ރާއްޖޭގެ ފަތުރުވެރިކަން ކުރިއެރުވުމަށް އެމިރޭޓްސްއާއެކު އެއްބަސްވުމެއްގައި ސޮއިކޮށްފި

އެމިރޭޓްސްއާއި ރާއްޖެއާ ދެމެދު އެއްބަސްވުމެއްގައި ސޮއިކޮށްފިއެވެ.

އެމިރޭޓްސްއާއި ދިވެހިރާއްޖޭގެ ޓޫރިޒަމް މިނިސްޓްރީއާ ދެމެދު މި އެއްބަސްވުމުގައި ސޮއިކޮށްފައިވަނީ ދުބާއީގައި މިވަގުތު ކުރިއަށްދާ ދުބާއީ އެކްސްޕޯގައި ބައިވެރިވެވަޑައިގަތުމަށް ރާއްޖޭގެ ވަފުދެއް އެގައުމަށް ކުރައްވަމުންގެންދަވާ ދަތުރުފުޅުގައެވެ. އެއްބަސްވުމުގައި ސޮއިކުރުމުގެ ރަސްމިއްޔާތުގައި އެގައުމުގެ ބޮޑުވަޒީރު، އެމިރޭޓްސްގެ ޗެއާމަން އަދި ޗީފް އެގްޒެކިއުޓިވް ޝައިޚް މުހައްމަދު ބިން ރާޝިދު އަލް މަޚްތޫމާއި، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ބައިވެރިވެވަޑައިގެންނެވިއެވެ.

މި އެއްބަސްވުމުގައި އެމިރޭޓްސްގެ ފަރާތުން ސޮއިކުރެއްވީ އެ އެއާލައިންގެ ހުޅަނގު އޭޝިއާ ސަރަހައްދަށާއި، އިންޑިއާ ކަނޑުގެ ސަރަހައްދުގެ ގައުމުތަކަށް ކަނޑައަޅުއްވާފައި ހުންނަވާ އެސްވީޕީ ކޮމަރޝަލް އަހުމަދު ޚޫރީއެވެ. އަދި ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ ޓޫރިޒަމް މިނިސްޓަރ ޑރ. އަބްދުﷲ މައުސޫމްއާއި، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ސީއީއޯ އަދި މެނޭޖިން ޑިރެކްޓަރ ތޮއްޔިބު މުހައްމަދެެވެ.

މި އެއްބަސްވުމުގެ ސަބަބުން އެމިރޭޓްސްއިން ރާއްޖެއަށް ކުރަމުން އައި ދަތުރުތައް އިތުރަށް ދެމެހެއްޓުމާއި، ރާއްޖޭގެ ފަތުރުވެރިކަން އިތުރަށް ފަށައިގަތުމަށް ކުރެވޭ މަސައްކަތަށް އިތުރަށް އެހީވުން ހިމެނެއެވެ.

މި އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން އެސްވީޕި ކޮމަރޝަލް އަހުމަދު ޚޫރީ ވިދާޅުވީ ރާއްޖެއަކީ އެމިރޭޓްސްއަށް މުހިންމު މާކެޓެއް ކަމަށާއި، އެ އެއާލައިނުން ރާއްޖެއަށް ދަތުރުކުރުމަށް ވެފައިވާ އެއްބަސްވުން އައުކުރެވޭކަމީ އުފާކުރައްވާ ކަމެއް ކަމަށެވެ. އެމިރޭޓްސްއިން ރާއްޖެއަށް ދަތުރުތައް ބާއްވާތާ 34 އަހަރު ވެފައިވާކަމަށާއި، ރާއްޖެއާ ދެމެދު އޮތް މި ގުޅުން އިތުރަށް ބަދަހިކޮށް ދެގައުމުގެ ވެސް ފަތުރުވެރިކަމާއި، ވިޔަފާރި ކުރިއަރުވަން އިތުރު މަސައްކަތްތަކެއް ކުރެވޭނެ ކަމަށް އުންމީދުކުރައްވާކަމަށް ޚޫރީ ވިދާޅުވިއެވެ.

މި ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ މި އަހަރުގެ މިހާތަނަށް އައިއިރު އެމިރޭޓްސްއިން ރާއްޖެއަށް 1،000 އަށްވުރެ ގިނަ ދަތުރުކޮށް 170،000 އަށްވުރެ ގިނަ ފަސިންޖަރުން ގެނެސްފައިވާކަން ފާހަގަކުރައްވާފައެވެ. އެމިރޭޓްސްއިން ދަނީ ރާއްޖޭގެ ފަތުރުވެރިކަން ކުރިއަރުވަން ކުރާ މަސައްކަތުގެ މުހިންމު ބައިވެރިއަކަށް ވެފައި ކަމަށް މިނިސްޓަރ ވިދާޅުވިއެވެ. އެމިރޭޓްސްއާއެކު މި ވެވުނު އެއްބަސްވުމުގެ ސަބަބުން ރާއްޖެއާ އެހެން ގައުމުތަކާ ގުޅުވައިދީ ރާއްޖޭގެ ފަތުރުވެރިކަން ކުރިއަރުވައި ރާއްޖެ އިތުރަށް އިޝްތިހާރުވެގެންދާނެކަން ޔަގީންކުރައްވާ ކަމަށް މިނިސްޓަރ މައުސޫމް ވިދާޅުވިއެވެ.

މިއަހަރުގެ މިހާތަނަށް ރާއްޖެ އައި ފަސިންޖަރުންގެ އެންމެ ބޮޑު ބައެއް ހިއްސާކުރަނީ ޔޫއޭއީންނެވެ. އަދި ފަތުރުވެރިކަމުގެ ޓޮޕް މާކެޓުތަކުގެ ތެރޭގައި ވެސް ޔޫއޭއީ ހިމެނެއެވެ.