ޔޫކޭގެ އިންފްލޭޝަން ރޭޓް މަތިވުމުން ގަވަރުނަރ މަޢާފަށް އެދިވަޑައިގެންފި

އިނގިރޭސިވިލާތުގެ އިންފްލޭޝަން ރޭޓް 3.1 އިންސައްތައަށް މަތިވެ ދިރިއުޅުމުގެ ޚަރަދުތައް ބޮޑުވުމުން އެޤައުމުގެ ގަވަރުނަރ އެންޑްރޫ ބެއިލީ މަޢާފަށް އެދިވަޑައިގެންފިއެވެ.

ޔޫކޭގެ އިންފްލޭޝަން ރޭޓު މަތިވުމާ ގުޅިގެން އެންޑްރޫ ވިދާޅުވީ އެކަމަށް މަޢާފަށް އެދޭ ކަމަށާއި، މިއީ އެއްވެސް މީހަކު ދެކެން ބޭނުންވާނެ މަންޒަރެއް ނޫން ކަމަށެވެ.

އަންދާޒާ ކުރެވޭ ގޮތުގައި ކުރިއަށް އޮތް ތަނުގައި ޔޫކޭގެ އިންފްލޭޝަން ރޭޓް އަދި މިއަށްވުރެވެސް މަތިވާނެ ކަމަށް ލަފާކުރެވެއެވެ. ޔޫކޭގެ އަމާޒަކީ 2 އިންސައްތައިގައި އިންފްލޭޝަން ރޭޓު ބެހެއްޓުން ކަމަށްވީނަމަވެސް މިހާރު ވަނީ އެ އަދަދު 3.1 އިންސައްތައަށް އަރާފައެވެ. އަދި މިއަންނަ އޭޕްރީލް މަހާ ހަމައަށް މި އަދަދު ފަސް އިންސައްތައަށް އިތުރުވުމަކީ ވެސް އެކަށީގެންވާ ކަމެއް ކަމަށް އިޤްތިޞާދީ މާހިރުން އަންދާޒާ ކުރެއެވެ.

ގައުމުގެ އިންފްލޭޝަން ރޭޓު ދަށަށް ދާނެކަމަށް ގިނަ ބަޔަކަށް ހީކުރެވިފައިވަނިކޮށް ޔޫކޭގެ ބެންކުން ވަނީ އިންފްލޭޝަން ރޭޓު ދަށްނުކޮށް ވިޔަފާރީގެ ގިނަ ބާޒާރުތައް ސިއްސުވާލާފައެވެ. މިއީ މިފަހުގެ ތާރީޚެއްގައި ޔޫކޭގެ އިންފްލޭޝަން ރޭޓް މިހާ ބޮޑުތަނުން މަތިވި ފުރަތަމަ ފަހަރެވެ.

ޔޫކޭގެ އިންފްލޭޝަން ރޭޓު މަތިވުމުގެ ސަބަބުން އެޤައުމުގައި ތަކެތީގެ އަގު ވަނީ އިންތިހާއަށް އުފުލިފައެވެ. އޭގެ ސަބަބުން ދިރިއުޅުމުގެ ޚަރަދުތައް ބޮޑުވެ ރައްޔިތުން އަންނަނީ އެކަމާ ނުރުހުން ފާޅުކުރަމުންނެވެ. އެންޑްރޫ ވިދާޅުވީ މިއީ ޔޫކޭގައި އެކަނިވާ ކަމެއްތޯ، ނޫނީ އަގުތައް އުފުލުނީ މުޅި ދުނިޔެއަށް ދިމާވެފައިވާ އިޤްތިޞާދީ ތަދުމަޑުކަމެއްގެ ސަބަބުންތޯ އެޤައުމުގެ ބޭންކުން ބަލަމުން އަންނަ ކަމަށެވެ.

އިންގްލެންޑު ބޭންކުގެ މޮނިޓަރީ ޕޮލިސީ ކޮމިޓީގައި ކުރިން މަސައްކަތްކުރި އިކޮނޮމިކްސް ޕްރޮފެސަރ ޑެނީ ބްލަންޗްފްލާވަރ ވިދާޅުވީ މިހާރު ކަންތައް ވަމުން އަންނަގޮތް ސެންޓްރަލް ބޭންކަށް ވެސް ނޭނގޭ ކަމަށެވެ. އެހެންކަމުން މިއީ އެންމެން ވެސް ހާސްވާންޖެހޭ ވަރުގެ ބިރުވެރި ކަމެއް ކަމަށެވެ. އަދި ގަވަރުނަރާއި މޮނިޓަރީ ޕޮލިސީ ކޮމިޓީން އަންގާ ގޮތަށް މިވަގުތު ހުރިހާ ވިޔަފާރިތަކާއި ރައްޔިތުންގެ އަމަލުތައް ބެހެއްޓުން ވަރަށް މުހިންމު ކަމަށް ވެސް ޑެނީ ފާހަގަކުރެއްވިއެވެ.