ހުޅުމާލެ ދެވަނަ ފިޔަވަހީގައި އިމާރާތް ކުރި ފުރަތަމަ މިސްކިތް, "މަސްޖިދް ޢަމީލް ޖަލީލް" ހުޅުވައިފިއެވެ.
ހުކުރު ނަމާދަށް އެ މިސްކިތް ހުޅުވާދެއްވީ ހޯމް މިނިސްޓަރ ޢިމްރާން ޢަބްދުﷲއެވެ. މިއީ ދެ ފަންގިފިލާއަށް ހަދާފައިވާ، 480 މީހުންގެ ޖާގައިގެ މިސްކިތެކެވެ. މި މިސްކިތުގައި, މިސްކިތުގެ ގޯތި ތެރެއާއެކު 700 މީހުންނަށް އެއްފަހަރާ ނަމާދު ކުރެވޭނެއެވެ.
މި މިސްކިތް އިމާރާތްކުރީ 24 އޮގަސްޓް 1994ގައި ނިޔާވި މާލެ، ގ. ފަހިވާގެ އަހްމަދު ޢަމީލް ޖަލީލްގެ ހަނދާނުގައި، އޭނާގެ ދެ ދަރިކަލުންނެވެ.
ހުޅުމާލެ ދެވަނަ ފިޔަވަހީގައި ދޫކޮށްފައިވާ ގޯތިތަކާ ކައިރީގައި ހުންނަ މިސްކިތުގައި ފިރިހެނުންނަށް ނަމާދު ކުރަން ޚާއްސަ ބަޔަކާއި އަންހެނުންނަށް ނަމާދު ކުރަން ޚާއްސަ ބައެއް ވަނީ ހަދާފައެވެ. މިސްކިތުގައި ލައިބްރަރީއަކާއި ކަލާސްރޫމް ބައެއް ހިމެނެއެވެ.
މި މިސްކިތް ޑިޒައިންކުރީ "އިންސައިޑް ޕްލަސް"ކިޔާ ކުންފުންޏަކުންނެވެ. އަދި މިސްކިތް އިމާރާތް ކުރީ "ޒާން ކޮންސްޓްރަކްޝަން ކޮމްޕެނީ"ންނެވެ.
