ބޮޑުތަކުރުފާނު ސީރީސްގެ ވާހަކަ އާއި ސްކްރީންޕްލޭ ތައްޔާރުކޮށްދޭނެ މީހަކު ހޯދުމަށް އިއުލާންކޮށްފި
މި ސީރީސް އަކީ 3 ސީޒަނަކަށް ބަހާލާފައިވާ ސީރީސްއެއް
އުތީމު ގަނޑުވަރު
ބޮޑުތަކުރުފާނުގެ ޤައުމީ ޖިހާދުގެ މައްޗަށް ބިނާކޮށް ތައްޔާރުކުރާ ސީރީސްގެ ވާހަކަ އާއި ސްކްރީންޕްލޭ ތައްޔާރުކޮށްދޭނެ މީހަކު ހޯދުމަށް އިއުލާންކޮށްފިއެވެ.
ހޯމް މިނިސްޓްރީން ބުނީ، މި ކަމަށް ޝައުޤުވެރިވާ ފަރާތްތަކުން 8 ނޮވެންބަރު 2021 ވާ ހޯމަ ދުވަހު މިނިސްޓްރީން މަޢުލޫމާތު ސާފުކުރެއްވުމަށްފަހު 17 ނޮވެންބަރު 2021 ވާ ބުދަ ދުވަހު އެ މިނިސްޓްރީއަށް އަންދާސީ ހިސާބު ހުށަހެޅުއްވުމަށެވެ.
ބޮޑުތަކުރުފާނުގެ ޤައުމީ ޖިހާދުގެ މައްޗަށް ބިނާކޮށް ހަދަން ނިންމާފައިވާ ސީރީސް އަކީ 3 ސީޒަނަކަށް ބަހާލާފައިވާ ސީރީސްއެއް ކަމަށް ހޯމް މިނިސްޓްރީގެ ކޮމިއުނިކޭޝަން ޑިރެކްޓަރު ހަފްސީ އަބްދުﷲ ވިދާޅުވިއެވެ. ކޮންމެ ސީޒަނެއްގައި 50 މިނިޓްގެ 10 އެޕިސޯޑް ހިމެނޭނެއެވެ. އަންނަ އަހަރުގެ ޤައުމީ ދުވަހަށް މި ސީރީޒް ދެއްކުމަށް ތައްޔާރުވަމުން އަންނަ ކަމަށް ހަފްސީ ވިދާޅުވިއެވެ.
މިފިލްމް ޑައިރެކްޓަރަކީ މަޝްހޫރު ޑައިރެކްޓަރ އަޝްހަރު ވަޙީދެވެ.
މި ފިލްމު އިފްތިތާހު ކޮށްފައިވަނީ، މި އަހަރުގެ ޤައުމީ ދުވަހުގެ މުނާސަބަތުގައި، ހއ. އުތީމުގައި ބޭއްވި ޖަލްސާގައެވެ.
ހަފްސީ ވިދާޅުވީ، މި ފިލްމަކީ ބޮޑުތަކުރުފާނު ކުރެއްވި މަތިވެރި ޖިހާދާއި ޤުރުބާނީތައް، މި ޒަމާނުގެ ވިސްނުންތަކާއި އެއްގޮތަށް ދައްކުވައިދޭނެ ފިލްމެއް ކަމަށެވެ. އަދި ފިލްމު ހެދުމުގެ މައިގަނޑު މަޤްޞަދަކީ، ބޮޑުތަކުރުފާނުގެ ޖިހާދު މި ޖީލުގެ ޒުވާނުންނަށް ޝައުގުވެރި ގޮތަކަށް ގެނެސްދިނުމެވެ. މިއީ ވަރަށް މުހިއްމު މަސައްކަތެއްކަން ފާހަގަކުރައްވައި، މި މަސައްކަތުގައި ފުރިހަމަ އެއްބާރުލުން ދެއްވުމަށް ހަފްސީ އެދިވަޑައިގެންނެވިއެވެ.
