ކ. ގުރައިދޫ ދާއިރާގެ ބައި އިލެކްޝަންގައި ވޯޓުލުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލައިފިއެވެ

އަންނަ އޭޕްރީލް މަހުގެ 15 ވަނަ ދުވަހު ބާއްވާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި އިލެކްޝަންގައި ވޯޓު ލުމުގެ ހައްގު ލިބިފައިވާ މީހުންގެ ރަޖިސްޓްރީ، 27 ފެބްރުއަރީ ވަނަ ދުވަހު އިލެކްޝަންސް ކޮމިޝަނުން ވަނީ އާންމުކޮށްފައެވެ.

މިއާއެކު މި ލިސްޓަސް ޝަކުވާ ހުށަހެޅުމުގެ ފުރުސަތުވެސް ވަނީ ހުޅުވާލާފައެވެ. އިލެކްޝަންސް ކޮމިޝަނުން ބުނީ 27 ފެބްރުއަރީން ފެށިގެން 10 މާރޗުގެ ނިޔަލަށް މި ލިސްޓަށް ޝަކުވާ ހުށަހެޅޭނެ ކަމަށެވެ.

ރައްޔިތުންގެ މަޖިލީހުގެ ގުރައިދޫ ދާއިރާގެ ބައި އިލެކްޝަން ބާއްވަނީ އެ ދާއިރާގެ މެންބަރުކަން ކުރެއްވި އިބްރާހީމް ރިޒާ، މި މަހުގެ 23 ވަނަ ދުވަހުގެ ރޭ އަވަހާރަވުމާއި ގުޅިގެންނެވެ. ޕީޕީއެމްގެ މެންބަރެއް ކަމަށްވާ ރިޒާ ވަނީ 17 ވަނަ ރައްޔިތުންގެ މަޖިލީހުގައާއި 18 ވަނަ ރައްޔިތުންގެ މަޖިލީހުގައި ވެސް މެންބަރުކަން ކުރައްވާފައެވެ.

ހާތަނަށް ބައި އިލެކްޝަންގައި ވާދަކުރާނެކަން އިއުލާނުކޮށްފައިވަނީ ސަރުކާރު ހިންގާ މައި ޕާޓީ، އެމްޑީޕީންނެވެ. އެމްޑީޕީން ބުނީ، ޕްރައިމަރީއަށް ޝައުގުވެރިކަން ހުރި އެ ޕާޓީގެ މެންބަރުން އެ ކެނޑިޑޭޓަކަށް ތާއީދުކުރާ 100 މެންބަރުންގެ ސޮޔާއެކު ޕާޓީގެ އޮފީހަށް ހުށަހަޅަންވާނެ ކަމަށެވެ.