ބާރަށުގައި ހުންނަ ކަނބާ އައިސާ ރަނިކިލެގެފާނުގެ މަޤްބަރާ ހިމާޔަތްކޮށް ފަތުރުވެރިންނަށް ދައްކާލަނީ
މަޤްބަރާ މިހާރު ހުންނަނީ މަގުމަތީގައި ދުއްވާތަކެތި ދުއްވާ ހާމަ މަގެއްގައި
ހއ. ބާރަށުގައި ހުންނަ ކަނބާ އައިސާ ރަނިކިލެގެފާނު މަޤްބަރާ
ހއ. ބާރަށުގައި ހުންނަ ކަނބާ އައިސާ ރަނިކިލެގެފާނުގެ މަޤްބަރާ ހިމާޔަތްކޮށް، ސަޤާފީ ފަތުރުވެރިކަމުގެ ތެރެއިން ފަތުރުވެރިންނަށް ދައްކާލެވޭނެފަދަ "ޓޫރިސްޓް ސްޕޮޓް" އަކަށް އެތަން ހެދުމުގެ މަސައްކަތް ފަށައިފިއެވެ.
ކަނބާ އައިސާ ރަނިކިލެގެފާނުގެ މަޤްބަރާ މިހާރު ހުންނަނީ މަގުމަތީގައި ދުއްވާތަކެތި ދުއްވާ ހާމަ މަގެއްގައެވެ. އެހެންވުމުގެ ސަބަބުން އެ މަޤްބަރާ ތާރީޚީ ގޮތުން ރައްކާތެރިކޮށް، އެތަނަކީ ފަތުރުވެރިންނަށް ވެސް ޝައުޤުވެރިވާނެ ފަދަ ތަނަކަށް ހެދުމުގެ މަސައްކަތް އެ ރަށު ކައުންސިލުން މިހާރު ވަނީ ފަށާފައެވެ.
އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ބާރަށު ކައުންސިލުގެ ރައީސް އަލީ ޝަމީމް ވިދާޅުވީ، އޮކްޓޯބަރު މަހުގެ މެދެއްހާ ހިސާބު ހެރިޓޭޖް މިނިސްޓްރީގެ ޓީމަކުން އައިސް އެ ސަރަޙައްދު ބަލައި، އެކަމާ ގުޅޭ މަޝްވަރާތައް ކައުންސިލާއެކު ކޮށްފައިވާ ކަމަށެވެ. އެގޮތުން ޕްރޮކިއުމަންޓު އުސޫލުން 35،000ށް ވުރެ އަގުދަށް މަސައްކަތްތައް ބިޑު ކުރުމަކާ ނުލައި ކުރެވޭ އުސޫލުން "އަގު ބަލާ" ފޯމު ހުށައެޅުމަށް ހުޅުވާލައި، އެންމެ ކުޑަ އަގެއް ހުށަހަޅާ ފަރާތަކާ މަސައްކަތް ޙަވާލުކޮށްގެން ކުރިއަށް ގެންދިއުމަށް ނިންމަވާފައިވާކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ، އެތަން ރައްކާތެރިކޮށް މަޤްބަރާ ފާހަގަވާނޭހެން އެ ސަރަޙައްދު ތަރައްޤީ ކުރުމަށް ބޭނުންވާ ޑިޒައިން މި ހަފްތާ ތެރޭގައި ލިބޭނެ ކަމަށް ބެލެވޭ ކަމަށެވެ. މިހާރު މިނިސްޓްރީގެ ބަޖެޓުން މި މަސައްކަތް ކުރެވޭނެކަން އަންގަފައިވާކަމަށް ވެސް އޭނާ ވިދާޅުވިއެވެ. ކަނބާ އައިސާ ރަނިކިލެގެފާނަކީ ޢަލީ ރަސްގެފާނުގެ އަނބިކަނބަލުންނެވެ.
އޭގެ އިތުރުން، ކަޅުއޮއްފުންމި ބަނުމަށްޓަކައި ބާރަށުގައި ހަދާފައިވާ ހަރުގެ އަލުން މަރާމާތުކޮށް، ސަޤާފީ ތަރިކައެއްގެ ގޮތުގައި އެތަން ރައްކާތެރި ކުރުމަށްފަހު، އުތީމުގައި މިހާރު އޮތް ކަޅުއޮއްފުންމި ވެސް އެ ހަރުގެއަށް ގެނެސް، ސަޤާފީ ފަތުރުވެރިކަމަށް ބޭނުން ކުރުމަށް ވަނީ މަޝްވަރާ ކުރެވިފައެވެ. މި މަސައްކަތް އަންނަ އަހަރު ބޮޑު ޕްރޮޖެކްޓެއްގެ ގޮތުގައި ކުރިއަށް ގެންދިއުމަށް ނިންމާފައިވާއިރު، މި މަސައްކަތް ކުރިއަށް ގެންދާނެ ގޮތުގެ އޮނިގަނޑެއް މިހާރު އެކުލަވާލަމުން ގެންދަވާކަމަށް ވެސް ޝަމީމް ވިދާޅުވިއެވެ.
ސަގާފީ ފަތުރުވެރިކަމަކީ އިޤްތިޞާދީ މުހިއްމު ވަސީލަތެއް ކަމަށާއި، ސަގާފީ ފަތުރުވެރިކަން އާލާކުރުމަށް ވިސްނުން ބެހެއްޓުމަކީ މުހިއްމު ކަމެއް ކަމަށް ދެކެވަޑައިގަންނަވާ ކަމަށް ރައީސް އިބްރާހިމް މުހައްމަދު ޞާލިޙް ވެސް ވަނީ ވިދާޅުވެފައެވެ. ރައީސް ވިދާޅުވީ، ސަގާފި ތަރިކަ އަކީ ފަތުރުވެރިކަން ވިއްކުމުގައި ދުނިިޔޭގެ ހުރިހާ ގައުމުތަކެއްގައި ވެސް ގެންގުޅޭ އެންމެ މުހިއްމު އެއް ވަސީލަތް ކަމަށެވެ.
ފަތުރުވެރިކަން އިޝްތިހާރު ކުރުމަށްޓަކައި ސަގާފަތާއި ތަރިކާ އަކީ ނަތީޖާ ރަނގަޅު ކަމެއް ކަމުގައި ފާހަގަކުރައްވަމުން އެމަނިކުފާނު ވިދާޅުވީ، އެ ސަބަބަށްޓަކައި ތަރިކަ ރައްކާތެރިކުރަން ޖެހޭނީ އާމްދަނީ ލިބޭ ވަސީލަތެއް ކަމަށް ދެކިގެން ކަމަށެވެ. އަދި އިޤްތިޞާދީ ގޮތުން އަންނަ ލޮޅުންތަކުން އަރައިގަންނަން އެކަމަށް އިސްކަން ދިނުން މުހިއްމު ކަމަށް ވިދާޅުވިއެވެ.
