އާދިއްތަ ދުވަހު މުޅި ރާއްޖެއިން ކޮވިޑަށް ޕޮޒިޓިވްވީ 146 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ހާމަކޮށްފިއެވެ.

އެޗްޕީއޭއިން ބުނީ ހޮނިހިރު ދުވަހުގެ އިރުއޮއްސި 6:00ން އާދިއްތަ ދުވަހުގެ އިރުއޮއްސި 6:00ށް 3،214 ސާމްޕަލެއް ޓެސްޓުކޮށްފައިވާ ކަމަށެވެ. މީގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 33 މީހުންނާއި, އަތޮޅުތެރެއިން 102 މީހުންނާއި ރިސޯޓުތަކުން 11 މީހުން ކަމަށް އެޗްޕީއޭއިން ބުނެފައިވެއެވެ. މިއާއެކު ކޮވިޑަށް ޕޮޒިޓިވްވީ މީހުންގެ ޖުމްލަ 87،784ށް ވަނީ އަރާފައެވެ.

މިވަގުތު އެކްޓިވް ކޭހުގެ ގޮތުގައި 1،792 ކޭހެއް ގުނަމުންދެއެވެ. މީގެތެރެއިން ހޮސްޕިޓަލުގައި އެޑްމިޓުކޮށްގެން ފަރުވާ ދެމުންދަނީ 30 މީހުންނަށެވެ.

މިހާތަނަށް ބަލިން ފަސޭހަވެފައިވަނީ 85،736 މީހުންނެވެ. އަދި 243 މީހުން ވަނީ ބަލީގައި ނިޔާވެފައެވެ.

މިހާރު ފެންނަ ކޮވިޑު ކޭސްތަކުގެ އަދަދު އިތުރުވެފައިވާއިރު, ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަން ދިނުމަށް ކަމާބެހޭ ފަރާތްތަކުން އަންނަނީ ތަކުރާރުކޮށް އިލްތިމާސް ކުރަމުންނެވެ.