ކައިވެނި ހަފްލާއަކަށް ޠާލިބާނު ސިފައިންގެ ބަޑީގެ ހަމަލާތަކެއް!
ބަޑީގެ ހަމަލާތަކުގެ ކުރިން ޠާލިބާނު ސިފައިންނާއި، ހަފްލާގެ ބައިވެރިންނާ ދެމެދު ހަމަނުޖެހުންތަކެއް ހިނގި
އަފްޣާނިސްތާނުގައި ޙަރަކާތްތެރިވަމުންދާ ޠާލިބާން ހަނގުރާމަވެރިން
އަފްޣާނިސްތާނުގެ ނަންގަރްހާރް ޕްރޮވިންސްގައި އޮތް ކައިވެނި ހަފްލާއެއްގައި މިއުޒިކް ކުޅުމުން ޠާލިބާނު ސިފައިން އެ ހަފްލާއަށް ބަޑީގެ ހަމަލާތަކެއް ދީ ދެ މީހުން މަރާލައިފިއެވެ.
ރިޕޯޓްތައް ބުނާ ގޮތުން ޠާލިބާން ސިފައިން އެ ހަފްލާއަށް ބަޑީގެ ހަމަލާ ދިނީ މިއުޒިކް ކުޅެން ހުއްޓާލުމަށް ބުނުމަށްފަހުއެވެ. އަދި ބަޑީގެ ހަމަލާތަކުގެ ކުރިން ޠާލިބާނު ސިފައިންނާއި ހަފްލާގެ ބައިވެރިންނާ ދެމެދު ހަމަނުޖެހުމެއް ވެސް ވަނީ ހިނގައިފައެވެ.
ނަންގަރްހާރުގެ ގަވަނަރު ވަނީ ބަޑީގެ ހަމަލާއެއް ހިނގިކަން ކަށަވަރު ކޮށްދީފައެވެ. މިކަމާގުޅިގެން ޠާލިބާނު ޖަމާއަތުގެ ތަރުޖަމާނު ޒަބީހުﷲ މުޖާހިދު ވަނީ ޠާލިބާނުންގެ ސިޔާސަތަކީ މިއުޒިކް ކުޅޭ މީހުން ނޫން ކަމަށް ބުނެ މާފަށް އެދިފައެވެ. އެގޮތުން ޒަބީހުﷲ ވިދާޅުވީ މީހަކު އެހެން މީހަކު މަރައިފިނަމަ އެއީ ކުށެއް ކަމަށެވެ. އަދި މިކަން ހިނގި ގޮތް ރަނގަޅަށް ބަލައި ހައްގު އަދަބު ދޭނެ ކަމަށް ވެސް ޒަބީހުﷲ ވިދާޅުވިއެވެ.
މިކަން ހިނގާފައި މިވަނީ ޠާލިބާނުން ނިމިދިޔަ ހަފްތާގައި ކާބުލްގެ ވައިގެ ބަނދަރުގައި ޓިކެޓް ގަތުމަށް ކިޔޫހަދައިގެން ތިބި އާންމުގެ ބަޔަކު ފައްސާލުމަށް ބަޑިޖަހައި މީހަކު ޒަހަމްކޮށްލާފައިވަނިކޮށެވެ.
މީގެކުރިން ޠާލިބާނުން އަފްޣާނިސްތާނުގައި ވެރިކަން ކުރިއިރު ވެސް އެ ޖަމާއަތުން ވަނީ މިއުޒިކް ކުޅުމަކީ މަނާކަމެއްގެ ގޮތުގައި ކަނޑައަޅާފައެވެ.
