ބަންގްލަދޭޝް ބަލިކޮށް ފައިނަލުގެ ފަހު ޖާގަ ލަންކާއަށް

ސްރީ ލަންކާގައި މިހާރު ކުރިއަށްދާ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގައި އަންގާރަ ދުވަހުގެރޭ ކުޅުނު މެޗުން ބަންގްލަދޭޝް ބަލިކޮށް ފައިނަލުގެ ފަހު ޖާގަ ލަންކާއިން ހޯދައިފިއެވެ.

ކޮލޮމްބޯގެ ރޭސްކޯސް ސްޓޭޑިއަމުގައި ކުޅުނު މި މެޗުން ލަންކާ މޮޅުވީ 2-1 ގެ ނަތީޖާއަކުންނެވެ. މި މެޗު އެއްވަރުކޮށްލައިގެންވެސް ބަންގްލަދޭޝަށް ފައިނަލަށް ދެވެން އޮތް ނަމަވެސް، މެޗުން ފަހު ވަގުތު ބަލިވުމުން އެ ޓީމު ވަނީ ކަޓާފައެވެ.

އަންގާރަ ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ލަންކާއިންނެވެ. މެޗުގެ 24 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ވަސީމް ރަޒީކެވެ. އޭގެ ފަހުން ފުރަތަމަ ހާފުގައި ނަތީޖާ އެއްވަރުކުރަން ބަންގްލަދޭޝަށް ޕެނަލްޓީއެއް ލިބުނު ނަމަވެސް، އެ ޓީމުގެ ޓޯޕޫ ބަރްމަން ފޮނުވާލި ޕެނަލްޓީ ދިޔައީ ގޯލާ އަމާޒުނުވެއެވެ. މި ޕެނަލްޓީއަކީ ގޯލު ރޮނގުމަތިން ލަންކާގެ ޑަކްސަން ޕުސްލަސް ބޯޅައިގައި އަތްލުމުން ރެފުރީ ދިން ޕެނަލްޓީއެކެވެ. އަދި ގަސްތުގައި ބޯޅައިގައި އަތްލުމާއެކު ރެފުރީ ވަނީ އޭނާއަށް ސީދާ ރަތް ކާޑެއް ދައްކާފައެވެ.

އެއާއެކު މެޗުގެ ބޮޑުބައި ލަންކާއިން އެއް ކުޅުންތެރިއަކު މަދުކޮށް ކުޅުނުއިރު، މި މެޗުގައި ބަންގްލަދޭޝްއިން ނަތީޖާ އެއްވަރުކޮށްފައިވަނީ މެޗުގެ 72 ވަނަ މިނެޓުގައެވެ. އޭރިއާތެރެއަށް ހުރަސްވި ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު އިބްރާހީމެވެ. އެކަމަކު މެޗު ނިމެން މިނެޓަކަށް ވެފައި ވަނިކޮށް ލިބުނު ޕެނަލްޓީއަކުން ވަސީމް ވަނީ އިތުރު ލަނޑެއް ޖަހައި، މި މެޗުން ލަންކާ މޮޅުކޮށްދީފައެވެ. މިއީ އޭރިއާ ތެރެއިން ބަންގްލަދޭޝްގެ ކުޅުންތެރިއެއްގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ. މި މެޗުގައި ވަސީމް ދެ ލަނޑު ޖެހިއިރު، އޭނާ ވަނީ މިހާތަނަށް މި މުބާރާތުގައި ހަ ލަނޑު ކާމިޔާބުކޮށްފައެވެ.

މި މޮޅާއެކު ތާވަލުގެ ދެވަނައަށް ލަންކާ ޖެހިލީ ކުޅުނު ތިން މެޗުން ލިބުނު ހަތަރު ޕޮއިންޓާއެކުއެވެ. ތިންވަނައަށް ވެއްޓުނު ބަންގްލަދޭޝަށްވެސް ހަތަރު ޕޮއިންޓް ލިބިފައިވާއިރު، ލަންކާއަށް ކުރި ލިބުނީ ޖެހި ލަނޑު އިތުރުވުމުންނެވެ. އަދި އެއްވަނައިގައި އޮތް ސީޝެލްސްއަށް ފަސް ޕޮއިންޓް ލިބިފައިވާއިރު، ފުލުގައި އޮތް ރާއްޖެއަށް ލިބުނީ ދެ ޕޮއިންޓެވެ.

މި މުބާރާތުގެ ފައިނަލަށް ލަންކާ ދަތުރުކުރިއިރު، ފައިނަލުގައި އެ ޓީމު ވާދަކުރަން ޖެހޭނީ ސީޝެލްސްއާއެވެ. އަންނަ ހުކުރު ދުވަހު މި މުބާރާތުގެ ފައިނަލް މެޗު ކުޅޭއިރު، އެ މެޗުގެ ޚާއްސަ މެހެމާނަކީ ދުނިޔޭގެ ފުޓްބޯޅައިގެ މައި ޖަމުއިއްޔާ، ފީފާގެ ރައީސް ޖިއާނީ އިންފަންޓީނޯއެވެ.