ލަންކާ ބަލިކޮށް ސީޝެލްސް ފައިނަލާ ގާތަށް

ސްރީ ލަންކާގައި ކުރިއަށްދާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގައި ކުޅުނު ދެވަނަ މެޗުން ލަންކާ ބަލިކޮށް މުބާރާތުގެ ފައިނަލާ ގާތަށް ސީޝެލްސް ޖެހިލައިފިއެވެ.

ކޮލޮމްބޯގެ ރޭސްކޯސް ސްޓޭޑިއަމުގައި ކުޅުނު މި މެޗުން ސީޝެލްސް މޮޅުވީ 1-0 ގެ ނަތީޖާއަކުންނެވެ.

މި މެޗުގައި ސީޝެލްސްއިން ގިނަ ހަމަލާތަކެއް އުފެއްދިއިރު، މެޗުގެ 12 ވަނަ މިނެޓުގައި އެ ޓީމަށް ވަނީ ލީޑު ނަގަން ޕެނަލްޓީއެއް ލިބިފައެވެ. މިއީ އޭރިއާ ތެރެއިން ލަންކާގެ ޑިފެންޑަރު އަސީކުރް ރަހްމާނުގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ. އެކަމަކު ސީޝެލްސްގެ ކެޕްޓަން ސްޓީވް ބެނޮއިޓް ފޮނުވާލި ޕެނަލްޓީ ދިޔައީ ގޯލާ އަމާޒުނުވެއެވެ.

އަދި އޭގެ ފަހުން މެޗުގެ 25 ވަނަ މިނެޓުގައި ހިލޭ ޖެހުމަކުން އެ ޓީމުގެ ސްޓެފަން ހިއުގް ފޮނުވާލި ހަމަލާއެއް ވަނީ ގޯލުގެ ދަނޑިއަށް އަމާޒުވެފައެވެ. މި މެޗުގައި ސީޝެލްސްއިން ލީޑު ނަގާފަައިވަނީ މެޗުގެ 68 ވަނަ މިނެޓުގައެވެ. ޔޯސިފް ރަވީނިއާ ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ވަރެން މެލީއެވެ.

މި މޮޅާއެކު ފައިނަލުގެ އުއްމީދު ސީޝެލްސްއިން ބޮޑުކުރިއިރު، ތާވަލުގެ އެއްވަނައިގައި އޮތް ބަންގްލަދޭޝާއި ދެވަނައިގައި އޮތް ސީޝެލްސްއަށް ވަނީ ކުޅުނު ދެ މެޗުން ހަތަރު ޕޮއިންޓް ލިބިފައެވެ. އަދި ތިންވަނައިގައި އޮތް ރާއްޖެ އާއި ހަތަރުވަނައިގައި އޮތް ލަންކާއަށް ދެ މެޗުން ލިބިފައިވަނީ އެންމެ ޕޮއިންޓެކެވެ. މި މުބާރާތުގެ ފައިނަލަށް ދާނީ ލީގު ބުރުން އެންމެ ރަނގަޅު ނަތީޖާ ނެރޭ ދެ ޓީމެވެ.

ލީގު ބުރުގައި މިހާތަނަށް ކޮންމެ ޓީމަކުންވެސް ދެ މެޗު ކުޅެފައިވާއިރު، އަންނަ އަންގާރަ ދުވަހު މުބާރާތުގެ ލީގު ބުރުގެ ފަހު ދެ މެޗު ކުޅޭނެއެވެ. އެގޮތުން އެ ދުވަހުގެ ހަވީރު ކުޅޭ މެޗުގައި ސީޝެލްސް އާއި ރާއްޖެ ބައްދަލުކުރާއިރު، ދެވަނަ މެޗުގައި އެރޭ ލަންކާ ނުކުންނާނީ ބަންގްލަދޭޝާ ދެކޮޅަށެވެ. މިހާރު އޮތް ގޮތުން ބަންގްލަދޭޝާއި ސީޝެލްސްއަށް އެ މެޗުތައް އެއްވަރުކޮށްލައިގެންވެސް ފައިނަލުގެ ޖާގައެއް ލިބޭނެއެވެ.