ނުކުޅެދުންތެރިކަން ހުންނަ މީހުންނަށް ދޭ އިނާޔަތްތައް އިސްލާހު ކުރަންޖެހޭ: އިފްހާމް
އެއީ ރަނގަޅު އުސޫލެއްގެ ތެރެއިން ކުރަން ޖެހޭ ކަމެއް
ޖެންޑަރ މިނިސްޓްރީގެ ސްޓޭޓް މިނިސްޓަރ އިފްހާމް ހުސައިން
ނުކުޅެދުންތެރިކަން ހުންނަ މީހުންނަށް ދޭ އިނާޔަތްތައް އިސްލާހު ކުރަންޖެހޭ ކަމަށް ޖެންޑަރ މިނިސްޓްރީގެ ސްޓޭޓް މިނިސްޓަރ އިފްހާމް ހުސައިން ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އިފްހާމް ވިދާޅުވީ ނުކުޅެދުންތެރިކަން ހުންނަ މީހުންނަށް ދޭ އިނާޔަތްތަކަކީ އިސްލާހު ކުރަންޖެހޭ އަދި ރަނގަޅު އުސޫލެއްގެ ތެރެއިން ކުރަން ޖެހޭ ކަމެއް ކަމަށް ޤަބޫލުކުރައްވާ ކަމަށެވެ.
ނުކުޅެދުންތެރިކަން ހުންނަ މީހުންނަށް މިހާރު ގާނޫނުގައިވާ ގޮތުން ދެނީ 2000 ރުފިޔާގެ އިނާޔަތެކެވެ.
ނުކުޅެދުންތެރިކަން ހުންނަ ކުދިންނަށް މިހާރު ދިމާވެފައިވާ އެންމެ ބޮޑު ގޮންޖެހުމަކީ ސްކޫލް ނިންމުމަށްފަހު ހުނަރު ދަސްކޮށްދިނުމުގެ ޕްރޮގްރާމުތައް ނެތުން ކަމަށާއި، އެ ކުދިން ވަޒީފާގެ މައިދާނަށް ނެރެން ގޮންޖެހުންތަކާ ކުރިމަތިވާ ކަމަށް ވެސް ވިދާޅުވިއެވެ.
ނުކުޅެދުންތެރިކަން ހުންނަ މީހުން އެންމެން ބޮޑަށް ދަތިވެގެން ފާހަގަކުރާ ކަންތައްތަކުގެ ތެރޭގައި ބޭސްފަރުވާގެ ކަންތައްތަކާއި ތެރަޕީގެ ކަންތައްތަކުގެ އިތުރުން އެސެސްމަންޓް ނުހެދޭ މައްސަލަ ވެސް ހިމޭނެ ކަމަށް އިފްހާމު ވިދާޅުވިއެވެ. އަދި ރީޖަނަލް ހޮސްޕިޓަލުތަކުގައި ސައިކޮލަޖިސްޓުން ނުތިއްބަވާ މައްސަލަ ވެސް ފާހަގަކުރައްވާ ކަމަށާއި، ކަމާ ގުޅޭ ވުޒާރާތަކާ ގުޅިގެން މިކަންތައްތަކަށް ހައްލު ހޯދުމަށް މިނިސްޓްރީން މަސައްކަތް ކުރައްވަމުން ގެންދަވާ ކަމަށެވެ.
ނުކުޅެދުންތެރިކަން ހުންނަ މީހުންނާ ދޭތެރޭގައި މުޖުތަމައުން އަމަލު ކުރާ ގޮތަށް އަލިއަޅުއްވާލައްވާ އިފްހާމު ވިދާޅުވީ މުޖުތަމައުގައި މިފަދަ ކުދިން މަދުން ނަމަވެސް ބާކީ ކުރާ ކަމަށެވެ. އަދި މިކަންތައްތައް ރަނގަޅު ކުރުމަށް މިނިސްޓްރީން އާންމުން ހޭލުންތެރިކުރުވުމުގެ ތަފާތު ޕްރޮގްރާމުތައް ހިންގަމުން އަންނައިރު އޭގެ އެދެވޭ ނަތީޖާ ފެނިފައިވާ ކަމަށް ވެސް ވިދާޅުވިއެވެ. މުޖުތަމައުގައި ނުކުޅެދުންތެރިކަން ހުންނަ މީހުން ބަލައިގަނެ، އެ މީހުންނަށް އަޅާލުމަށް މިނިސްޓްރީން ވަނީ ބާރުއަޅާފައެވެ.
ރާއްޖޭގައި ދުނިޔޭގެ ނުކުޅެދުންތެރިކަން ހުންނަ މީހުންގެ ދުވަސް މީގެ ކުރިން މާލޭގައި ފާހަގަކުރިނަމަވެސް މިފަހަރު އެ ދުވަސް ފާހަގަކުރުމަށް ނިންމާފައިވަނީ ރަށެއްގައި ކަމަށް އިފްހާމް ވިދާޅުވިއެވެ. އެހެންނަމަވެސް އެއީ ކޮން ރަށެއްކަން ހާމައެއް ނުކުރައްވައެވެ. މި ދުވަހާ ގުޅުވައިގެން މިނިސްޓްރީން ރިވެލި އެވޯޑް ދިނުމަށް ވެސް ނިންމާފައިވާ ކަމަށް ވިދާޅުވިއެވެ.
ރިވެލި އެވޯޑަކީ ނުކުޅެދުންތެރިކަން ހުންނަ މީހުންނާއި މި ދާއިރާގައި މަސައްކަތް ކުރައްވާ އެކިއެކި ފަރާތްތަކުގެ މަސައްކަތުގެ އަގު ވަޒަންކުރުމުގެ ގޮތުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއާއި ނުކުޅެދުންތެރިކަން ހުންނަ މީހުންގެ ޙައްޤުތައް ހިމާޔަތްކުރާ ކައުންސިލް ގުޅިގެން ކޮންމެ ދެ އަހަރަކުން އެއް ފަހަރު ދޭ އެވޯޑެކެވެ.
