އަންނަ އަހަރުގެ ބަޖެޓުގައި ކައުންސިލްތަކަށް ކަނޑައަޅާފައިވާ ބްލޮކް ގްރާންޓާއެކު ލާމަރުކަޒީ ގާނޫނަށް ގެނައި ބަދަލު ހަގީގީ މާނައިގައި ތަންފީޒު ވެގެންދާނެ ކަމަށް ރައީސް އޮފީހުގެ ޕޮލިސީ ސެކެރެޓަރީ، އަހުމަދު ހަމްދާން ވިދާޅުވެއްޖެއެވެ.

ރާއްޖެޓީވީގެ ބަޖެޓް 2022 ޕްރޮގްރާމްގައި އަންނަ އަހަރަށް ލަފާކުރާ ދައުލަތުގެ ބަޖެޓާ ބެހޭ ގޮތުން ވާހަކަދައްކަވަމުން ހަމްދާން ވިދާޅުވީ، ލާމަރުކަޒު ކުރުމަކީ މި ސަރުކާރުގެ ސިޔާސަތެއް ކަމަށާއި، އަންނަ އަހަރަށް ލަފާކުރާ ދައުލަތުގެ ބަޖެޓުވެސް ބިނާވެފައިވަނީ އެ އަސާސްގެ މައްޗަށް ކަމަށެވެ. މި ސަރުކާރުން އެންމެ ފުރަތަމަވެސް ކުރެއްވި ކަމަކީ އިދާރީ ދާއިރާތައް ލާމަރުކަޒުކޮށް ހިންގުމުގެ ގާނޫނަށް ބަދަލު ގެނެސް ކައުންސިލްތައް ބާރުވެރި ކުރުވުން ކަމަށާއި، ގާނޫނަށް ގެނައި ބަދަލާއެކު އެކުލަވާލެވުނު ފުރަތަމަ ކައުންސިލަށް މާލީ ބާރުވެރިކަން މި ބަޖެޓުން ލިބިގެންދާނެ ކަމަށެވެ.

2022ވަނަ އަހަރަކީ ލާމަރުކަޒީ ގާނޫނަށް ގެނައި ބަދަލު ހަގީގީ މާނައިގައި ތަންފީޒު ވެގެންދާނެ އަހަރެއް ކަމަށް ހަމްދާން ވިދާޅުވިއެވެ. ޚާއްސަކޮށް ކައުންސިލްތަކަށް މާލީ ގޮތުން ބާރުވެރިކަން ލިބިގެންދާނެ ކަމަށާއި، ބްލޮކް ގްރާންޓްގެ ގޮތުގައި ބަޖެޓުގައި 1.5 ބިލިއަން ރުފިޔާ ކަނޑައެޅިފައިވުމުން، ކައުންސިލްތަކަށް މާލީ ފުދުންތެރިކަން ހޯދުމަށް ފުރުސަތު ފަހިވެގެންދާނެ ކަމަށް ހަމްދާން ވިދާޅުވިއެވެ.

ކައުންސިލްތަކުގެ މެންޑޭޓްގައި ކުރުމަށް ކަނޑައެޅުފައިވާ ކަންތައް ކުރުމަށް އަންނަ އަހަރުގެ ބަޖެޓުން އެހީތެރިކަން ލިބިގެންދާނެ ކަމަށް ހަމްދާން ވިދާޅުވިއެވެ. އަދި ރަށްރަށުގެ ތަރައްގީއަށް ކައުންސިލުން ކަނޑައަޅާ ކަންކަން ކުރުމަށް ބަޖެޓުން މަގުފަހިވެގެންދާނެކަން ހަމްދާން ފާހަގަކުރެއްވިއެވެ. ކައުންސިލްތަކަށް އިންސާނީ ތަރައްގީއާއި، އުމްރާނީ ތަރައްގީ ހޯދުމަށް ފަސޭހަވެގެންދާނެ ކަމަށްވެސް ހަމްދާން ވިދާޅުވިއެވެ.

2019 އަހަރު ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެވުނު 8 ވަނަ އިސްލާހުގެ ދަށުން އެ އަހަރަކަށް ފާސްކުރާ އާމްދަނީގެ މަދުވެގެން 5 އިންސައްތަ އަދި ކައުންސިލްތަކުގެ އިހުތިސާސްގައި ނުހިމެނޭ ބިމާއި ފަޅާއި ފަރުގެ ސަރަހައްދުގެ ކުލީގެ ގޮތުގައި ލިބޭ އާމްދަނީގެ 40 އިންސައްތަ ކައުންސިލްތަކަށް ދޫކުރަންޖެހެއެވެ.

