ކުންފުނިތަކުން ރާއްޖެއިން ބޭރުގައި ވިޔަފާރި ފުޅާކުރުމަށް ސަރުކާރުގެ އެއްބާރުލުން ލިބޭނެ - ފައްޔާޒް
ރިސޯޓް ލައިފަކީ 2006 ވަނަ އަހަރު ވުޖޫދުވި ކުންފުންޏެއް
ރިސޯޓް ލައިފްގެ އަހަރީ ދުވަސް ފާހަގަކުރުމަށް ބޭއްވި ހަފްލާގެ ތެރެއިން
ކުންފުނިތަކުން ރާއްޖެއިން ބޭރުގައި ވިޔަފާރި ފުޅާކުރުމަށް ސަރުކާރުގެ އެއްބާރުލުން ލިބޭނެ ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރިސޯރޓް ލައިފް ޓްރެވެލްސްއަށް 15 އަހަރު ފުރުން ފާހަގަކުރުމަށް ހޮޓެލް ޖެންގައި ބޭއްވި ހަފްލާގައި ވާހަކަދައްކަވަމުންނެވެ. މިނިސްޓަރ ވިދާޅުވީ، ދިވެހި ސަރުކާރުގެ ކުންފުނިތަކާއި، ޕްރައިވެޓް ސެކްޓާރގައި މަސައްކަތް ކުރާ ކުންފުނިތަކުގައި ތަޖުރިބާކާރު ބޭފުޅުން އެބަތިއްބެވި ކަމަށެވެ. އަދި އުއްމީދަކީ އެ ކުންފުނިތަކުން ރާއްޖޭގެ އަސްކަނިން ބޭރަށް ވަޑައިގަތުން ކަމަށެވެ. އަދި ފަތުރުވެރިކަމުގެ ދާއިރާގައި މަސައްކަތް ކުރައްވާ ބޭފުޅުންނާއި، އެހެނިހެން ސިނާއަތްތަކުގައި މަސައްކަތް ކުރައްވާ ބޭފުޅުން ވެސް ރާއްޖެއިން ބޭރުގައި ވިޔަފާރި ފުޅާކުރެއްވުން އެއީ އެމަނިކުފާނުގެ އުއްމީދެއް ކަމަށާއި، އެކަމުގައި ސަރުކާރުގެ އެހީތެރިކަން ލިބޭނެ ކަމަށެވެ.
މިނިސްޓަރ ވިދާޅުވީ، އެފަދަ އިޤްތިޞާދީ ހަރާކާތްތަކުން ކުރިއަށް އޮތް ޖީލުތަލުތަކަށް އިޤްތިޞާދީ މަންފާތަކެއް ނެރެވިދާނެ ކަމަށެވެ. އެކަން ކާމިޔާބުވާނީ ރާއްޖެއިން ބޭރުގެ މާކެޓަށް އަމާޒުކޮށްގެން ކަމަށެވެ. މި ސަރުކާރުން މަސައްކަތްކުރަނީ އަބަދުވެސް ދިވެހި ރައްޔިތުންނަށް މަންފާ ލިބޭނެ ގޮތަށް ވިސްނަވައިގެން ކަމަށް މިނިސްޓަރ ވިދާޅުވިއެވެ.
އެގޮތުން ޕްރައިވެޓް ސެކްޓަރ އިތުރަށް ވަރުގަދަކޮށް ފުޅާ ކުރުމަކީ ސަރުކާރުގެ އަމާޒެއް ކަމުގައި މިނިސްޓަރ ވިދާޅުވިއެވެ. އެކަން ކުރުމަށް ކުންފުނިތަކަށް ހުރި ގޮންޖެހުންތައް ނައްތާލުމަށް މަސައްކަތް ކުރައްވާ ކަމަށާއި، ވިޔަފާރިތަކަށް ފަހި މާހައުލެއް ހޯއްދަވައިދެއްވުމަށް މަސައްކަތްކުރައްވާ ކަމަށް ފައްޔާޒު ވިދާޅުވިއެވެ.
ރިސޯޓް ލައިފަކީ 2006 ވަނަ އަހަރު ވުޖޫދުވި ކުންފުންޏެކެވެ.
