ރާއްޖެއިން ޚިޔާރުކުރީ އިންޑިއާކަން ވަރަށް ސާފުވާނެ: ރައީސް ނަޝީދު
ރާއްޖޭގައި އިންޑިއާގެ ބައިވެރިވުން އޮންނަންނުޖެހޭނެކަމަށް އެމްޑީޕީއިން ގަބޫލެއް ނުކުރޭ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރާއްޖޭގެ ކަންކަމުގައި އިންޑިއާގެ ބައިވެރިވުން އޮންނަން ނުޖެހޭނެ ކަމަށް އެމްޑީޕީން ދުވަހަކު ވެސް ގަބޫލުނުކުރާކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިފަދައިން ވިދާޅުވީ އިންޑިއާގެ ދަ ހިންދޫ ނޫހަށް ދެއްވި އިންޓަރވިއުއެއްގައި ރާއްޖޭގެ ސިޔާސީ މައިދާނުގައި އޮތް އެހެން ޕާޓީތަކުގެ ފަރާތުން ރާއްޖެއާއި އިންޑިއާއާ ދެމެދު އޮތް ގާތް ގުޅުމަށް އެއްވެސް ހުރަހެއް އެޅޭނެފަދަ ކަމެއް ވެދާނެތޯ ކުރެވުނު ސުވާލަށް ޖަވާބުދެއްވަމުންނެވެ.
ރައީސް ނަޝީދު ވިދާޅުވީ ރާއްޖޭގެ ސިޔާސީ މައިދާނުގައި ހަރަކާތްތެރިވާ ބައެއް ޕާޓީތަކުން ގަބޫލުކުރާ ގޮތުގައި މިފަދަ ވިސްނުންތައް ގެންގުޅުމަކީ އެމީހުންނާމެދު ރައްޔިތުން ކުރާ އިތުބާރު އިތުރުވާނެ ކަމެއް ކަމުގައެވެ. އެހެންނަމަވެސް މިއީ އެއްވެސް އިރެއްގައި އެމްޑީޕީން ގެންގުޅުނު ވިސްނުމެއް ނޫން ކަމަށާއި، ރާއްޖޭގެ ކަންކަމުގައި އިންޑިއާގެ ބައިވެރިވުން އޮންނަން ނުޖެހޭނެ ކަމަށް އެ ޕާޓީން ދުވަހަކުވެސް ގަބޫލުނުކުރާކަމަށް ރައީސް ނަޝީދު ވިދާޅުވިއެވެ.
މި ސަރަހައްދުގައި ސިޔާސީ ކަންކަން ހިނގަމުންދާގޮތް ދިވެހިންނަށް އެނގޭ ކަމަށާއި، މިކަމުގައި ރާއްޖޭގެ ރޯލު ވެސް ދިވެހިންނަށް ސާފުކަމަށް ރައީސް ނަޝީދު ވިދާޅުވިއެވެ. މީގެ އިތުރުން ރައްޔިތުންގެ ސަލާމަތާއި ރައްކާތެރިކަން ކަަށަވަރުކުރަނީ ކިހިނެއްތޯ މިއީ ރައްޔިތުން އުފައްދާ ސުވާލެއް ކަމަށާއި، އެހެން ގައުމެއްގެ އެހީއާ ނުލާ މިކަން ކުރެވިދާނެތޯ ރައްޔިތުން ސުވާލު އުފައްދާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މި ހުރިހާ ކަމެއްގައި ވެސް އެހީތެރިކަން ހޯދުމަށް ރާއްޖެއިން ޚިޔާރުކުރީ އިންޑިއާ ކަމަށެވެ. ރާއްޖެއިން ގެންގުޅެނީ "އިންޑިއާ ފަސްޓް" ޕޮލިސީއެއް ކަމަށާއި، ރާއްޖެއާއި އިންޑިއާއާ ދެމެދު އޮތް ގުޅުން މިހާރު އިތުރަށް ވަރުގަދަވެފައިވާކަމަށް ނަޝީދު ވިދާޅުވިއެވެ. އިޤްތިޞާދީ އަދި ތަރައްގީގެ ރޮނގުން ދެ ގައުމުން ގުޅިގެން ވަރަށް ގާތުން މަސައްކަތްތަކެއް ކުރަމުންދާކަން ރައީސް ނަޝީދު ފާހަގަކުރެއްވިއެވެ.
ރައީސް ނަޝީދު އިތުރަށް ވިދާޅުވީ ގައުމެއްގެ ޚާރިޖީ ސިޔާސަތަކީ އެ ގައުމެއްގެ ހުރިހާ ސިޔާސީ ޕާޓީތަކަކުން ވެސް ގަބޫލުކުރާ ސިޔާސަތަކަށްވުން މުހިންމު ކަމަށެވެ. އަދި މިކަންކަމާ ގުޅޭގޮތުން އިދިކޮޅު ފަރާތްތަކާއެކު ދެކެވެމުންދާ ވާހަކަތައް ހުއްޓާނުލައްވާނެ ކަމަށް ވިދާޅުވިއެވެ. މިކަމުގެ މަޝްވަރާތައް ކުރީގެ ރައީސް ޔާމީން އަބްދުލްގައްޔޫމް އާއެކުވެސް ކުރެއްވި ކަމަށާއި، މިއީ މާ ބޮޑު މައްސަލައެއް ނޫންކަން ރާއްޖޭގެ ގިނަ ބަޔަކު ގަބޫލުކުރާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު މިފަދައިން ވާހަކަދައްކަވާފައި މިވަނީ ދިވެހިރާއްޖެ އިންޑިއާގެ ބާރުގެދަށަށް ގެންދަން އުޅޭކަމަށް ގިނަ އަދަދެއްގެ ވާހަކަތަކެއް ދެކެވެމުންދާ ދަނޑިވަޅެއްގައެވެ.
