ބިން ނެތުމުން ފްލޯޓިންގ ސޯލާ ޓެކްނޮލޮޖީ ގާއިމްކުރުމުގެ މަސައްކަތްތައް ކުރަމުންދާ ކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.

ކަރަންޓު އުފެއްދުމަށް އެތެރެކުރާ ތެލަށް ބަރޯސާވާ މިންވަރު ކުޑަކޮށް، ހަކަތައިގެ ރައްކާތެރިކަން އިތުރުކުރުމަށް އިޔާދަކުރަނިވި ހަކަތައިން ކަރަންޓު އުފައްދާ ފޯރުކޮށްދޭ ނިޒާމުތައް ގާއިމުކުރުމަށް މިސަރުކާރުން ދަނީ ގިނަ މަސައްކަތްތައް ކުރަމުންނެވެ. މިމަސައްކަތްތަކާ ބެހޭ ގޮތުން ރާއްޖެއެމްވީއަށް ދެއްވި ޚާއްސަ އިންޓަވިޔުއެއްގައި މިނިސްޓަރު ޝައުނާ ވިދާޅުވީ މިހާރު ވެސް ހަކަތަ ދާއިރާ ކުރިއެރުވުމަށް ކަމާބެހޭ ފަރާތްތަކާ މަޝްވަރާ ކުރެވި، ގިނަ މަސައްކަތްތައް ކުރަމުންދާ ކަމަށެވެ.

މިނިސްޓަރު ޝައުނާ ވިދާޅުވީ 2030 ވަނަ އަހަރުގެ ނިޔަލަށް ދިވެހިރާއްޖޭގެ ކާބަން އެމިޝަންސް، ނެޓް ޒީރޯއަށް ހެދުމަށް ރާއްޖެއިން އަމާޒު ހިފާފައިވާތީ އެ ޓާގެޓަށް ދިއުމަށް މަސައްކަތް ކުރާ ކަމަށެވެ. އަދި މިހާރު އިންސްޓޯލް ކެޕޭސިޓީއަށް ބަލާއިރު ޕީކްގެ ވަގުތު އިޔާދަކުރަނިވި ހަކަތަ (ރިނިއުބަލް ސޯސް) ދެވެނީ ގާތްގަނޑަކަށް 12 އިންސައްތަކަން މިނިސްޓަރު ޝައުނާ ފާހަގަކުރެއްވިއެވެ.

އޭޝިއަން ޑިވެލޮޕްމެންޓް ބޭންކް، (އޭޑީބީ)ގެ އެހީތެރިކަމާއެކު މުޅި ރާއްޖޭގެ ބޮޑު އިންސައްތައަކަށް ސޯލަރ އިންސްޓޯލް ކުރުމުގެ މަސައްކަތް ކުރަމުންދާކަން ފާހަގަކުރައްވައި މިނިސްޓަރު ޝައުނާ ވިދާޅުވީ ބެޓްރީ އެނާޖީ ސްޓޯރޭޖް ސިސްޓަމެއް ރަށްރަށުގައި ގާއިމް ކުރެވޭނެ ކަމަށެވެ. އެގޮތުން މިހާރު ވެސް އައްޑޫ ސިޓީގައި އެއް މެގަވޯޓުގެ ބެޓަރީ އެނާޖީ ސްޓޯރޭޖް ސިސްޓަމް ގާއިމް ކުރެވި ކޮމިޝަން ކުރުމުގެ މަސައްކަތް މިހާރު ކުރެވިފައިވާ ކަމަށް މިނިސްޓަރު ޝައުނާ ވިދާޅުވިއެވެ.

މީގެ އިތުރުން މިނިސްޓަރު ޝައުނާ ވިދާޅުވީ ސޯލާ އިންސްޓޯލް ކުރާއިރުގައި ބިން ބޭނުންވާ ކަމަށާއި، ރާއްޖޭގެ ގިނަ ރަށްރަށުގައި އެކަންކަން ކުރެވޭނެ ބިން ނެތް ކަމަށެވެ. އެހެންކަމުން ފްލޯޓިންގ ސޯލާ ޓެކްނޮލޮޖީ ތައާރަފް ކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށް މިނިސްޓަރު ޝައުނާ ވިދާޅުވިއެވެ. އަދި އައްޑޫގައި 10 މެގަވޯޓުގެ ފްލޯޓިން ސޯލަރ ކުރިއަށް އޮތް އަހަރުތަކުގެ ތެރޭގައި ގާއިމްކުރެވޭނެ ކަމަށް މިނިސްޓަރު ޝައުނާ ވިދާޅުވިއެވެ.

ތެޔޮ އަންދައިގެން ކަރަންޓު އުފެއްދުމަކީ ބޮޑު ޚަރަދެއް ހިނގާ ކަމެއް ކަމަށެވެ. އެހެންކަމުން ޑީސަލް ތެލަށް ބަރޯސާވާ މިންވަރު ކުޑަކުރެވޭނެ އެންމެ ފައިދާހުރިގޮތަކީ ރާއްޖެއިން ލިބެންހުރި އިޔާދަކުރަނިވި ހަކަތައިގެ ގުދުރަތީ ވަސީލަތްތައް ބޭނުންކޮށްގެން ކަރަންޓު އުފައްދާ، ބޭނުންކުރުމެވެ. އެގޮތުން އެފަދަ ގޮތްތައް ހޯދާ ދެނެގަތުމަކީ މުހިންމު ކަމެއް ކަމަށް އެންވަޔަރަންމަންޓް މިނިސްޓްރީން ބުނެއެވެ.

ރާއްޖެއިން ލިބެންހުރި އިޔާދަކުރަނިވި ހަކަތައިގެ ގުދުރަތީ ވަސީލަތްތައް ހޯދައި، އެ ވަސީލަތްތައް ހެޔޮގޮތުގައި ބޭނުންކުރުމަކީ ސަރުކާރުގެ މުހިއްމު ސިޔާސަތަކަށްވާއިރު، ވަޔާއި، ކަނޑުގައި އުފެދޭ ރާޅާއި، އޮއިވަރާއި، ކަނޑުގެ އަޑިޔާއި މަތީފަށަލައިގެ ފިނިހޫނުމިން ބޭނުންކޮށްގެން ކަރަންޓު އުފެއްދުމަކީ ވެސް ދެމެހެއްޓެނިވި ގޮތުގައި ކަރަންޓު އުފެއްދުމަށް ދިވެހިންނަށް ލިބިފައިވާ ގުދުރަތީ ވަސީލަތެކެވެ.