ސްރީ ލަންކާގައި ކުރިއަށްދިޔަ "މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް)" ގެ ފައިނަލް މެޗުގައި ޕެނަލްޓީ ޖަހައިގެން ލަންކާ ބަލިކޮށް މުބާރާތުގެ ޗެމްޕިއަންކަން ސީޝެލްސްއިން ހޯދައިފިއެވެ.

ހުކުރު ދުވަހުގެރޭ ކޮލޮމްބޯގެ ރޭސްކޯސް ސްޓޭޑިއަމުގައި ކުޅުނު މި މެޗުން ސީޝެލްސް މޮޅުވީ ޕެނަލްޓީގައި 3-1 ނަތީޖާއަކުންނެވެ. މި މެޗުގެ ޝަރަފުވެރި މެހެމާނަކީ ދުނިޔޭގެ ފުޓްބޯޅައިގެ މައި ޖަމުއިއްޔާ، ފީފާގެ ރައީސް ޖިއާނީ އިންފަންޓީނޯއެވެ.

ފޯރިގަދަ ކުޅުމެއް ފެނުނު މި މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 3-3 ގެ ނަތީޖާއަކުން އެއްވަރުވެފައެވެ. މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ލަންކާއިންނެވެ. މެޗުގެ ވަރަށް ކުރީކޮޅު މި ލަނޑު އެ ޓީމަށް ކާމިޔާބުކޮށްދިނީ މާވިން ހެމިލްޓަންއެވެ. އެކަމަކު ފުރަތަމަ ހާފުގެ އިތުރު ވަގުތުގައި ޖީން ހިއުބާޓް އެމަނުއަލް ވަނީ ސީޝެލްސްއަށް ނަތީޖާ އެއްވަރުކޮށްދީފައެވެ.

މި މެޗުގެ ދެވަނަ ހާފުގައި ލަންކާއިން ދެ ލަނޑުގެ ލީޑެއް ނެގިއިރު، މި ލަނޑުތައް އެ ޓީމަށް ކާމިޔާބުކޮށްދިނީ މުޙައްމަދު އާކިބް އާއި ވަސީމް ރަޒީކެވެ. މި މެޗުގައި ވަސީމް ލަނޑު ޖެހިއިރު، ލަނޑު ލިސްޓުގެ ކުރީގައި އޮތް ވަސީމް ވަނީ މި މުބާރާތުގައި ޖުމްލަ ހަތް ލަނޑު ޖަހާފައެވެ.

މި މެޗުގައި ސީޝެލްސްއިން ނަތީޖާ އެއްވަރުކޮށްފައިވަނީ މެޗުގެ ފަހު ފަސް މިނެޓުގެ ތެރޭގައެވެ. އެގޮތުން ލަންކާގެ ޗަރިތަ ރަތުނަޔަކޭ އަތުން ބައިކޮޅަށް ވަން ލަނޑާއެކު ސީޝެލްސްއިން ފަރަގު ކުޑަކުރިއިރު، މެޗު ނިމެން މިނެޓަކަށް ވެފައި ވަނިކޮށް ބަދަލު ކުޅުންތެރިއެއްގެ ގޮތުގައި ކުޅެން އެރި އެލައިޖާ ވުޑްލީ ވަނީ އެ ޓީމަށް ނަތީޖާ އެއްވަރުކޮށްދީފައެވެ.

އެއާއެކު ނަތީޖާ ނެރުމަށް ޕެނަލްޓީ ޖެހިއިރު، ޕެނަލްޓީގައި ސީޝެލްސްއިން ވަނީ އެ ޓީމުން ފޮނުވާލި ހަތަރު ޕެނަލްޓީގެ ތެރެއިން ތިން ޕެނަލްޓީ ކާމިޔާބުކޮށްފައެވެ. އެކަމަކު ލަންކާއިން ފޮނުވާލި ހަތަރު ޕެނަލްޓީގެ ތެރެއިން އެ ޓީމަށް ކާމިޔާބުވީ ގޯލްކީޕަރު ސުޖަން ޕެރޭރާ ޖެހި ޕެނަލްޓީ އެކަންޏެވެ.

ލަންކާ ބަލިކޮށް މި މުބާރާތުގެ ޗެމްޕިއަންކަން ސީޝެލްސްއިން ހޯދިއިރު، މިއީ ބައިނަލްއަގުވާމީ ފުޓްބޯޅައިގައި އެ ގައުމުގެ ދެވަނަ ކާމިޔާބީއެވެ. އެގޮތުން މީގެ ކުރިން ސީޝެލްސްއަށް ލިބުނު ހަމައެކަނި ބޮޑު ކާމިޔާބަކީ 2011 ވަނަ އަހަރު އަމިއްލަ ގައުމުގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ފުޓްބޯޅައިގެ ރަން މެޑެއްޔެވެ.

ހަތަރު ގައުމު ވާދަކުރި ފޯ ނޭޝަންސް ކަޕުގެ ޗެމްޕިއަންކަން ސީޝެލްސްއިން ހޯދިއިރު، މި މުބާރާތުގައި ދެން ވާދަކޮށްފައިވަނީ ލަންކާގެ އިތުރުން ރާއްޖެ އާއި ބަންގްލަދޭޝެވެ. މި ފަހަރުގެ މުބާރާތް ރާއްޖޭން ނިންމާލާފައިވަނީ މޮޅެއް ނުލިބިއެވެ. މިއީ ފަހުގެ ތާރީޚުގައި ރާއްޖޭން މުބާރާތެއްގެ މެޗަކުން މޮޅުނުވެ ނިންމާލި ފުރަތަމަ މުބާރާތެވެ.