ލައިފް ޖެކެޓް ގަވާއިދަށް އޭޖީގެ ލަފާ ހޯދައިފި، މިހާރު ކުރިއަށްދަނީ ގެޒެޓު ކުރުމުގެ ފަހު މަރުހަލާ
ސްޓޭކް ހޯލްޑަރުންގެ ލަފައެއް ހޯދުމަށް ފޮނުވާފައިވަނީ 17 އޮކްޓޯބަރުގައި
ކަނޑު ދަތުރުފަތުރުގެ އުޅަނދުތައް- މޫސުން ގޯސް ދުވަސްވަރު މޫސުމަށް ސަމާލުވުމަށް ޚާއްސަ އިސްކަމެއް ދޭންޖެހޭ
އެލާޓް ނެރެފައިވާ ސަރަހައްދުތަކުގައި ދަތުރުކުރާ ހުރިހާ އުޅަނދެއްގެ ފަސިންޖަރުންނާއި ފަޅުވެރިން ލައިފް ޖެކެޓް އެޅުމާއި ގުޅޭ އުސޫލު ހިމަނައި، އެކަންކަން ނުކޮށްފިނަމަ އަންނާނެ އަދަބުތައް ހިމަނައިގެން އެކުލަވާލާފައިވާ ލައިފް ޖެކެޓު ގަވާއިދަށް ބަންޑާރަނާއިބުގެ ލަފާ ހޯދައިފިއެވެ.
މި ގަވާއިދަކީ ނޭޝަނަލް ސަރޗް އެންޑް ރެސްކިއު ކޮމިޓީގެ ލަފަޔާއެކު އެކުލަވާލާފައިވާ ގަވާއިދެކެވެ. އެގޮތުން މި ގަވާއިދަށް ސްޓޭކް ހޯލްޑަރުންގެ ލަފައެއް ހޯދުމަށް ފޮނުވާފައިވަނީ 17 އޮކްޓޯބަރު ވީ އާދިއްތަ ދުވަހުއެވެ. އޭރު ސްޓޭކް ހޯލްޑަރުންނަށް ވަނީ ލަފާ ފޮނުވުމަށް ހަފުތާއެއްގެ މުއްދަތެއް ދީފައެވެ.
މި ގަވާއިދުގެ ކަންކަމާ ގުޅޭ ސްޓޭކް ހޯލްޑަރުންގެ ތެރޭގައި ކޯސްޓްގާރޑާއި، މެރިން ޕޮލިސް، އެމްޕީއެލް އަދި ސެންޓަރ ފޯރ މެރިޓައިމް ކޯޑިނޭޝަން ހިމެނެއެވެ.
އެކަމާ ގުޅޭ ގޮތުން ރާއްޖެއެމްވީއާ ވާހަކަ ދައްކަވަމުން ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ހަމަދު އަބްދުލްޣަނީ ވިދާޅުވީ، ކަމާ ގުޅުންހުރި އިދާރާތަކުގެ ލަފާ ހޯއްދެވުމަށްފަހު މި ގަވާއިދާ ގުޅޭގޮތުން އޭޖީ އޮފީހުގެ ލަފާވެސް މިހާރު ހޯދާފައިވާ ކަމަށެވެ. އަދި މިހާރު ކުރިއަށްދަނީ ގަވާއިދު ގެޒެޓު ކުރުމުގެ ފަހު މަރުޙަލާކަންވެސް ހަމަދު ފާހަގަ ކުރެއްވިއެވެ.
ސްޓޭކް ހޯލްޑަރުންގެ ކޮމެންޓު ލިބުމުން، ފައިނަލް ޑްރާފްޓް ބަންޑާރަނާއިބުގެ އޮފީހަށް ފޮނުވައި، ލަފާ ހޯދުމަށްފަހު، އޮކްޓޯބަރު މަސް ނިމުމުގެ ކުރިން ގަވާއިދު ގެޒެޓު ކުރާނެކަން މިނިސްޓްރީން މީގެ ކުރިން ވަނީ ބުނެފައެވެ.
ޔެލޯ އެލާޓް ނެރެފައިވާ ސަރަހައްދުތަކުގައި ދަތުރުކުރާ ހުރިހާ އުޅަނދެއްގެ ފަސިންޖަރުންނާއި ފަޅުވެރިން ލައިފް ޖެކެޓް އަޅަން މަޖުބޫރުކޮށް، އެކަންކަން ނުކޮށްފިނަމަ އަންނާނެ އަދަބުތައް މި ގަވާއިދުގައި ހިމެނިފައިވާކަމަށް މައުލޫމާތު ލިބެއެވެ. އަދި 2020 ވަނަ އަހަރުގެ ސެޕްޓެމްބަރު މަހުގެ 10 ވަނަ ދުވަހު ނޭޝަނަލް ސަރޗް އެންޑް ރެސްކިއު ކޮމިޓީން ވަނީ އެ ކޮމިޓީން އެކުލަވާލި ވާރކިން ގްރޫޕުގައި މަޝްވަރާކޮށް އެކުލަވާލެވުނު ގަވާއިދަށް އަމަލު ކުރުމުގެ ކަންކަން ކުރިއަށް ގެންދެވުމުގައި އިއުތިރާޒެއް ނެތްކަމަށް ޓްރާންސްޕޯޓު އޮތޯރިޓީއަށް މީގެ ކުރިން ވެސް އަންގާފައެވެ. އެގޮތުން ގަވާއިދު ހެދުމުގެ ބާރު ދީފައި އޮންނަނީ ޓްރާންސްޕޯޓު އޮތޯރިޓީއަށް ނަމަވެސް، ބައެއް އިދާރީ މައްސަލަތަކުގެ ސަބަބުން ގަވާއިދު ގެޒެޓު ކުރުން ފަސްވެގެން ދިޔައީއެވެ.
މިފަހުން ކަނޑުމަތީގެ ހާދިސާތައް އިތުރުވެގެން ދިއުމާއެކު، ލައިފް ޖެކެޓު ގަވާއިދުގެ ވާހަކަތައްވެސް ފެންމަތިވެގެން ދިޔައެވެ. އެގޮތުން މޫސުން އިންތިހާއަށް ގޯސްވެ، ދަތުރުފަތުރުގެ ސަމާލުތައް ނެރެފައި އޮއްވައި ކަނޑުމައްޗަށް ނުކުތް ލޯންޗެއްގައި ތިބި ބަޔަކު ކަނޑަށް ވެއްޓުނު ޙާދިސާގައި 33 އަހަރުގެ އަންހެނަކު މަރުވެފައިވާއިރު، އޭނާގެ ތުއްތު ދަރިފުޅު އަދިވެސް ނުފެނެއެވެ. އެއީ އުމުރުން އެންމެ 4 އަހަރުގެ ކުއްޖެކެވެ.
