ލ. ގަމުގެ 6 ތަނެއްގައި ސޯލަރ ޕެނަލް ހަރުމުގެ މަސައްކަތް ފަށައިފި

ފެނަކަ ކޯޕަރޭޝަނުން ލ. ގަމުގައި ސޯލަރ ޕީވީ ނިޒާމު ގާއިމިކުރުމުގެ މަސައްކަތް ފަށައިފިއެވެ.

ފެނަކައިން ބުނީ މި މަސައްކަތަކީ ތެލަށް ބަރޯސާވާ މިންވަރު ކުޑަކޮށް އިޔާދަކުރަނިވި ހަކަތައިގެ އަމާޒަށް ވާސިލުވުމަށް ފަށާފައިވާ ޕްރޮޖެކްޓުގެ ދަށުން ކުރާ މަސައްކަތެއް ކަމަށެވެ. އެގޮތުން ނެޓްމީޓަރިންގ އުސޫލުން ލ. ގަމުގެ 5 މިސްކިތަކާއި އިޖްތިމާއީ މަރުކަޒުގައި ސޯލަރ ޕީވީ ނިޒާމު ގާއިމިކުރުމުގެ މަސައްކަތް ކުރަމުންދާކަމަށް އެ ކުންފުނިން ބުނެފައިވެއެވެ.

މި ޕްރޮޖެކްޓުގެ ދަށުން ލ. ގަމު 5 މިސްކިތަކާއި އިޖްތިމާއީ މަރުކަޒުގައި ޖުމްލަ 60ކޭޑަބްލިއުޕީގެ ސޯލަރ ޕީވީ ހަރުކުރެވިގެން ދާނެ ކަމަށް ފެނަކައިން ބުނެފައިވެއެވެ. މިކަމުގެ ސަބަބުން ލ. ގަމު ކައުންސިލުން ކަރަންޓަށް ކުރާ ޚަރަދު ބޮޑުތަނުން ކުޑަ ވެގެންދާނެ ކަމަށް ފެނަކައިން ބުނެފައިވެއެވެ.

ފެނަކައިން ބުނީ މި މަޝްރޫއުގެ ސަބަބުން ދުވާލެއްގެ މައްޗަށް ޑީސަލް ބޭނުންކުރެވޭ އަދަދު 80 ލީޓަރު މަދުކުރެވިގެން ދާނެކަމަށް އަންދާޒާ ކުރެވޭ ކަމަށާއި، މަހެއްގެ މައްޗަށް އެ ކުންފުންޏަށް 2،400 ލީޓަރުގެ ޑިސަލް ސަލާމަތް ކުރެވިގެންދާނެ ކަމަށެވެ. އަދި ޖައްވަށް ބޭރުކުރާ ވިހަ ގޭހުގެ 5 ޓަނު މަހެއްގެ މައްޗަށް މަދުވާނެ ކަމަށް ފެނަކައިން ބުނެފައިވެއެވެ.

ދެމެހެއްޓެެނިވިި ގޮތެއްގައި ތެލަށް ބަރޯސާވާ މިންވަރު ކުޑަކޮށް ކަރަންޓުގެ އަގު ހެޔޮކުރުމަށް ކުރާ މަސައްކަތުގެ އިތުރުން، ޖައްވަށް ބޭރުކުރާ ވިހަ ގޭސްތައް މަދުކުރުމަކީ ސަރުކާރުގެ އަމާޒުގެ ތެރޭގައި ހިމެނޭ ކަމަކަށް ވާއިރު ސަރުކާރުގެ އެ އަމާޒުތަށް ހާސިލްކުރުމަށް ފެނަކައިން މިހާރުވެސް ގިނަ މަސައްކަތްތަކެއް ކުރަމުންދާކަމަށް އެ ކުންފުނިން ފާހަގަކުރެއެވެ.