ޕްރެކްޓިސް ޕާލަމެންޓް ފޯރ ޔޫތުގައި ބައިވެރިވުމުގެ ފުރުސަތު ހުޅުވާލައިފިއެވެ.

ޕްރޮގްރާމްގައި ބައިވެރިވުމަށް ބޭނުންވާ, ޚާއްސަ އެހީއަށް ބޭނުންވާ ފަރާތްތަކަށްވެސް ޖާގަ ކަނޑައެޅިފައިވެއެވެ. އަދި އިތުރު އެހީތެރިކަން ބޭނުންވާ ފަރާތްތައް (އެއީ ތަރުޖަމާ ކުރާނެ ފަރާތެއް ނުވަތަ އިޝާރާތުން ވާހަކަދައްކާ ފަރާތެއް) އެކަން ފާހަގަކުރުމުން މި އިވެންޓުގައި އެކަންކަން ހަމަޖައްސައިދެވޭނެ ކަމަށް ރައްޔިތުންގެ މަޖިލީހުގެ އިދާރާއިން ބުނެއެވެ. މިޕްރޮގްރާމްގައި ބައިވެރިވުމުގެ ފުރުސަތު ހުޅުވާލާފައިވަނީ 16 އަހަރާ 25 އަހަރާ ދެމެދުގެ ދިވެހި ޒުވާނުންނަށެވެ.

ޕްރެކްޓިސް ޕާލަމެންޓް ސީރީޒްއަކީ ރައްޔިތުންގެ މަޖިލީހުގެ އިދާރާއާއި ޔޫއެންޑީޕީ މޯލްޑިވްސް ގުޅިގެން, އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާޒް އެންޑް ޓްރޭޑްގެ އެހީތެރިކަމާއެކު ހިންގާ ޕްރޮގްރާމެކެވެ. މި ޕްރޮގްރާމްގައި ހިމެނެނީ މައިގަނޑު 2 ބައެވެ. އެއީ، "ޕްރެކްޓިސް ޕާލަމެންޓް ފޯރ ޔޫތު" އަދި "ޕްރެކްޓިސް ޕާލަމެންޓް ފޯރ ވިމެން"އެވެ. މިޕްރޮގްރާމްގެ މައިގަނޑު މަގުސަދަކީ ޒުވާނުންނާއި އަންހެނުން ސިޔާސީ ހަރަކާތްތަކުގައި ބައިވެރިވުމަށް ހިތްވަރުދީ، އެހީތެރިވެ, އަދި ކުރިމަގުގައި ސިޔާސީ މަގާމުތަކަށް ކުރިމަތިލުމަށް ބާރުއެޅުމެވެ.

ޕްރެކްޓިސް ޕާލަމެންޓްގެ މައިގަނޑު މަގުސަދުތަކުގެ ތެރޭގައި; މަޖިލީހުގެ މަސައްކަތްތައް ކުރިއަށްދާ ގޮތް ރަނގަޅަށް ދެނެގަނެ، ގިނަ ޒުވާނުންނާއި އަންހެނުން މަޖިލީހަށް ކުރިމަތިލުމަށް ހިތްވަރުދިނުމާއި ޕޮލިސީތަކުގައި ހުންނަ އުނިކަންކަން ދެނެގަނެ، ރަނގަޅު ބަދަލުތަކެއް ގެނައުމަށް އެކީގައި މަސައްކަތްކުރުން ހިމެނެއެވެ.

"ޕްރެކްޓިސް ޕާލަމެންޓް ފޯރ ޔޫތު"ގައި 3 ބައެއް ހިމެނެއެވެ. އެއީ، ޕޮލިސީތަކާއި މަޖިލީހުގެ މަސައްކަތްތައް ކުރިއަށްދާ ގޮތުގެ މައުލޫމާތު ދިނުމުގެ ސެޝަންއަކާއި ރައްޔިތުންގެ މަޖިލީހުގެ ނަމޫނާ މާދިރީއެކެވެ.

މި ޕްރޮގްރާމްގައި ބައިވެރިވުމަށްއެދި ފޯމު ހުށަހެޅުމުގެ ސުންގަޑިއަކީ 15 ނޮވެމްބަރެވެ. މި ޕްރޮގްރާމް ބޭއްވުމަށް ހަމަޖެހިފައިވަނީ 5 ޑިސެމްބަރުން 9 ޑިސެމްބަރަށެވެ. ޕްރޮގްރާމުގައި ބައިވެރިވުމުގެ ފުރުސަތު ދިނުމަށް ހަމަޖެހިފައިވަނީ އެންމެ މަތިން ޕޮއިންޓް ލިބޭ 40 ފަރާތަށެވެ.