ގުރައިދޫގައި ކުޑަކުއްޖަކު ގެނބިގެން މަރުވެއްޖެ
6 ނޮވެމްބަރު 2021 | ހޮނިހިރު 10:00މަރުވީ އުމުރުން ދެއަހަރުގެ އަންހެން ކުއްޖެއް
ކ.ގުރައިދޫ
ކ.ގުރައިދޫގައި ކުޑަކުއްޖަކު ގެނބިގެން މަރުވެއްޖެއެވެ.
ރާއްޖެ ޓީވީއަށް މައުލުމާތު ދެމުން ގުރައިދޫ ކައުންސިލްގެ ރައީސް ހުސައިން ޔާމީން މުޙައްމަދު ވިދާޅުވީ މިއަދު މެނދުރު 13:30 ހާއިރު އެރަށުގެ ކުޑަކުއްޖަކު ގެނބިގެން މަރުވެފއިވާ ކަމަށެވެ. މިހާދިސާގައި މަރުވީ އުމުރުން ދެއަހަރުގެ އަންހެން ކުއްޖެކެވެ.
ޔާމީން ވިދާޅުވީ މިއަދު މެނދުރު އެކުއްޖާއަށް ކާންދިނުމަށްފަހު އެކުއްޖާގެ މަންމަ ގޭތެރެއަށްވަދެ ތަށިދޮވެފައި އައިއިރު އެކުއްޖާ ފެންނަން ނެތް ކަމަށެވެ. އެކުއްޖާގެ ގެ ހުންނަނީ އަތިރިއާ ކައިރީގައެވެ.
މިކުއްޖާ މަރުވެފައި އޮއްވާ މޫދުތެރެއިން ފެނުނީ ގެއްލިގެން ހޯދަން ފެށިތާ 15 ވަރަކަށް މިނެޓް ފަހުންނެވެ. ގުރައިދޫ ވޯޓަރ ސްޕޯރޓްސްގައި ޖެޓްސްކީ ދުއްވަން އުޅޭ މީހަކަށް މިކުއްޖާ ފެނުނީ މަރުވެގެން މައްޗަށް އަރާފައިވަނިކޮށެވެ. ހޮސްޕިޓަލަށް ގެންދިޔައިރުވެސް އޮތީ މަރުވެފައެވެ.
މަރުވި ކުއްޖާގެ މޫނު ދެއްކުމަށްފަހު ކަށުނަމާދު ކުރުން އޮންނާނީ މިރޭގެ މަޣްރިބް ނަމާދަށް ފަހު ގުރައިދޫ މިސްކިތުގައެވެ.
