މޮންގޯލިއާއިން ރާއްޖެއަށް ޗާޓާ ފްލައިޓްތަކެއް ފަށަނީ

"އޯސަމް މޯލްޑިވްސް" އިން މޮންގޯލިއާ އާއި ރާއްޖެއާ ދެމެދު ޗާޓަރު ފްލައިޓްތަކެއް ބާއްވަން ތައްޔާރުވެއްޖެއެވެ.

އޯސަމް މޯލްޑިވްސްއަކީ ރާއްޖެއަށް ފަތުރުވެރިން ގެނައުމުގައި މަޝްހޫރު ޓްރެވެލް އެޖެންސީއެކެވެ.

މިއީ ރާއްޖެއާއި މޮންގޯލިއާއާ ދެމެދުގައި ސީދާ ދަތުރުތައް ފަށާ ފުރަތަމަ ފަހަރެވެ. މީގެ ސަބަބުން އެގައުމުން ރާއްޖެ އަންނަ ފަތުރުވެރިންގެ އަދަދު ނިސްބަތުން ގިނަވެގެންދާނެއެވެ. އަދި ފަތުރުވެރިކަމުގެ ސީޒަނުގައި މޮންގޯލިއާއަށް ދަތުރުތަކެއް ފެށުމުން އިތުރު މަންޒިލެއްގައި ރާއްޖެ އިޝްތިހާރުވުމުގެ ފުރުސަތު ލިބިގެންދާނެއެވެ. އަނެއްކޮޅުން މިއީ ދިވެހީން އެގައުމަށް ޒިޔާރަތް ކޮށްލުމަށް ވެސް ލިބޭ ރަނުގެ ފުރުސަތަކަށް ވެގެންދާނެއެވެ.

ރާއްޖޭގެ ރިސޯޓުތަކާއި ގެސްޓްހައުސްތަކަށް ފަތުރުވެރިން ގެނައުމަށް 2002 ވަނަ އަހަރު އުފެއްދި އޯސަމް މޯލްޑިވްސްއިން އަންނަނީ ހުޅުމާލޭގައި ދެ ހޮޓަލެއް ވެސް ހިންގަމުންނެވެ. އެއީ އޯސަމް ސުއިޓްސް އާއި އޯސަމް ކޮމްފޯޓްއެވެ. އަދި ރާއްޖޭގެ އެކި ކަންކޮޅުތަކަށް ސްޕީޑްބޯޓުގެ ޚިދުމަތް ވެސް އެ އެޖެންސީން ދަނީ ދެމުންނެވެ.

މޮންގޯލިއާއިން ރާއްޖެއަށް ބާއްވާ ފުރަތަމަ ޗާޓާ ފްލައިޓް އޮންނާނީ ނޮވެމްބަރ 23 ވަނަ ދުވަހުއެވެ. ޖުމްލަ 150 ފަސިންޖަރުން އެދުވަހު ރާއްޖެ އަންނަން ހަމަޖެހިފައި ވާއިރު، އޭގެ ތެރޭގައި ހިމެނެނީ މީޑިއާގައި މަސައްކަތް ކުރާ މީހުންނާއި ޓްރެވެލް ބްލޮގާސް އާއި ޓުއާ އޮޕަރޭޓަރުން ފަދަ މީހުންނެވެ.

މިފްލައިޓް އަނބުރާ މޮންގޯލިއާއަށް ދާއިރު ރާއްޖޭގެ ފަތުރުވެރިންނަށް ޚާއްސަ ޕެކޭޖުތަކެއް ވަނީ ތަޢާރަފްކޮށްފައެވެ. މިޕެކޭޖުގެ ދަށުން ފަސް ރެއާއި ހަ ދުވަހު މޮންގޯލިއާގައި މަޑުކުރެވޭއިރު، މީގެ އަގަކީ 1،590 ޑޮލަރެވެ. މިޕެކޭޖުގެ ތެރޭގައި ޓިކެޓްގެ ޚަރަދާއި، ވިސާ ފީ އާއި ހުރުމާއި، ޓުއާގެ އިތުރުން ކެއުމުގެ ޚަރަދު ހިމެނެެއެވެ.

ނޮވެމްބަރ 23ގެ ދަތުރަށްފަހު މޮޮންގޯލިއާ ދަތުރުތައް ދެން އޮންނާނީ ޑިސެމްބަރ 27ން ފެށިގެންނެވެ. އޭގެ ފަހުން އަންނަ އަހަރުގެ މާރޗް މަހުގެ ނިޔަލަށް ކޮންމެ ހަފްތާއަކު އެއް ދަތުރު ބާއްވަން ނިންމާފައިވާ ކަމަށް އޯސަމް މޯލްޑިވްސްއިން ބުނެއެވެ.

މި ދަތުރުތައް ކުރަނީ މޮންގޯލިއާގެ އުލާންބާތަރް ސިޓީގެ ޗިންގިސް ޚާން އިންޓަނޭޝަނަލް އެއާޕޯޓާއި ވެލާނާ އިންޓަނޭޝަނަލް އެއާޕޯޓާ ދެމެދުއެވެ. މޮންގޯލިއަން އެއާލައިނުން ކުރާ މި ދަތުރުތަކުގެ ދިގުމިނަކީ ހަގަޑިއިރެވެ.