މޫސުމީ ބަދަލުތަކާ ގުޅިގެންދޭ ފަންޑު އިތުރުކުރުމަށް އީޔޫއިން ކޮޕް26 ސަމިޓްގައި ބާރުއަޅަނީ

ކުރިޔަށް އޮތް ކޮޕް26 ސަމިޓްގައި ޔޫރަޕިއަން ޔޫނިއަން (އީޔޫ)ން, ފަގީރު ގައުމުތަކަށް މޫސުމީ ބަދަލުތަކާ ގުޅިގެން ދޭ އެހީ އިތުރުކުރުމަށް ބާރު އަޅާނެކަމަށް އެކޮމިޝަނުން ބުނެފިއެވެ.

އެކަމާގުޅިގެން އީޔޫން ބުނެފައިވަނީ; މޫސުމީ ބަދަލުތަކާއި ގުޅިގެން މުއްސަނދި ގައުމުތަކުން ދިނުމަށް އެއްބަސްވެފައިވާ 100 ބިލިއަން އެމެރިކާ ޑޮލަރާ ހަމައަށް ވާސިލުވުމަށް ކޮޕް26 ސަމިޓްގައި އެގައުމުތަކަށް ބާރު އަޅާނެކަމަށެވެ. އީޔޫގެ ބަޔާނުގައި ބުނެފައިވަނީ އީޔޫގައި ހިމެނޭ 27 ގައުމުން މިހާރުވެސް އަހަރަކު 25 ބިލިއަން އެމެރިކާ ޑޮލަރު ދެމުންދާކަމަށެވެ.

2009 ވަނަ އަހަރު މުއްސަނދި ގައުމުތަކުން ވަނީ 2020 ވަނަ އަހަރު އަންނަންވާއިރަށް އަހަރަކު 100 ބިލިއަން އެމެރިކާ ޑޮލަރު ފަގީރު ގައުމުތަކަށް ދޭނެކަމަށް އެއްބަސްވެފައެވެ. ނަމަވެސް އެޓާގެޓަށް ވާސިލުވެވިފައެއްނުވެއެވެ.

މިހަފްތާތެރޭގައި ހާމަކޮށްފައިވާ ތަފާސްހިސާބުތަކަށް ބަލާއިރު އެ ޓާގެޓަށް 2030 ވަނަ އަހަރުގެ ކުރިން ވާސިލެއް ނުވާނެއެވެ. މިއާއެކު އޮކްޓޯބަރ މަހުގެ 31 ވަނަ ދުވަހު ފެށޭ ކޮޕް26 ސަމިޓްގައި އަނެއްކާވެސް ހުސްވާހަކަތެއް ދެކެވިދާނެކަމުގެ ބިރު ވަނީ ހީވެފައެވެ.

މިއަހަރުގެ ކޮޕް26 ސަމިޓްގައި ބައިވެރިވުމަށް ދުނިޔޭގެ ގައުމުތަކުގެ ލީޑަރުން މިހާރު ގެންދަވަނީ އިނގިރޭސިވިލާތަށް ވަޑައިގަންނަވަމުންނެވެ.