ލަންކާ ބަލިކޮށް އިންގްލެންޑް ސެމީއަށް

މިހާރު ކުރިއަށްދާ ޓީ20 ވޯލްޑް ކަޕުގައި ހޯމަ ދުވަހުގެރޭ ކުޅުނު މެޗުން ސްރީ ލަންކާ ބަލިކޮށް މުބާރާތުގެ ސެމީފައިނަލުގެ ޖާގައެއް އިންގްލެންޑުން ގާތްގަނޑަކަށް ޔަގީންކޮށްފިއެވެ.

ގްރޫޕް އެކެއްގައި ހިމެނޭ އިންގްލެންޑުން މި މުބާރާތުގައި ކުޅުނު ހަތަރުވަނަ މެޗުން މޮޅުވީ ލަންކާ އަތުން 26 ލަނޑުންނެވެ. މި މެޗުން އިންގްލެންޑް މޮޅިވިއިރު، ގްރޫޕް ސްޓޭޖުގައި މިހާތަނަށް ކުޅުނު ހަތަރު މެޗުންވެސް އެ ގައުމު ވަނީ މޮޅުވެފައެވެ.

އެއާއެކު އިންގްލެންޑް އޮތީ ގްރޫޕް އެކެއްގެ އެއްވަނައިގައި އަށް ޕޮއިންޓާއެކުއެވެ. މި ގްރޫޕުގައި އިންގްލެންޑާ ޕޮއިންޓުގެ ގޮތުން އެއްވަރުކުރުމުގެ ފުރުސަތު އޮތީ މި ވަގުތު ދެވަނައިގައި އޮތް ދެކުނު އެފްރިކާ އާއި ތިންވަނައިގައި އޮތް އޮސްޓްރޭލިއާއަށެވެ. އެ ދެ ގައުމަށްވެސް ވަނީ ތިން މެޗުން ހަތަރު ޕޮއިންޓް ލިބިފައެވެ. އެކަމަކު އިންގްލެންޑަށް ނެޓް ރަން ރޭޓްއިން ކުރި ލިބޭނެތީ، އެ ގައުމަށް މިހާރު ވަނީ ސެމީގެ ޖާގައެއް ގާތްގަނޑަކަށް ޔަގީންވެފައެވެ.

ހޯމަ ދުވަހުގެރޭ ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅުނު މެޗުގެ މެޗުގައި ޓޮސް ދިމާވުމުން ލަންކާއިން ނިންމީ ހޮވުމަށެވެ. އެއާއެކު އިންގްލެންޑް އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހަތަރު ކުޅުންތެރިން ނުބައިވެގެން ވަނީ 163 ލަނޑު ހަދާފައެވެ.

މި ބައިގައި ނުބައި ނުވެ އިންގްލެންޑުގެ ތަރި ޖޯސް ބަޓްލާ ވަނީ 67 ބޯޅައިން 101 ލަނޑު ހަދައި، ސެންޗަރީއެއް ހަމަކޮށްފައެވެ. މިއީ މި ފަހަރުގެ ވޯލްޑް ކަޕުގެ ފުރަތަމަ ސެންޗަރީއެވެ. އަދި މިއީ ޓީ20 އިންޓަނޭޝަނަލްސްގައި ބަޓްލާ މިހާތަނަށް ކުޅުނު 86 މެޗުގައި އޭނާގެ ފުރަތަމަ ސެންޗަރީއެވެ. މީގެ އިތުރުން އުމުރުން 31 އަހަރުގެ ބަޓްލާ ވެފައިވަނީ އިންގްލެންޑުގެ ކްރިކެޓް ތާރީޚުގައި ޓީ20 އާއި ޓެސްޓް ސީރީސް އަދި ވަންޑޭ އިންޓަނޭޝަނަލްސް (އޯޑީއައި) ގައި ސެންޗަރީއެއް ހެދި ފުރަތަމަ ކުޅުންތެރިޔާއެވެ.

ޖަވާބުގައި ލަންކާ ކުޅެން އަރައި 19 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 137 ލަނޑެވެ. އެ ގައުމުން އެންމެ ރަނގަޅަށް ކުޅުނީ 21 ބޯޅައިން 34 ލަނޑު ހެދި ވަނިންދު ހަސަރަންގާ އާއި 18 ބޯޅައިން 26 ލަނޑު ހަމަކުރި ބާނޫކާ ރާޖަޕަކްސައެވެ.

މި މެޗުން މޮޅުވެ އިންގްލެންޑުން ސެމީގެ ޖާގައެއް ގާތްގަނޑަކަށް ޔަގީންކުރިއިރު، ގްރޫޕް ސްޓޭޖުގެ ފަހު މެޗުގައި އަންނަ ހޮނިހިރު ދުވަހު އެ ގައުމު ނުކުންނާނީ ދެކުނު އެފްރިކާއާ ދެކޮޅަށެވެ.