އާރުކާޓީން ތަމްރީން ކުރުމުގެ ޕްރޮގްރާމް ފަށައިފި
އިންޓަނޭޝަނަލް ޔޮޓް ރެލީ ބޭއްވުމަށް ހަމަޖެހިފައި ވަނީ 2022 ވަނަ އަހަރުގެ ފެބްރުއަރީ މަހުގައި
އާރުކާޓީން ތަމްރީން ކުރުމުގެ ޕްރޮގްރާމް ފެށުމުގެ ގޮތުން ބޭއްވި ވާރޗުއަލް ރަސްމިއްޔާތު
މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އާއި މޯލްޑިވްސް ޕޮލިޓެކްނިކް ގުޅިގެން، އިންތިޒާމުކުރި ސަވާދީއްތަ ދަތުރަށް އާރުކާޓީން (ލޯކަލް ޓުއަރގައިޑް) ތަމްރީން ކުރުމުގެ ޕްރޮގްރާމް ފަށައިފިއެވެ.
މި ތަމްރީނު ޕްރޮގްރާމުގެ މަޤްޞަދަކީ ސަވާދީއްތަ ދަތުރަށް ތައްޔާރުވުމުގެ ގޮތުން މިދަތުރުގައި ޒިޔާރަތްކުރާ ރަށްރަށުގައި އާރުކާޓީން ތަމްރީނުކޮށް، ރަށަށް ޒިޔާރަތް ކުރާ ފަތުރުވެރިންނަށް، ރަށުގެ އާޘާރުތަކާއި އަދި ރަށާބެހޭ ފުރިހަމަ މަޢުލޫމާތު ދިނުމަށް މީހުން ތަމްރީނުކުރުމެވެ. މި ތަމްރީން ޕްރޮގްރާމް އިފްތިތާހު ކޮށްދެއްވާފައިވަނީ 31 އޮކްޓޯބަރ 2021 ވަނަ ދުވަހުގެ ހެނދުނު 08:00 ގައި ވާރޗުއަލްކޮށް ބޭއްވުނު ރަސްމިއްޔާތެއްގައި، މިނިސްޓަރ އޮފް ހަޔަރ އެޑިއުކޭޝަން އޮނަރަބަލް ޑޮކްޓަރ އިބްރާހިމް ހަސަންއެވެ.
މި ތަމްރީން ޕްރޮގްރާމް އިފްތިތާޙު ކުރުމުގެ ރަސްމިއްޔާތުގައި، 12 ރަށަކުން 28 ބައިވެރިންނާއެކު، އެމްއައިޓީޑީސީ އާއި މޯލްޑިވްސް ޕޮލިޓެކްނިކް އާއި ހަޔަރ އެޑިޔުކޭޝަން މިނިސްޓްރީގެ އިސް ބޭފުޅުން ވަނީ ބައިވެރިވެވަޑައިގެންފައެވެ. މި ޕްރޮގްރާމަކީ އެމްއައިޓީޑީސީގެ އެދިލެއްވުމަކަށް، މޯލްޑިވްސް ޕޮލިޓެކްނިކުން ހިލޭ ކުރިޔަށް ގެންދާ ޕްރޮގްރާމެކެވެ. މި ކޯސް ފަރުމާކުރެވިފައިވަނީ، އެމްއައިޓީޑީސީން ކުރިޔަށް ގެންދިއުމަށް ހަމަޖެހިފައިވާ ސަވާދީއްތަ ދަތުރުގައި ބަނދަރުކުރެވޭ ރަށްރަށަށް ޒިޔާރަތް ކުރައްވާ ފަތުރުވެރިންނަށް، ފުރިހަމަ މަޢުލޫމާތު ފޯރުކޮށްދެވޭނެ ފަދަ ގޮތަކަށެވެ.
