އަފްޣާނިސްތާނުން ކޮޕް-26އަށް ދާން އުޅުނު ބައިވެރިންތަކެއްގެ އެޕްލިކޭޝަން ރިޖެކްޓްކޮށްފި

މޫސުމީ ބަދަލުތަކުގެ ސަބަބުން އަފްޣާނިސްތާނަށް ދިމާވެފައިވާ ގޮންޖެހުންތަކާއި ގުޅޭގޮތުން ކޮޕް-26ގައި މައުލޫމާތު ހިއްސާކުރުމަށް އަފްޣާނިސްތާނުގެ ފަރާތުން ދާން އުޅުނު ތިމާވެށީގެ 6 އެކްސްޕަރޓުންގެ އެޕްލިކޭޝަން ރިޖެކްޓް ކޮށްފިއެވެ.

ދުނިޔޭގެ ފެންވަރުގައި ބޭއްވޭ މިކޮންފަރެންސަށް ދިޔަ ބައިވެރިންތަކެއްގެ އެޕްލިކޭޝަން ރިޖެކްޓްކުރީ ސަމިޓް ފެށެން ދެތިން ދުވަހަށް ވެފައި ވަނިކޮށެވެ. މިބައިވެރިންގެ ތެރޭގައި ހިމެނެނީ 5 ފިރިހެނުންނާއި އަންހެނެކެވެ.

ބައިވެރިން ފުރަތަމަ ތުހުމަތުކުރީ ޔޫކޭގެ ހޯމް އޮފީހުން, ނުވަތަ ފޮރިން ކޮމަންވެލްތު އެންޑް ޑެވެލޮޕްމެންޓް އޮފީސް (އެފްސީޑީއޯ)ން އެމީހުން މި ސަމިޓްގައި ބައިވެރިވުމަށް ހުރަސް އެޅީ ކަމަށެވެ.

މިކަމާގުޅިގެން އެފްސީޑީއޯއިން ބުނީ; އެމީހުންގެ އެޕްލިކޭޝަން ރިޖެކްޓްކުރުމަށް ޔޫކޭ ސަރުކާރުގެ އެއްވެސް އިދާރާއަކުން ނިންމާފައި ނުވާ ކަމަށެވެ. އަދި ޔުނައިޓެޑް ނޭޝަންސް ފްރޭމްވޯރކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ)ން އަފްޣާނިސްތާނުގެ ޑެލިގޭޓުންނަށް މިސަމިޓްގައި ބައިވެރި ނުވެވޭ ގޮތަށް ނިންމާފައިވާ ކަމަށާއި, މިކަމާގުޅޭ އިތުރު ލަފަޔަކަށް, ބިއުރޯ އޮފް ދަ ކޮޕްގައި އެދިފައިވާ ކަމަށްވެސް އެފްސީޑީއޯއިން ބުންޏެވެ.

އަފްޣާނިސްތާނުގެ ފަރާތުން ސަމިޓުގައި ބައިވެރިވާން ގޮސްފައިވާ ފަރާތްތަކަކީ މީގެ ކުރިން ޔޫއެންގެ އެކި ޕްރޮގްރާމު ތަކުގައި ބައިވެރިވެފައިވާ ފަރާތްތަކެވެ.

"އަހަރެމެންގެ ވިސާގެ އިތުރުން ދެންވެސް ފުރިހަމަ ކުރަންޖެހޭ ހުރިހާ ލިޔެކިޔުމެއް ފުރިހަމަކޮށްފައި ވަނިކޮށް, ޔޫއެންއެފްސީސީސީއިން އެއްވެސް މަގުބޫލު އުޒުރެއް ނެތި އަހަރެމެންގެ އެޕްލިކޭޝަން ރިޖެކްޓް ކުރުމަކީ ގަބޫލު ކުރެވޭނެ ކަމެއް ނޫން. މިއީ އަފްޣާނިސްތާނުގެ ތެރޭގައި ހިގަމުންދާ ހަމަނުޖެހުމުގެ ސަބަބުން ނިންމި ނިންމުމެއް ކަމަށް ވެދާނެ." ސަމިޓްގައި ބައިވެރިވުމަށް ދިޔަ ފަރާތަކުން ނުރުހުން ފާޅުކުރިއެވެ.

ޔޫއެންއެފްސީސީސީއިން ބުނީ ސަމިޓްގައި ބައިވެރިވުމަށް އަފްޣާނިސްތާނުގެ ޑެލިގޭޓުން ނޮމިނޭޓްވެފައިވީ ނަމަވެސް, މިވަގުތަށް އެމީހުންގެ އެޕްލިކޭޝަން ވަނީ ރިޖެކްޓް ކުރެވިފައި ކަމަށެވެ.