ބާރުތައް ނިގުޅައިގަތީ ދާޚިލީ ހަމަނުޖެހުން ހުއްޓުވަން
27 އޮކްޓޯބަރު 2021 | ބުދަ 03:44ހައްޔަރުކުރީ އަސްކަރިއްޔާއާ ދެކޮޅަށް މަސައްކަތްކުރަމުން އަންނަ މިނިސްޓަރުން
ސޫދާންގެ އަސްކަރިއްޔާގެ ޗީފް، ޖެނެރަލް އަބްދުލް ފައްތާޙް އަލްބުރްހާން
ސަރުކާރުގެ ބާރުތައް ނިގުޅައިގަތީ ދާޚިލީ ހަމަނުޖެހުންތައް ހުއްޓުވަން ކަމަށް ސޫދާންގެ އަސްކަރިއްޔާގެ ޗީފް ޖެނެރަލް އަބްދުލް ފައްތާޙް އަލްބުރްހާން ވިދާޅުވެއްޖެއެވެ.
ސޫދާންގެ އަސްކަރިއްޔާއިން ވަނީ ބަޣާވާތްކޮށް މިދިޔަ ހޯމަ ދުވަހު އެގައުމުގެ ބޮޑުވަޒީރު އަބްދުﷲ ހަމްދޫކްގެ އިތުރުން ގިނަ މިނިސްޓަރުންތަކެއް ހައްޔަރުކޮށްފައެވެ. މިކަމާ ގުޅިގެން ގިނަ ރައްޔިތުންތަކެއް މުޒާހަރާ ކުރަމުން އަންނަނިކޮށް މީޑިއާ އާ މުޚާތަބުކޮށް އަބްދުލް ފައްތާޙް ވިދާޅުވީ ސިޔާސީ ފަރާތްތަކެއް ހައްޔަރުކޮށް ސަރުކާރުގެ ބާރުތައް ނިގުޅައިގަތީ ގައުމުގެ ދާޚިލީ ހަމަނުޖެހުންތައް ހުއްޓުވަން ކަމަށެވެ. މިއީ މިނިސްޓަރުން ހައްޔަރުކުރުމާ ގުޅިގެން ސޫދާންގެ އަސްކަރިއްޔާއިން ވާހަކަ ދެއްކި ފުރަތަމަ ފަހަރެވެ.
މިކަމާ ގުޅިގެން ފައްތާހު އިތުރަށް ވިދާޅުވީ ހައްޔަރުކުރީ އަސްކަރިއްޔާއާ ދެކޮޅަށް މަސައްކަތް ކުރަމުން އަންނަ މިނިސްޓަރުން ކަމަށެވެ. އަދި ހައްޔަރުކުރި ފަރާތްތަކަށް އެއްވެސް ގެއްލުމެއް ދީފައި ނުވާނެ ކަމަށާއި އެމީހުން މިހާރު ވަނީ ފައްތާޙްގެ ގެއަށް ގެންގޮސްފައި ކަމަށެވެ. "ބޮޑުވަޒީރު މީގެ ކުރިން ހުންނެވީ އޭނާގެ ގެކޮޅުގައި. އެކަމަކު އޭނާއަށް ލިބިދާނެ ގެއްލުމަކަށް ބަލައި މިހާރު ވާނީ އަޅުގަނޑު (ފައްތާޙް) ގެ ގެއަށް އޭނާ ގެނެވިފައި" ކަމަށް ވެސް ފައްތާޙް ވިދާޅުވިއެވެ.
ފައްތާޙްގެ ގޭގައި ބެހެއްޓުމަށްފަހު ހަމްދޫކް އާއި އޭނާގެ އަނބިކަނބަލުން މިހާރު ވަނީ އެމީހުންގެ ގެއަށް ދޫކޮށްލާފައެވެ. އެކަމަކު އޭނާއަށް އޮތީ ކިހާ ވަރެއްގެ މިނިވަންކަމެއްކަން ނުވަތަ މީޑީއާ އާ ވާހަކަ ދެއްކުމުގެ ހުއްދަ އޮތްކަމެއް އަދި ހާމައެއް ނުކުރެއެވެ.
ސޫދާންގައި ބަޣާވާތްކޮށް ވެރިކަން ފުރޮޅާލީ 2019 ވަނަ އަހަރުއެވެ. އޭގެ ފަހުން އެގައުމު ހިންގަމުން އަންނަނީ ސަރުކާރާއި އަސްކަރިއްޔާ އާ ދެބައިންނެވެ.