ސަވާދީއްތަ ދަތުރަކީ އެމްއައިޓީޑީސީގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށް ގެންދިޔުމަށް ހަމަޖެހިފައިވާ އިންޓަނޭޝަނަލް ޔޮޓް ރެލީއެކެވެ. މި ރެލީ ބޭއްވުމަށް ހަމަޖެހިފައި ވަނީ 2022 ވަނަ އަހަރުގެ ފެބްރުއަރީ މަހުއެވެ. މިއީ 10 ދުވަހުގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ މި ޔޮޓް ރެލީއެކެވެ.
ފެބްރުއަރީ މަހަކީ އާންމުގޮތެއްގައި ރާއްޖޭގައި އެންމެ ގިނަ އަދަދަކަށް ޔޮޓުފަހަރު ބަނދަރުކުރާ މަހެވެ. މި ރެލީގައި ރާއްޖޭގެ ފަސް އަތޮޅެއްގެ 15 ރަށަކަށް ޔޮޓުތައް ދަތުރުކުރުމަށް ހަމަޖެހިފައިވެއެވެ. އޭގެ ތެރޭގައި މީހުން އާބާދުވެ ދިރިއުޅެމުންދާ 11 ރަށަކާއި 4 ފަޅުރަށެއް ހިމެނެއެވެ. މިރެލީގެ ތީމަކީ ރާއްޖޭގެ ގައުމީ ބަޠަލް އައްސުލްތާން މުހައްމަދު ތަކުރުފާނުލް އައުޒަމްގެ ދިރިއުޅުއްވުމެވެ. އަދި މި ފަހަރުގެ މި ރެލީއަށް ސަވާދިއްތަ ދަތުރުގެ ނަމުން ނަން ދެވުނު ސަބަބަކީ ސަވާދިއްތައަކީ ބޮޑުތަކުރުފާނަށް ނިސްބަތްކޮށް ބޭނުންކުރެވުނު ނަމަކަށް ވާތީއެވެ.
މި ރަސްމިއްޔާތުގައި މިނިސްޓަރ އޮފް ހަޔަރ އެޑިއުކޭޝަން ވަނީ، އެމްއައިޓީޑީސީ އާއި މޯލްޑިވްސް ޕޮލިޓެކްނިކް ގުޅިގެން މިފަދަ މުޙިއްމު ތަމްރީނު ޕްރޮގްރާމެއް ފެއްޓެވީތީ އެފަރާތްތަކަށް އިޚްލާސްތެރިކަމާއެކު ޝުކުރު އަދާކުރައްވާފައެވެ. އަދި މިއީ ރަށްރަށުގައި ފަތުރުވެރިކަން އާލާވެގެން އަންނައިރު، ނުހަނު މުޙިއްމު އަދި ބޭނުންތެރި ތަމްރީނެއްކަމަށް މިނިސްޓަރު ވިދާޅުވިއެވެ. އަދި ފަތުރުވެރިންނަށް ޞައްޙަ މައުލޫމާތުދީ، އަދި އެފަރާތްތައް ހިތްހަމަޖެހޭފަދަ ގޮތަކަށް ޚިދުމަތް ފޯރުކޮށްދިނުމުގެ މުޙިއްމުކަމުގެ މައްޗަށް އަލިއަޅުވާލެއްވިއެވެ. އަދި މި ތަމްރީނު ޕްރޮގްރާމްގެ އެންމެހާ ބައިވެރިން ވެސް، ތަމްރީން ފުރިހަމަކުރުމަށްފަހު އިތުރު ހަރުފަތަކަށް ދިޔުމަށްޓަކައި، މޯލްޑިވްސް ޕޮލިޓެކްނިކްގެ ފަރާތުން ހިންގާ ސެޓްފިކެޓް ލެވެލް 3ގެ ލޯކަލް ގައިޑް ޓްރޭނިންގ ޕްރޮގްރާމް ފުރިހަމަކުރުމަށް ހިތްވަރު ދެއްވިއެވެ.
