ކ.ގުރައިދޫގައި ކުރިއަށްދާ ރައްޒާގުބެ މެމޯރިއަލް ކަޕްގައި ޓިމެލޯއާ ދެކޮޅަށް ކުޅުނު މެޗުން މޮޅުވެ، ގްރޫޕް ބީގެ އެއް ވަނައިގައި އޯލް އެޓޭކުން ސެމީ ފައިނަލަށް ދަތުރުކޮށްފި އެވެ.

އާދީއްތަ ދުވަހުގެ ހަވީރު ކުޅުނު މެޗު އޯލް އެޓޭކުން ކާމިޔާބު ކުރީ 5-1 އިންނެވެ. މެޗުގައި އޯލް އެޓޭކުގެ ލަނޑުތައް ޖެހީ ނާއިޝް އާދަމް، އަނީސް އަލީ އަދި އަޙުމަދު ޝުއޫން އެވެ. މީގެ ތެރެއިން ޝުއޫން ވަނީ ތިން ލަނޑު ޖަހައި ހެޓްރިކް ހަދައިފަ އެވެ. ޓިމެލޯގެ ހަމައެކަނި ލަނޑު ޖެހީ މުޙައްމަދު ޝާން އެވެ. މެޗުގެ މޮޅު ކުޅުންތެރިޔަކަށް ހޮވުނީ ހެޓްރިކް ހެދި ޝުއޫން އެވެ. މޮޅާއެކު އޯލް އެޓޭކުން ވަނީ އެއް ވަނައިގައި ސެމީ އަށް ދަތުރުކޮށްފަ އެވެ. މި ގްރޫޕްގެ ދެ ވަނައިގައި ސެމީ އަށް ދިޔައީ އެންމެ ފަހުގެ ޗެމްޕިއަން އެކްސިޓޯ އެވެ. ތިން ޓީމު ހިމެނުނު ގްރޫޕްގެ ފުލަށް ދިޔައީ ޓިމެލޯ އެވެ.

މުބާރާތުގެ ގްރޫޕް އޭ އިން ސެމީ ފައިނަލަށް ދާނެ ޓީމުތައް ކަށަވަރު ވާނީ ހޯމަ ދުވަހާއި، އަންގާރަ ދުވަހު ކުޅޭ ގްރޫޕް ސްޓޭޖުގެ ފަހު މެޗުތަކުންނެވެ.

މި މުބާރާތަކީ އެރަށުގެ ފުޓުބޯޅަ ލެޖެންޑު އަލްމަރުހޫމް އަބްދުއް ރައްޒާގު މޫސާގެ ހަނދާނުގައި 2015 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އެންމެ ފުރަތަމަ މި މުބާރާތް ބާއްވާފައިވަނީ "ތުއްތޮންބެ ކަޕް"ގެ ނަމުގައެވެ. އޭގެ ފަހުން 2019 ވަނަ އަހަރު މުބާރާތުގެ ނަން ވަނީ ރައްޒާގުބެ މެމޯރިއަލް ކަޕަށް ބަދަލުކޮށްފައެވެ.