ބޯހިޔާވަހިކަމުގެ މައްސަލަ ހައްލުކުރުމަށް ބޭނުންވާ ފައިނޭންސްގެ ކަންކަމުގެ ބޮޑު ބައި ހަމަޖެހިއްޖެ – ސަރުކާރު

ރާއްޖޭގެ ރައްޔިތުންނަށް އެންމެ ބޮޑަށް ބޭނުންވާ ބޯހިޔާވަހިކަމުގެ މައްސަލައަށް ހައްލެއް ގެނައުމަށްޓަކައި ކުރެވެމުންދާ މަސައްކަތުގެ ދަށުން, ފައިނޭންސް ހޯދުމުގެ މަސައްކަތުގެ ބޮޑުބައެއް ހަމަޖެހިފައިވާ ކަމަށް ރައީސް އޮފީހުން ބުނެފިއެވެ.

ބަޖެޓް 2022 ޕްރޮގްރާމުގައި ވާހަކަ ދައްކަވަމުން ރައީސް އޮފީހުގެ ޕޮލިސީ ސެކްރެޓަރީ، އަހުމަދު ހަމްދާން ވިދާޅުވީ, ބޯހިޔާވަހިކަމަކީ މި ސަރުކާރު ވެރިކަމަށް އައިއިރުވެސް ވަރަށް ބޮޑަށް ބޭނުންޖެހިފައިވާ ކަމެއް ކަމަށެވެ. ވަކިން ޚާއްސަކޮށް މާލެއަށް އެކަމުގެ ބޭނުން ބޮޑު ކަމަށާއި، މާލޭގެ ރައްޔިތުންނަށް ބޭނުންވާ އެންމެ ބޮޑު އެއް ކަމަކީ ބޯހިޔާވަހިކަމަށް ހައްލެއް ހޯދުން ކަމަށެވެ. އަދި ކޮވިޑްގެ ހާލަތާއެކީގައި ސަރުކާރުން އެންމެ ބޭނުންވި މިންވަރަށް ބޯހިޔާވަހިކަން ފޯރުކޮށްދެވިފައި ނުވާ ކަމަށް ހަމްދާން ވިދާޅުވިއެވެ.

ހަމްދާން ވިދާޅުވީ 2022 ވަނަ އަހަރަށް ހުށަހެޅުނު ބަޖެޓުގައި 3 އަހަރަށް ބަހާލައިގެން, 1.5 ބިލިއަން ރުފިޔާ އަތޮޅު ތެރޭގެ ހައުސިންގ ޔުނިޓު ގާއިމުކުރުމަށްޓަކައި ހިމަނާފައިވާނެ ކަމަށެވެ. އަދި ގާތްގަނޑަކަށް 1500 ހައުސިން ޔުނިޓް އަންނަ އަހަރު އަތޮޅު ތެރޭގައި ކުރިއަށް ގެންދިއުމަށް ރޭވިފައިވާ ކަމަށެވެ.

ހަމްދާން ވިދާޅުވީ ސިއްހީ ދާއިރާގެ އިންފްރާސްޓްރަކްޗަރ ޕްރޮޖެކްޓްތައް ކުރިއަށް ގެންދިއުމަށް އަންނަ އަހަރުގެ ބަޖެޓުގައި ރޭވިފައިވާ ކަމަށާއި، ވަކިން ޚާއްސަކޮށް, ސަރަހައްދީ ތަރައްގީއަކީ ސަރުކާރުގެ މުޅި މެނިފެސްޓޯގައި އެންމެ މުހިންމު އެއް ތަނބު ކަމަށެވެ.

އަންނަ އަހަރުގެ ބަޖެޓުން ގިނަ ކަންކަން ހާސިލް ކުރެވޭނެކަން ފާހަގަކުރައްވައި ހަމްދާން ވިދާޅުވީ, ލަފާ ފުރުމުގެ ދަތިތައް ހައްލުކުރުމަށްޓަކައި ޕީއެސްއައިޕީގެ ތެރޭގައި ކަންތައްތަކެއް ހިމެނިފައި އެބަހުރި ކަމަށެވެ. މީގެ އިތުރުން ތިމާވެށި ރައްކާތެރިކުރުމަށްޓަކައި ވަރަށް ގިނަ ޚަރަދުތަކެއް ކުރަން ޖެހޭ ކަމަށާއި، 2022 ވަނަ އަހަރު 932 މިލިއަން ރުފިޔާ މިކަމަށް ބަޖެޓް ކުރެވިފައި އެބައޮތް ކަމަށެވެ.