މުސްތަގުބަލުގައި، މީހުން ދިރިއުޅޭ ހުރިހާ ރަށެއްގައި ވެސް ތަމްރީނު ލިބިފައިވާ އާރުކާޓީން ތިބުމުގެ މުޙިއްމުކަމާއި، މިފަދަ އާރުކާޓީންނަކީ ފަތުރުވެރިންގެ ކުރިމަތީގައި ދިވެހިރާއްޖެ ތަމްސީލުކުރާނެ، ރާއްޖޭގެ އެމްބެސެޑަރުންކަމަށާއި، މިއީ ޒުވާނުން ވަޒީފާގެ މައިދާނަށް ނިކުމެ ބާރުވެރިކުރުވުމަށް އޮތް ފަހި ފުރުޞަތެއްކަން އެންއައިޓީޑީސީގެ މެނޭޖިން ޑިރެކްޓަރ މުޙައްމަދު ރާއިދު ފާހަގަކުރެއްވިއެވެ.
މީގެ އިތުރުން، މިއީ ހަމަ ފެށުމެއްކަމަށާއި، އެމްއައިޓީޑީސީއަކީ ކުދި އަދި މެދުފަންތީގެ ފަތުރުވެރިކަމަށް އަމާޒު ކުރެވިގެން އުފައްދާފައިވާ ސަރުކާރުގެ ކުންފުންޏަކަށްވީ ހިނދު، އެމްއައިޓީޑީސީ އާއި މޯލްޑިވްސް ޕޮލިޓެކްނިކް ގުޅިގެން މުޅި ރާއްޖެއަށް ލޯކަލް ޓޫރިޒަމްއާ ގުޅުންހުރި ތަމްރީނު ޕްރޮގްރާމްތަކެއް ހިންގަވައިދެއްވުމަށް ރާއިދު އެދިވަޑައިގެންނެވިއެވެ.
ސަވާދީއްތަ ދަތުރަކީ ދިވެހިރާއްޖޭގެ ފަތުރުވެރިކަން ސިންދަފާތުކޮށް، ކަލްޗަރަލް ޓޫރިޒަމް ތަޢާރަފްކުރުމަށް، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ގޮވާލެއްވި ގޮވާލެއްވުމަށް އިޖާބަދިނުމުގެ ގޮތުން ފަރުމާކުރެވިގެން ކުރިއަށްދާ ޔޮޓް ރެލީއެއްކަމަށާއި، މިދަތުރަށް ބައިނަލްއަޤްވާމީ އެކިއެކި ފަރާތްތަކުގެ ބޮޑު ތަރުހީބެއް ލިބެމުން އަންނަކަމަށް ވިދާޅުވިއެވެ. އަދި މި ތަމްރީނު ޕްރޮގްރާމްގެ ސަބަބުން ޔޮޓް ރެލީގެ މަޤްބޫލުކަމާއި އިތުބާރު އެތައް ގުނައަކަށް ބޮޑުވެގެން ގޮސްފައިވެއެވެ. މިތަމްރީނު ޕްރޮގްރާމްގައި ކިޔަވައިދެއްވާނީ މޯލްޑިވްސް ޕޮލިޓެކްނިކް މުދައްރިބުންނާއި މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖްގެ ތަޖުރިބާކާރު ބޭފުޅުންނެވެ.
މި ސަވާދީއްތަ ދަތުރުގައި ރާއްޖޭގައި ރޫރަލް އަދި ސެއިލް ޓޫރިޒަމްގެ އިތުރުން ހެރިޓޭޖް ޓޫރިޒަމް ހިމެނޭފަދަ އިވެންޓްތައް ބޭއްވުމަށް އެމްއައިޓީޑީސީން ނިންމާފައިވެއެވެ. އެގޮތުން ދާއިރާއާ ގުޅުންހުރި ގިނަ ފަރާތްތަކާއި ސަވާދީއްތަ ދަތުރުގައި ބަނދަރުކުރާ ރަށްރަށުގެ ކައުންސިލްތަކާއެކު މިހާރުވެސް މަޝްވަރާބައްދަލުވުންތައް ބާއްވަމުންދާކަން ރާއިދު ފާހަގަކުރެއްވިއެވެ.
