ކޮޕް26 ކޮންފަރެންސްގައި ބައިވެރިވެވަޑައިގެންނެވުމަށް ރައީސް ނަޝީދު ފުރާވަޑައިގެންފި
29 އޮކްޓޯބަރު 2021 | ހުކުރު 05:49މިއަހަރުގެ ކޮޕް ސަމިޓުގައި 100ށްވުރެ ގިނަ ޤައުމުތަކުގެ އެންމެ އިސްވެރިން ބައިވެރިވުމަށް ވަނީ ހަމަޖެހިފައި
މުހައްމަދު ނަޝީދު
ކޮޕް26 ކޮންފަރެންސްގައި ބައިވެރިވެވަޑައިގެންނެވުމަށް ރައްޔިތުންގެ މަޖިލީހުގެ ރައީސް، ރައީސް ނަޝީދު ސްކޮޓްލެންޑަށް ފުރާވަޑައިގެންފިއެވެ.
އެމަނިކުފާނު ފުރާވަޑައިގެންނެވީ ހުކުރު ދުވަހުގެ ހެނދުނުގެ ވަގުތެއްގައެވެ. ދުނިޔޭގެ އެންމެ ބޮޑު ތިމާވެށީގެ ސަމިޓް ކޮޕް26 ފަށާނީ އަންނަ އާދީއްތަ ދުވަހުއެވެ. މިއަހަރުގެ ކޮޕް ސަމިޓުގައި 100ށްވުރެ ގިނަ ޤައުމުގެ އެންމެ އިސްވެރިން ބައިވެރިވެވަޑައިގަތުމަށް ވަނީ ހަމަޖެހިފައެވެ. މި ސަމިޓު ބާއްވަނީ ސްކޮޓްލޭންޑްގެ ގްލާސްގޯވގައެވެ.
މިފަހަރުގެ ސަމިޓުގައި ދުނިޔޭގެ 100 އަށްވުރެ ގިނަ ޤައުމުގެ ރައީސުން ބައިވެރިވެވަޑައިގަންނަވައެވެ. މިއީ 2015 ވަނަ އަހަރުގެ ޕެރިސް އެގްރިމަންޓަށްފަހު ބާއްވާ މިފަދަ އެންމެ ވަރުގަދަ ބައްދަލުވުމަށް ވާނެކަމަށް ބައެއް ޤައުމުތަކުން ދެކެއެވެ.
ކޮޕް26 ސަމިޓްގައި ޔޫރަޕިއަން ޔޫނިއަން (އީޔޫ)އިން, ފަގީރު ގައުމުތަކަށް މޫސުމީ ބަދަލުތަކާ ގުޅިގެން ދޭ އެހީ އިތުރުކުރުމަށް ބާރު އަޅާނެކަމަށް އީޔޫއިން ބުނެއެވެ. މިކަމާގުޅިގެން އީޔޫއިން ބުނެފައިވަނީ މޫސުމީ ބަދަލުތަކާ ގުޅިގެން މުއްސަނދި ގައުމުތަކުން ދިނުމަށް އެއްބަސްވެފައިވާ 100 ބިލިއަން އެމެރިކާ ޑޮލަރާ ހަމައަށް ވާސިލުވުމަށް ކޮޕް26 ސަމިޓްގައި އެގައުމުތަކަށް ބާރު އަޅާނެކަމަށެވެ. އީޔޫގެ ބަޔާނުގައި ބުނެފައިވަނީ އީޔޫގައި ހިމެނޭ 27 ގައުމުން މިހާރު ވެސް އަހަރަކު 25 ބިލިއަން އެމެރިކާ ޑޮލަރު ދެމުންދާކަމަށެވެ.
2009 ވަނަ އަހަރު މުއްސަނދި ގައުމުތަކުން ވަނީ 2020 ވަނަ އަހަރު އަންނަންވާއިރަށް އަހަރަކު 100 ބިލިއަން އެމެރިކާ ޑޮލަރު ފަގީރު ގައުމުތަކަށް ދޭނެކަމަށް އެއްބަސްވެފައެވެ. ނަމަވެސް އެޓާގެޓަށް ވާސިލުވެވިފައެއްނުވެއެވެ.
