ރަސްފަރި ފަރަށް ލިބުނު ގެއްލުން 893 މިލިއަނަށް އަރާ، ދައްކަންޖެހޭނީ 100 މިލިއަން
27 އޮކްޓޯބަރު 2021 | ބުދަ 08:38އީޕީއޭއާއި އެމްއެންޑީއެފް ގުޅިގެން އެ ސަރަޙައްދު ބަލައި ސާރވޭ ކުރުމުގެ މަސައްކަތް ކުރި
ކ. ރަސްފަރީ ފަރަށް އެރި ބޯޓު
ކ. ރަސްފަރީގެ ހުޅަނގު ފަރާތު ފަރަށް އެރި ކާގޯ ބޯޓުގެ ސަބަބުން 893 މިލިއަން ރުފިޔާގެ ގެއްލުން ލިބިފައިވާކަމަށް އެންވަޔަރމެންޓް ޕްރޮޓެކްޝަން އޭޖެންސީ (އީޕީއޭ) އިން ބުނެފިއެވެ.
ރަސްފަރީގެ ފަރަށް "އެމް.ވީ ނެވިއޯސް އެމެރައިލިސް" ނަމަކަށް ކިޔާ އުޅަނދު އަރާފައިވަނީ 19 އޯގަސްޓް 2021ގައެވެ. އެކަމާ ގުޅޭގޮތުން އީޕީއޭއިން ނެރުނު ބަޔާނެއްގައި ބުނީ، އެ ފަރުގެ މާހައުލަށް ލިބުނު ގެއްލުންތަކަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ޤަވާޢިދުގެ ދަށުން 100,000,000.00 (އެއްސަތޭކަ މިލިއަން) ދިވެހި ރުފިޔާއިން އެ އުޅަނދުގެ ވެރިފަރާތް ޖޫރިމަނާ ކުރެވިފައިވާ ކަމަށެވެ.
އީޕީއޭއިން ވަނީ 30 ދުވަހުގެ ތެރޭގައި ޖޫރިމަނާގެ ފައިސާ ދެއްކުމަށް އެ އުޅަނދުގެ ދިވެހިރާއްޖޭގެ އެޖެންޓު، އެންޓްރެކް ހޯލްޑިން ޕްރައިވެޓް ލިމިޓެޑަށް 25 އޮކްޓޫބަރު 2021 ގައި އަންގާފައެވެ.
އެ އުޅަނދުތައް ފުންކޮށް ނިމުމުން އެ ސަރަޙައްދުގެ ތިމާވެއްޓަށް ލިބުނު ގެއްލުންތައް ބެލުމަށް އީޕީއޭއާއި އެމްއެންޑީއެފް ގުޅިގެން އެ ސަރަޙައްދު ބަލައި ސާރވޭ ކުރުމުގެ މަސައްކަތް ވަނީ ކުރިއަށް ގެންގޮސްފައެވެ. އެކަމާ ގުޅޭ ފަހުގެ ތަފްސީލުތައް ހިއްސާކޮށް އީޕީއޭއިން ބުނީ، މިހާތަނަށް ބެލި ބެލުމުން އެ ފަރުގެ 8867 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބިފައިވާކަން ފާހަގަވާ ކަމަށެވެ.
މި މައްސަލައިގައި ތިމާވެއްޓަށް ލިބުނު ގެއްލުންތައް ބަލައި ވަޒަންކޮށް ކަނޑައެޅުނު ޖުމްލަ ޖޫރިމަނާއާއި ބަދަލުގެ ޢަދަދަކީ 893,952,569.83 ( އަށްސަތޭކަ ނުވަދިހަ ތިން މިލިއަންނުވަލައްކަ ފަންސާސް ދެހާސް ފަސްސަތޭކަ ފަސްދޮޅަސް ނުވައެއް ރުފިޔާ އަށްޑިހަ ތިންލާރި) ކަން އީޕީއޭއިން ފާހަގަކުރެއެވެ. ނަމަވެސް، ޤާނޫނު ނަންބަރު:4/93ގެ ދަށުން ޖޫރިމަނާގެ ގޮތުގައި ކަނޑައެޅެން އޮންނަ އެންމެ ބޮޑު ޢަދަދަކީ 100 (އެއްސަތޭކަ) މިލިއަން ރުފިޔާ ކަމުގައިވާތީ، ޖޫރިމަނާގެ ގޮތުގައި 100 މިލިއަން ދައްކާ ޚަލާސްކުރުމަށް އެންގީއެވެ.
އީޕީއޭއިން މައުލޫމާތު ދޭ ގޮތުގައި ރަސްފަރީގެ ފަރަށް ލިބިފައިވާ ގެއްލުމުގެ ބަދަލު ހޯދުމުގެ މަސައްކަތް ޤާނޫނު ނަންބަރު:4/93 ގެ 10 ވަނަ މާއްދާގެ ދަށުން ޝަރީޢަތް މެދުވެރިކޮށް އެޓަރނީ ޖެނެރަލްގެ އޮފީހާ އެކުގައި ވަނީ ފެށިފައެވެ. ރަސްފަރިއާއި އެ ރަށުގެ ވަށައިގެންވާ ފަރަކީ ޤާނޫނު ނަންބަރު:4/93 ގެ ދަށުން 27 ސެޕްޓެމްބަރު 1995 އިން ފެށިގެން ޙިމާޔަތްކޮށްފައިވާ ސަރަޙައްދެއްކަން އީޕީއޭއިން ފާހަގަކުރެއެވެ.
