ފަތުރުވެރިކަމުގެ ކާމިޔާބީ ބިނާވަނީ ވަން އައިލެންޑް، ވަން ރިސޯޓު ކޮންސެޕްޓަށް: ޑރ. މަޢުޞޫމް
މީގެ ތެރޭގައި ގެސްޓްހައުސްއާ ހޯމް ސްޓޭ ޓުއަރިޒަމް ހިމެނޭ
ސަންގެލި ރިސޯޓު
ފަތުރުވެރިކަމުގެ ކާމިޔާބީ ބިނާވެފައިވަނީ ވަން އައިލެންޑް, ވަން ރިސޯޓު ކޮންސެޕްޓަށްކަމަށް ޓުއަރިޒަމް މިނިސްޓަރ ޑރ. ޢަބްދުﷲ މަޢުޞޫމް ވިދާޅުވެއްޖެއެވެ.
ޓުއަރިޒަމް މިނިސްޓަރ މިފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުންނެވެ.
މިނިސްޓަރ ވިދާޅުވީ ވަން އައިލެންޑް, ވަން ރިސޯޓު ކޮންސެޕްޓު އިތުރަށް ކުރިއަރުވަން ޖެހޭ ކަމަށެވެ. ފަތުރުވެރިކަމުގެ ކާމިޔާބީ އެންމެ ބޮޑަށް ބިނާވެފައި އޮންނަނީ މި ކޮންސެޕްޓަށް ކަމަށާއި، ދުނިޔޭގެ އެންމެ މަގުބޫލު ޑެސްޓިނޭޝަންތަކުގެ ތެރޭގައި ރާއްޖެ ގުނާލެވެނީ މި ކޮންސެޕްޓުގެ ސަބަބުން ކަމަށް މިނިސްޓަރ ވިދާޅުވިއެވެ. މިއާއެކު ގެސްޓްހައުސް ވިޔަފާރީގެ ކުރިއެރުންތަކެއްވެސް އަންނަންޖެހޭކަމަށާއި, އަދި ހޯމް ސްޓޭއަކީވެސް މިކަމަށް މުހިންމު ކަމެއް ކަމަށް މިނިސްޓަރ ވިދާޅުވިއެވެ.
ހޯމް ސްޓޭ ޓުއަރިޒަމާ ދެކޮޅަށް ދެކެވެމުންދާ ގިނަ ވާހަކަތަކަށް ރައްދުދެއްވައި މިނިސްޓަރ ވިދާޅުވީ މި ހުރިހާ ކަމެއްވެސް ކުރިއެރުވޭނީ އިންތަކަކާއި މިންތަކެއްގެ ތެރެއިން ކަމަށެވެ. އަދި މިނިސްޓްރީން ބޭނުންވަނީ ކާމިޔާބު މޮޑެލްއެއްގެ ގޮތުގައި ފަތުރުވެރިކަން ކުރިއަށް ގެންދިއުމަށް ކަމަށެވެ.
އަތޮޅުތެރޭގައި ހޯމް ސްޓޭ ޓުއަރިޒަމް ކުރިއަށް ގެންދިއުމަށް މިނިސްޓްރީގެ ޕާޓްނަރުންގެ ގޮތުގައި ތިބީ ކައުންސިލްތައް ކަމަށާއި, އިންތަކާއި މިންތަކުގެ ތެރެއިން އެކަން ކުރަން އެ ބޭފުޅުން ވަނީ އެއްބަސްވެވަޑައިގެންފައި ކަމަށް މިނިސްޓަރ ވިދާޅުވިއެވެ. ގިނަ ކައުންސިލްތަކުގައި ތިބީ ފަތުރުވެރިކަމުގެ ދާއިރާގެވެސް ތަޖުރިބާކާރު ބައެއްކަމުން, މިކަން ކުރިއަށްގެންދާނެގޮތް ކައުންސިލްތަކަށް އެނގޭކަމަށް އެމަނިކުފާނު ވިދާޅުވިއެވެ. އަދި ހޯމް ސްޓޭއާ ގެސްޓްހައުސްއާ ދެމެދު މާ ބޮޑު ތަފާތެއް ނޯންނާނެކަން މިނިސްޓަރ ފާހަގަކުރެއްވިއެވެ.
މި ކަމުގެ ފައިދާ ކުރާނީ ސީދާ ރައްޔިތުންނަށް ކަމަށާއި އަދި ހޯމް ސްޓޭ ޓުއަރިޒަމްއަކީ ކާމިޔާބު މޮޑެލްއަކަށް ވާނެކަމަށް މިނިސްޓަރ ވިދާޅުވިއެވެ.
ރާއްޖެއަށް ހޯމް ސްޓޭ ފަތުރުވެރިކަން 2023 ވަނަ އަހަރު ތައާރަފު ކުރުމަކީ ރައީސް އިބްރާހީމް މުޙައްމަދު ޞާލިޙުގެ ވަރަށް ބޮޑު އަމާޒެކެވެ. މީގެ ސަބަބުން ފަތުރުވެރިކަމުގެ ސީދާ ފައިދާ ރައްޔިތުންނަށް ލިބިގެންދާނެއެވެ. މިއާއެކު ފޯރުންތެރި ބަޔަކަށްވެ, އަމިއްލަ ފައިމައްޗަށް ތެދުވެ ތިބޭ ބަޔަކަށް ރައްޔިތުން ވެގެންދާނެއެވެ.
