މިއަހަރު 1.3 މިލިއަން ފަތުރުވެރިން ގެނެވޭނެ: މިނިސްޓަރ މަޢުޞޫމް

މިއަހަރު ނިމުމުގެ ކުރިން 1.3 މިލިއަން ފަތުރުވެރިން ރާއްޖެ އަންނާނެކަން ޓުއަރިޒަމް މިނިސްޓަރ ޑރ. ޢަބްދުﷲ މަޢުޞޫމް ހާމަކުރައްވައިފިއެވެ.

ޓުއަރިޒަމް މިނިސްޓަރ މިކަން ހާމަކުރެއްވީ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުންނެވެ.

މިނިސްޓަރ ވިދާޅުވީ އެންމެ ފުރަތަމަ އަންދާޒާކުރީ މިއަހަރުތެރޭގައި އެއް މިލިއަން ފަތުރުވެރިން އަންނާނެ ކަމަށެވެ. އެހެންނަމަވެސް އޭގެ ފަހުން ރާއްޖެއަށް ވެކްސިން ތައާރަފުވުމާއެކު 1.5 މިލިއަން ފަތުރުވެރިން ގެނެވިދާނެކަމަށްބަލައި، މި އަދަދު ރިވައިޒް ކުރި ކަމަށް މިނިސްޓަރ ވިދާޅުވިއެވެ.

އެހެންނަމަވެސް ބަޖެޓާ ހަމައަށް އައިއިރު ބަޖެޓު ފޮތުގައި ލިޔުނީ އެއް މިލިއަން ފަތުރުވެރިން އަންނާނެ ކަމަށް ކަން މިނިސްޓަރ ފާހަގަކުރެއްވިއެވެ. އެއީ ކޮވިޑާގުޅިގެން ހާލަތު ބަދަލުވެދާނެ ކަމަށް ބަލާފައި ކަމަށް މިނިސްޓަރ ވިދާޅުވިއެވެ. އަދި އެކަންތައް ހާސިލްކުރެވިފައިވާކަމަށް ވިދާޅުވިއެވެ.

އެއަށްފަހު ސައުތު އޭޝިއާގެ ފަތުރުވެރިންނަށް ރާއްޖެ އައުމުގެ ދޮރު ބަންދުވުމުން އެހާ ހިސާބުން ކަނޑައެޅީ 1.3 މިލިއަން ފަތުރުވެރިން ރާއްޖެ ގެނައުމަށް ކަމަށް މިނިސްޓަރ މަޢުޞޫމް ވިދާޅުވިއެވެ. މިހާރު މި ދާ ރޭޓޫން ދާނަމަ މި ޓާގެޓަށް ވާސިލްވެވޭނެ ކަމަށް މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރ ވަނީ 2021 ވަނަ އަހަރުގެ ބެޑްނައިޓްސް 2019 ވަނަ އަހަރަށްވުރެ އިތުރުކުރުމަށްވެސް އަމާޒު ހިފިކަމަށް މިނިސްޓަރ ވިދާޅުވިއެވެ. 2019 ވަނަ އަހަރުގެ ބެޑްނައިޓް ހުރީ 10.7 ގައި ކަމަށާއި، މި އަދަދު ކަޑައްތު ކޮށްލެވޭނެކަމަށް ގަބޫލުކުރައްވާކަމަށް މިނިސްޓަރ ވިދާޅުވިއެވެ. އެހެންނަމަވެސް އެއާޕޯޓުގައި ބައެއް މައްސަލަތައް ހުރުމުން މިކަމަށް ގޮންޖެހުންތަކެއް އެބަހުރިކަމަށް މިނިސްޓަރ ވިދާޅުވިއެވެ.