ސްރީ ލަންކާގައި ބޭއްވުމަށް ހަމަޖެހިފައިވާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގެ މެޗުތައް ބަލަން ދަނޑަށް ސަޕޯޓަރުން ވެއްދުމާ މެދު މަޝްވަރާކުރަމުން އަންނަ ކަމަށް ލަންކާގެ މީޑިއާ ރިޕޯޓުތައް ބުނެފިއެވެ.

މި މުބާރާތުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. މުބާރާތް ކުރިއަސް ގެންދިޔުމަށް ނިންމާފައިވަނީ މި މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށެވެ.

މި ހަފުތާގެ ހުކުރު ދުވަހު ލަންކާގެ ސިއްހަތާ ބެހޭ ވުޒާރާއިން ވަނީ މި މަހުގެ އެއްވަނަ ދުވަހުން ފެށިގެން 15 ވަނަ ދުވަހާ ދޭތެރޭ ރައްޔިތުން އަމަލުކުރަން ޖެހޭގޮތުގެ އައު އުސޫލެއް ނެރެފައެވެ. އެ އުސޫލުގައި ވާގޮތުން ކުޅިވަރުތައް ކުޅުމަށް ހުއްދަ އޮތް ނަމަވެސް، ދަނޑުތަކަށް ސަޕޯޓަރުން ވެއްދުމުގެ ހުއްދަ ދީފައެއް ނުވެއެވެ.

އެއާއެކު ލަންކާ މުބާރާތުގައި ސަޕޯޓަރުންނަށް ކުޅި ބަލަން ދަނޑަށް ވަދެވޭނެކަމާ މެދު ސުވާލު އުފެދިފައިވާއިރު، މީޑިއާ ރިޕޯޓުތައް ބުނާގޮތުން ލަންކާގައި ބާއްވާ ފޯ ނޭޝަންސް ކަޕްގައި ސަޕޯޓަރުން ވައްދައިގެން މެޗުތައް ކުޅެވޭތޯ ލަންކާ ސަރުކާރުން މިހާރު ވަނީ ސިއްހަތާ ބެހޭ ވުޒާރާއާއެކު މަޝްވަރާތައް ފަށާފައެވެ. އަދި ލަންކާ ސަރުކާރުން މިހާރު މަސައްކަތްކުރަނީ ދަނޑަށް ސަޕޯޓަރުންނަށް ވަދެވޭ ޖާގައިގެ 50 އިންސައްތަ ސަޕޯޓަރުން ވައްދައިގެން މެޗުތައް ކުރިއަށް ގެންދިއުމަށް ކަމަށްވެސް ރިޕޯޓުތައް ބުނެއެވެ.

ލަންކާއަކީ ގިނަ އަދަދެއްގެ ދިވެހިން ދިރިއުޅޭ ގައުމަކަށްވާއިރު، 2008 ވަނަ އަހަރު އެ ގައުމުގައި ބޭއްވި ސާފް ޗެމްޕިއަންޝިޕުގެ މެޗުތައް ބަލަން ގިނަ އަދަދެއްގެ ދިވެހި ސަޕޯޓަރުން ވަނީ ވަދެފައެވެ. އަދި މި ފަހަރުގެ ފޯ ނޭޝަންސް ކަޕް މެޗުތައް ބަލަންވެސް ލަންކާގައި ދިރިއުޅޭ ދިވެހި ސަޕޯޓަރުން މިހާރު އަންނަނީ ތައްޔާރުވަމުންނެވެ.

ލަންކާގައި ބާއްވާ ފޯ ނޭޝަންސް ކަޕަކީ ރާއްޖޭގެ ގައުމީ ޓީމާ ދާދި ފަހުން ހަވާލުވި އިޓަލީގެ ފްރެންސެސްކޯ މޮރިއޭރޯގެ އިރުޝާދުގެ ދަށުން ގައުމީ ޓީމުން ކުޅޭނެ ފުރަތަމަ މުބާރާތެވެ. މި ފަހަރުގެ މުބާރާތުގައި ރާއްޖޭން ކުޅޭ ފުރަތަމަ މެޗުގައި މި މަހުގެ އަށްވަނަ ދުވަހުގެރޭ ނުކުންނާނީ ލަންކާއާ ދެކޮޅަށެވެ. އަދި އޭގެ ފަހުން 11 ވަނަ ދުވަހު ހަވީރު ބަންގްލަދޭޝްއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހެވެ. މި މުބާރާތުގެ ފައިނަލަށް ދާނީ ލީގު ބުރުން އެންމެ ރަނގަޅު ނަތީޖާ ނެރޭ ދެ ޓީމެވެ.

ލަންކާގައި ބާއްވާ މުބާރާތުގައި މި ފަހަރު ރާއްޖެ ވާދަކުރާއިރު، ރާއްޖޭން ވަނީ މީގެ ކުރިން 2012 ވަނަ އަހަރު ލަންކާގައި ބޭއްވި މަހިންދަ ރާޖަޕަކްސަ މުބާރާތުގެ ޗެމްޕިއަންކަން ހޯދާފައެވެ. އެ ފަހަރު އެ މުބާރާތް ކުރިއަށްގެންދިޔައީ 23 އަހަރުން ދަށުގެ މުބާރާތެއްގެ ގޮތުގައެވެ.