ސައުދީއަށް ގިނަ އަދަދެއްގެ ހަތިޔާރު ވިއްކުމަށް އެމެރިކާއިން ނިންމައިފި

ސައުދިއަރަބިއްޔާއަށް ގިނަ އަދަދެއްގެ ހަތިޔާރު ވިއްކުމަށް އެމެރިކާއިން ނިންމައިފިއެވެ.

ޕެންޓަގަންއިން ނެރުނު ބަޔާނެއްގައި ބުނީ ސައުދިއަރަބިއްޔާއަށް 650 މިލިޔަން ޑޮލަރުގެ ހަތިޔާރު ވިއްކުމަށް އެމެރިކާގެ ރައީސް ޖޯ ބައިޑެންގެ ސަރުކާރުން ނިންމާފައިވާ ކަމަށެވެ. އަދި މިކަމަށް ހުއްދަ ހޯދުމަށް އެދި ކޮންގްރެސްއަށް ވަރަށް އަވަހަށް ހުށަހަޅާނެ ކަމަށެވެ.

ޕެންޓަގަންއިން ނެރުނު ބަޔާނުގައި ބުނީ ސައުދީއަށް އެތައް މިލިޔަން ޑޮލަރުގެ ހަތިޔާރު ވިއްކަން ނިންމީ އެގައުމުގެ ދިފާއަށް އަދި މުޅި ސަރަހައްދުގައި އަމަން އަމާންކަން ގާއިމުކުރުމަށްޓަކައި ކަމަށެވެ.

ސައުދީއަށް 650 މިލިޔަން ޑޮލަރުގެ ހަތިޔާރު ވިއްކުމަށް އެމެރިކާއިން ނިންމިއިރު، މިދިޔަ ސެޕްޓެމްބަރު މަހު އެމެރިކާއިން ވަނީ ޔަމަން ހަނގުރާމައިގައި ސައުދީ ސިފައިން ބޭނުންކުރާ އަސްކަރީ ހެލިކޮޕްޓަރުތައް މަރާމާތުކުރުމަށް ބޭނުންވާ 500 މިލިޔަން އެމެރިކާ ޑޮލަރުގެ އެއްބަސްވުމެއްގައި ވެސް ސޮއިކޮށްފައެވެ.

ރިޕޯޓްތައް ބުނާ ގޮތުން އެމެރިކާގެ މިފަދަ އަމަލުތަކަކީ ޔަމަންގެ ހަނގުރާމަ އިތުރަށް ފުޅާވެ ދިގުލައި އިތުރު އެތައް ހާސްބައެއްގެ ފުރާނެ ގެއްލި އަދި ގަލްފް ސަރަހައްދުގެ އަމަން އަމާންކަން ނަގާލުމަށް ކުރަމުންއަންނަ އަމަލުތަކެއް ކަމުގައެވެ. އަދި މިކަން ކުށްވެރިކޮށް އިންސާނީ ހައްގުތަކާ ބެހޭ ޖަމާއަތްތަކުން ވަނީ ކަންބޮޑުވުން ވެސް ފާޅުކޮށްފައެވެ.