެއެވެ.

ޢަލީ ވަޙީދު މިވަގުތު ހުންނެވީ ރާއްޖެއިން ބޭރުގައެވެ. ޖިންސީ ގޯނާއާ ގުޅުން ހުރި ގިނަ ދައުވާތަކެއް އޭނާގެ މައްޗަށް އުފުލާފައިވާއިރު، މިހުރިހާ ދައުވާއަކަށް އޭނާ އިންކާރުކުރައްވާފައި ވެއެވެ. ޢަލީ ވަޙީދު ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް އެދިވަޑައިގަތުމުން ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އަސްޢަދު ޢަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސް ފާއިތުވެ، ޝަރީއަތް ފެށުނު އިރު ވެސް އޭނާ އެނބުރި ރާއްޖެއަށް ވަޑައެއްނުގަންނަވައެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.

ޝަރީއަތަށް ހާޒިރުނުވާ މައްސަލައިގައި އަލީ ވަހީދުގެ މައްޗަށް ސުޕްރީމް ކޯޓުން ވަނީ ޙުކުމެއް ވެސް ކޮށްފައެވެ. ސުޕްރީމް ކޯޓުން ފޮނުވި ޗިޓު އަލީ ވަހީދަށް ލިބި، މި މައްސަލއިގެ އަޑު އެހުމަށް އަލީ ވަހީދު ބައިވެރި ނުވުމުން އޭނާގެ މައްޗަށް ކޯޓުގެ ހުރުމަތް ކެނޑިކަމަށް އިސް ފަނޑިޔާރު ހުސްނުއް ސުއޫދު ކަނޑައެޅުއްވިއެވެ. މި ކަމަށް ފަނޑިޔާރުންގެ ބެންޗުން ތާއީދު ކުރެއްވުމުން އޭނާގެ މައްޗަށް 2 މަހާއި 12 ދުވަހުގެ ޖަލު ހުކުމެއް އިއްވައި، އެ ހުކުމް ތަންފީޒުކުރުމަށް ކަރެކްޝަނަލް ސަރވިސްއަށް ވަނީ އަމުރު ކުރައްވާފައެވެ.