މި އަހަރުގެ ޓީ20 ކްރިކެޓް ވޯލްޑް ކަޕުގެ ފައިނަލް މެޗުގައި ނިއު ޒީލެންޑް ބަލިކޮށް މި މުބާރާތުގެ ޗެމްޕިއަންކަން މުޅިން އަލަށް އޮސްޓްރޭލިއާއިން ހޯދައިފިއެވެ.

ޔުނައިޓެޑް އަރަބި އެމިރޭޓްސް (ޔޫއޭއީ) ގައި އާދީއްތަ ދުވަހުގެރޭ ކުޅުނު މެޗުން އޮސްޓްރޭލިއާ މޮޅުވީ އަށް ވިކެޓުންނެވެ.

ފައިނަލް މެޗުގެ ޓޮސް ދިމާވުމުން އޮސްޓްރޭލިއާއިން ނިންމީ ހޮވުމަށެވެ. އެއާއެކު ނިއު ޒީލެންޑް އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހަތަރު ކުޅުންތެރިން ނުބައިވެގެން ހެދުނީ 172 ލަނޑެވެ. އެ ގައުމުން އެންމެ ރަނގަޅަށް ކުޅުނީ 48 ބޯޅައިން 85 ލަނޑު ހެދި ކޭން ވިލިއަމްސަނާއި 35 ބޯޅައިން 28 ލަނޑު ހަމަކުރި މާޓިން ގުޕްޓިލެވެ.

ޖަވާބުގައި އޮސްޓްރޭލިއާ ކުޅެން އަރައި 18.5 އޯވަރުގެ ތެރޭގައި ދެ ކުޅުންތެރިން ނުބައިވެގެން ވަނީ 173 ލަނޑު ހަދައި މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ ނުބައިނުވެ 50 ބޯޅައިން 77 ލަނޑު ހެދި މިޗެލް މާޝް އާއި 38 ބޯޅައިން 53 ލަނޑު ހަމަކުރި ޑޭވިޑް ވާނާއެވެ.

މި މޮޅާއެކު ޓީ20 ވޯލްޑް ކަޕުގެ ޗެމްޕިއަންކަން މުޅިން އަލަށް އޮސްޓްރޭލިއާއިން ހޯދިއިރު، މި ފަހަރުގެ މުބާރާތުގެ ކުރިން އެ ގައުމުން އެންމެ ފަހުން ޓީ20 ވޯލްޑް ކަޕުގެ ފައިނަލެއްގައި ކުޅެފައިވަނީ 2010 ވަނަ އަހަރެވެ. އެ ފަހަރު ފައިނަލުން އޮސްޓްރޭލިއާ ބަލިވީ އިންޑިއާ އަތުންނެވެ. އަދި މި ފަހަރުގެ ފައިނަލަކީ ނިއު ޒީލެންޑުން މި މުބާރާތުގެ ފައިނަލުގައި ވާދަކުރި ފުރަތަމަ ފަހަރެވެ.