އަދި މި އަދަދު މިނިސްޓްރީ އޮފް ފިނޭންސުން ކަނޑައަޅާ ފިސްކަލް ފޯމިއުލާއެއް ބޭނުންކޮށްގެން ދިވެހިރާއްޖޭގެ ހުރިހާ ކައުންސިލްތަކަށް ބެހިގެންދާގޮތަށް ދައުލަތުގެ ބަޖެޓުން ކައުންސިލްތަކަށް ހިލޭ އެހީގެ ގޮތުގައި ފައިސާ ދޫކުރަންޖެހެއެވެ. 2022 ވަނަ އަހަރު ކައުންސިލްތަކަށް ބްލޮކް ގްރާންޓްގެ ގޮތުގައި ދޫކުރުމަށް ކަނޑައަޅާފައިވަނީ ޖުމުލަ 1.5 ބިލިއަން ރުފިޔާއެވެ. މިއީ މި ހިނގާ 2021 ވަނަ އަހަރު ކައުންސިލްތަކަށް ދޫކުރާނެ ފައިސާއާ އަޅައިބަލާއިރު 19.8 އިންސައްތަ އިތުރު އަދެދެކެވެ.

އަދި މެދުރާސްތާގައި ވެސް މި އަދަދު އިތުރުވަމުންދާނެކަމަށް ލަފާކުރެވެއެވެ. ކޮވިޑް-19 ގެ ހާލަތު ރަނގަޅުވެ ދައުލަތުގެ އާމްދަނީ ރަނގަޅުވާ މިންވަރަކުން ކައުންސިލްތަކަށް ދޭ އެހީގެ މިންވަރު އިތުރުވަމުންދާނެއެވެ. ކައުންސިލްތަކަށް ބްލޮކް ގްރާންޓް ގޮތުގައި ޖުމުލަ ދޫކުރާ އަދަދަކީ އެ އަހަރަށް ފާސްކުރާ ބަޖެޓުގައި އާމްދަނީ ގޮތުގައި ކަނޑައަޅާ އަދަދުގެ 5 އިންސައްތަ (854.9މިލިއަން ރުފިޔާ) ކައުންސިލްތަކުގެ އިހުތިސާސްގެ ތެރޭގައި ނުހިމެނޭ ބިމާއި ފަޅާއި ފަރުގެ ސަރަހައްދުގެ ކުލީގެ ގޮތުގައި ދައުލަތަށް ލިބޭ އާމްދަނީގެ 40 އިންސައްތަ (710.5 މިލިއަން ރުފިޔާ) އެވެ.

ބްލޮކް ގްރާންޓް ރަށު ކައުންސިލްތަކާއި އަތޮޅު ކައުންސިލްތަކާއި ސިޓީ ކައުންސިލްތަކަށް ބަހާ ނިސްބަތަކީ، ރަށު ކައުންސިލްތަކަށް 72 އިންސައްތަ، އަތޮޅު ކައުންސިލްތަކަށް 9 އިންސައްތަ އަދި ސިޓީ ކައުންސިލްތަކަށް 19 އިންސައްތައެވެ.

މި އަދަދު ވަކިވަކި ކައުންސިލްތަކަށް ބަހާއިރު ދެގޮތަކަށް ފައިސާ ބެހިގެންދެއެވެ. އެއީ އިކުއަލައިޒޭޝަން ގްރާންޓްގެ ގޮތުގައި ދޭ އަދަދާއި ފިސްކަލް ފޯމިއުލާއިން ކަނޑައަޅާ އަދަދެވެ. އިކުއަލައިޒޭޝަން ގްރާންޓަކީ ކައުންސިލްތަކަށް ހިލޭ އެހީގެ ގޮތުގައި އެކަށީގެންނުވާ ކުޑަ މިންވަރެއް ނުލިބޭނެކަން ކަށަވަރުކުރުމަށްޓަކައި ކަނޑައަޅާ މިންވަރެއް ހުރިހާ ކައުންސިލްތަކަށް ހަމަހަމަކޮށް ބެހޭ އަދަދެވެ.